در حالات حضرت موسی بن جعفر (علیه السلام)
ماجرای #حضرت_یوسف (ع)
.
✍️ #زبدةالاشعار ✍️
.
🆔: @nohe_torki
.
مرحوم #انور_اردبیلی
.
بررسی اولسا اگر زندگی اهل ولا
سرگذشت خطر آلودۀ مردان خدا
رمز ایمانی تاپار فکر دقیق عقلا
قلبینه نور گرانمایه توحید دولار
ئوزونه خلقتنون فلسفه سی روشن اولار
.
.
بوتۀ ناره دوشن ناب طلانون نه غمی
محک تجربه دن اهل ولانون نه غمی
مشکل و حادثه دن مرد خدانتون نه غمی
بو فنا دایره نون زود گذردور خطری
سندیرا بلمیوب هیچ دوره ده صاحب نظری
.
.
انبیا سلسله سی راهنمایان بشر
پنجه نرم ایلیوب هر محنتله شام و سحر
غم چکوب لذت دنیادن ایدوب صرف نظر
هوس و خواستۀ نفسلرین گوزدن آتوب
طایر حشمت و اجلالیلری عرشه چاتوب
.
.
قصۀ یوسف صدّیقی خدای متعال
نقل ایدور سوره قرآنیده مین باب مثال
معرفت درسینه مشتاق اولا عالمده رجال
بله دنیانی نه جهل و نه تجاهل یریدور
بشره ملک جهان سیر تکامل یریدور
.
.
پیر کنعاندان آیوردی اونی تقدیر قضا
یوسفون مسکن و مأواسی اولوب چاه بلا
گوز تیکوب مبدأ اعلایه او فرخنده لقا
لطف حیّ ازلی بنده سینه یار اولدی
جبرئیل اندی او صدّیقه پرستار اولدی
.
.
بیر وسیله یتوروب فوری خداوند انام
کاروان گلدی همان یرده ایدوب قصد مقام
استراحت ایلیوب ایلدیلر میل طعام
گلدی بیر نچه نفر ایچمگه چکسونله سودان
یوسفون طلعت رخساری گوروندی قویودان
.
.
چاهدن چخدی او صاحب دل و صاحب خدمه
ساتدیلار حیف اولا بازاریده ناقص درمه
مصر عزیزی اونی خادم ایدوب اهل حرمه
آتشین عشق زلیخانی دوتوب نادیده
باخمادی ایتدیگی خواهش لرینه تهدیده
.
.
سالدیلار محبس ظلم و ستمه حق دیینی
فرقتی کور ایلدی صاحب بیت الحزنی
یوسف گمشده نون گون بگون آرتدی محنی
گیجه گوندوز یوزونه اشک ترین قیلدی نثار
اهل محبس یغشوب آغلاماقا قویمادیلار
.
.
دیدیلر بسدی یورولدون ایلمه ناله مدام
هم سنون هم بیزیم آسایشمز اولدی حرام
بو تمنانی قبول ایله ایدک اخذ مرام
سنده مقصودوه چات یوخ سوزومز بیزده چاتاق
گوندوز آغلا گیجه لر آغلاما یات بیزده یاتاق
.
.
محبس اولموشدی او عالی سیره بیت الحزن
راه کنعانه باخاردی گونوزی روزنه دن
آختاروردی گوزی شاید گوره بیر اهل وطن
بوئیدی فکری فقط ساغر مقصودی دولا
یازا بیر نامه اقلاً آتاسی راحت اولا
.
.
نچه ایل قالدی او زنداندا چکوب رنج و ملال
محبسون عاقبتی خیره دونوب تاپدی جلال
شامل لطف ایلیوبدور اونی حی متعال
یوسفی محبس غمدن یتوروب سلطنته
خوار اولان عبدی عزیز ایتدی همان ملمکته
.
.
#گریز #کاظمیه_شهادت
.
.
مطلبی یازدوقجان دفتره قلبیم دوتولار
سوزشی واردی ز بس گوزلریم اشکیله دولار
موسی کاظم گور یوسفه اوخشاتماق اولار
وار جوابی بو سوزون صاحب تدبیر بلر
محبس سندیله هم کُنده و زنجیر بلر
.
.
