ماه محرم
.
.
حاج اصغر احمدیان خسروشاهی
.
.
ای شیعه حسینون گینه باشلاندى عزاسی
بو غمده توکر گوز یاشی رخساره آناسی
.
.
عشق اهلی گییوب قاره اورکلرده الم وار
آغلور هامی گوزیاشی توکور محنت و غم وار
هر یرده غم آثاریدی بیر قاره علم وار
وار علتی باران کیمی غم اوسته یاغور غم
ذی حجّه چیخوب تازه لنوب ماه محرم
.
.
بو غمده حسینی لرین هر آن گوزی آغلار
دیللرده حسین وای اولی هردم سؤزی آغلار
باشینده قرا حضرت زهرا ئوزی آغلار
جنّتده قوروب اوغلونا بیر مجلس ماتم
گوزیاشی توکر حضرت پیغمبر خاتم
.
.
بو آی دوشوب ای شیعه حسین باشی بلایه
بو آی یری وار کون و مکان گلسه نوایه
مهمان چاغوروبلار او شهی کرب و بلایه
چوخ نامه یازوب کوفه لیلر دعوت ائدوبلر
مهمان چاغورانلار نجه گور حرمت ائدوبلر
.
.
ازّل یوزینه سو یولونی باغلادی اعدا
سولدی سوسوزیندان سارالوب گلشن طاها
بلبل کیمی گلدی بالالار نالیه اما
موج ائتدی فراتین سویی صحرالره آخدی
خوردا بالالار آغلادی حسرت گوزی باخدی
.
.
اسدیردی سموم ستمی لشکر کینه
یاندی سوسوزوندان گل گلزار مدینه
بنزردی ساری بیر گله رخسار سکینه
اوخشاردی علی اصغره دیلده سؤزی ای وای
آغلاردی دیردی صودامر قارداشا لای لای
.
.
نه تک سو یولون باغلادیلار فرقه ی عدوان
اوچ گون دئمورم اهل حرم قالدیلا عطشان
اما دیورم وئردی حسین اکبری قربان
دوغراندی او صحراده سوسوز مظهر طاها
وار حقی توکه گوز یاشینی قبرده لیلا
.
.
قاسمده قیزیل قانه بویاندی ولی ناشاد
طوی یاسه دونوب اولدی طویون حجله سی برباد
ئوز قانینه هاردا بویانوب طوی گونی داماد؟
قانیله حنا یاخدى اله عزّتی اولسون
هر بزم عزاده او طویون صحبتی اولسون
.
.
عبّاسیده یوز قویدی فراته سو گتورسون
لب تشنه لرین زخم دلین بلکه بیتورسون
بیر مشک سو، خشکیده لب اطفاله یتورسون
سو وئرمدی شام اهلی گوزی اشکیله دولدی
اوخلاندی سو مشکی ایکی قوللار قلم اولدی
.
.
بیر یاره دگوب اولمادی یاراسی قیامه
آتدان نجه دوشدی یارا شرم ایلوری خامه
توکدی گوزینون یاشینی یوز دوتدی خیامه
عرض ایلدى قان ائتدیله گوزیاشیمی قارداش
تئز گل کسور اون یدى نفر باشیمی قارداش
.
.
ای «احمدیان» عرض ائله درد دلون اولسا
دوت دامن عبّاسی اگر مشکلون اولسا
گوز یاشیدی درمانی مؤثر دلون اولسا
گوز یاشلی عریضه یتیشور تئز گئجه قالماز
بیر سائلی بو باب کرم بوش یولا سالماز
.
#ورود_محرم #احمدیان_خسروشاهی #ترکی #زبدةالاشعار
نظر دهید