بسدی ای شمر بوگون قان ایلدون گوز یاشیمی #حسینیه_صحاف_تبریزی

روز عاشورا
زبانحال حضرت زینب کبری خطاب به شمر
.
.
مرحوم صحاف تبریزی
.
.
بسدی ای شمر بو گون قان ایلدون گوز یاشیمی
ظالم ئولدور منی ئولدورمه سوسوز قارداشیمی
.
.
بیر بدن که اوزی باشدان باشا زخمیله دولا
داش قلج سهلیدی بیر سینه ده دورت مین اوخ اولا
نجه انصافیدی ظالم قویاسان چکمه لی پا
ظالم ئولدور منی ئولدورمه سوسوز قارداشیمی
.
.
ایندی که دین ایوینی یخماقا واردور نظرون
اوزگه بیر دادرسی یوخدی بو خونین جگرون
باخ بیر آللهه اوتان باری چیخات چکملرون
ظالم ئولدور منی ئولدورمه سوسوز قارداشیمی
.
.
گوروسن جان ویرور اینجمتمه دینمور سوزینی
دوندروم ویر بیر امان قبلیه باری یوزینی
بیر چکوم کولگه یره باغلیوم آخر گوزینی
ظالم ئولدور منی ئولدورمه سوسوز قارداشیمی
.
.
بو جگر گوشۀ پیغمبر اکرمدی اوتان
ساخلا ال خنجریوه زوریله چوخ ویرمه تکان
باشی اوستونده آنام فاطمه غش ایتدی دایان
ظالم ئولدور منی ئولدورمه سوسوز قارداشیمی
.
.
اود دوتوب یاندی کباب اولدی عطشدن جگری
چشمه چشمه گوروسن قان ویروری یاره لری
وار یری یاندورا بو عالمی آهیم شرری
ظالم ئولدور منی ئولدورمه سوسوز قارداشیمی
.
.
زخمه گُل واردی بوگل پیکرینون یاره سی چوخ
باخورام وای منه باشدان باشا بیر صاف یری یوخ
گورنه نوعیله سوکوب قلبنی اوچ شعبه لی اوخ
ظالم ئولدور منی ئولدورمه سوسوز قارداشیمی
.
.
بسکه کاریدی آلوب طاقتنی باش یاراسی
وار علاوه اورگنده نچه قارداش یاراسی
سجده گاهنده هله قان وئروری داش یاراسی
ظالم ئولدور منی ئولدورمه سوسوز قارداشیمی
.
.
بو قدر ایلمه بیر عورتیله جنگ و جدل
دوغرادون اللریمی اللرون ایکاش اولا شل
خنجروندن بوگون ئولسمده اگر چکمرم آل
ظالم ئولدور منی ئولدورمه سوسوز قارداشیمی
.
.
قلبمون قاننى قاتسام یری وار گوز یاشیما
یولارام زلفیمی باخدوقجا سوسوز قارداشیما
دیرم وای منه ایوای کول اولسون باشما
ظالم ئولدور منی ئولدورمه سوسوز قارداشیمی
.
.
یاندورور سوز دلیم عالمی ظالم یاخوری
یوزیمه علتی وار سیل سرشگیم آخوری
خنجرون قوی یرینه بیکس عیالی باخوری
ظالم ئولدور منی ئولدورمه سوسوز قارداشیمی
.
.
آغلا صحّاف بوگون بزم عزا مِشگری سن
فخر ایدرسن که حسین بن علی نوکری سن
یاز بیر آغلار گوزیله دفتره بو سوزلری سن
ظالم ئولدور منی ئولدورمه سوسوز قارداشیمی
.
.
.
#حسینیه #صحاف_تبریزی #حسینیه_شهادت #قتلگاه #ترکی #زبدةالاشعار