بو نه برنامه دی اجراسی اولوب آه و نوا
ثبت ایدوب دفتره مستوفی اندوه و بلا
فرقه باخ بو ایکی محبوسیده ای اهل عزا
بیری زندانه دوشور نعمت و اجلال آپارور
بیری زنداندا ئولور دورد نفر حمال آپارور
.
.
یوسفون محبسنون گرچه بلاسی واریدی
گون دوشردی گونوزی سالم هواسی واریدی
ئوزی آزادیدی هم آب و غذاسی واریدی
یری سردابه مکان تنگ دگلدی اطاقی
یرییَن وقته یریدی آچوقیدی ایاقی
.
.
نورس تازه نفس پنجه سی قدرتلی جوان
نه گیدوب طاقتی نه قامتی اولموشدی کمان
یوخودی اوغلی قزی گوزلری قالسون نگران
کُنده نون لنگری سالموردی فشاره دیزینی
دانشان وقتیده زنجیره دیموردی سوزینی
.
.
محبس سند ئوزی بیر گود سیه چاله ایدی
ایله محبسده یاتان مرد کهن ساله ایدی
انفرادیدی ئوزیله ئوزی هم ناله ایدی
شمع سوزان کیمی یاندوقجان اریدی بدنی
سندیدن غیر یوخیدی یاننا بیر گلنی
.
.
اون بیر ایل آهن و فولاد رطوبتده قالا
گرد و خاک ایستر اونون صورتنه لکه سالا
بیر ایله یرده بشر قالسا دوشر گورنه حالا
حقی وار اوغلی رضا همدم اولا گوزیاشنا
حقی واردور قزی معصومه توکه کول باشنا
.
.
تنگ بیر محبسی تنگ ایتدی اونا سِندِ دغا
بیر طبقده گتوروب زهریلی خرمانی غذا
عابد صالحه تکلیف ایلدی سم جفا
نقدر ایتدّی جسارت ولی حضرت یِمَدی
او دیدی هرنه، بو عذری ایستدی، بیر سوز دیمدی
.
.
بلمورم قلب بشرده نقدر واردی عناد
عوض اینکه ترحم ایده سند ایتدی فساد
ال آتوب قمچی سینه ایلدی تحصیل مراد
ورانون پنجه قوی کینه سی چوخ قدرتی چوخ
ورلان بیر قولی باغلی گوجی یوخ طاقتی یوخ
.
.
قمچی دگدوقجه او سرگشتۀ زندان بلا
گه صاقا دوندی کمک اولمادی گه دوندی صولا
دورماقا مایلدی سلسله قویموردی دورا
حرکت ایتدوگیجه تنگه دوشوردی نفسی
سس ویروردی اونا زنجیر سسی قمچی سسی
.
.
جان ویرن شخص کیمی چالدی نقدری ال ایاق
ئوزونی چاره یولوندان ولی چوخ گوردی اوزاق
آخرالامر او شوریدۀ ایام فراق
یوزینی سنده دوتوب رحم ایله ال ساخلال دیدی
تازیانه گوجونه زهریلی خرمانی یدی
.
.
اولدی تأمین ایله که سند شریرون نظری
عمل قتل پریشان ایدوب اول خیره سری
ترک ایدوب محبسی ایستوردی چخا پله لری
ایشدوبدور بو سسی غفلتاً او شوم و دغل
آنا یا فاطمه یاندی جگریم محبسه گل
.
.
ئولورم قلبنی بس داغلاماقا کیم گله جک
رو بقبله ایلیوب آغلاماقا کیم گله جک
گلمسون سن گوزومی باغلاماقا کیم گله جک
شرطی وار گلمگوون زلفی پریشان گله سن
ممکن اولسا ایویمه باش چکوب اوندان گله سن
.
.
باغبانم سارالوب ظلمیله باغ و چمنیم
من وطندن اوزاقام مندن اوزاقدور وطنیم
ایویمه قزلاریما دسترسیم یوخدی منیم
گیت او بی صاحب ایوی گورمگه اشک تر آپار
واردی اون یدی قز اون یدی قرا معجر آپار
.
#بررسی_اولسا_اگر_زندگی_اهل_ولا
#ترکی
#جلوه_عاشورا2
.
.
✍️ #زبدةالاشعار ✍️
.
🆔: @nohe_torki
نظر دهید