بصیرتیله آچون گوز بو روزگاره باخون #حسینیه_صحاف_تبریزی

جنگ حضرت امام حسین (ع) با لشکر کفار
آخرین وداع آن حضرت
.
.
مرحوم صحاف تبریزی
.
.
بصیرتیله آچون گوز بو روزگاره باخون
بو گردش فلک پست کجمداره باخون
.
عزیز کیمسه لرین ذلتین آلون نظره
ذلیل لرده اولان عزّ و اعتباره باخون
.
عزیز فاطمه نون حالنی تصوّر ایدون
او شاه تشنه لب عرش اقتداره باخون
.
گورون نجه الی قوینندا بوینی چگننده
گوزینده اشگ روان دلده انکساره باخون
.
آلوبلا دوره سین عورت اوشاق، کنیز و حرم
وداع آخر سلطان تاجداره باخون
.
.
قیامت عالمیدور خیمگاه اولوب محشر
فغان ناله و فریاد آه زاره باخون
.
بیری دوتوب اتگیندن بیرى الیندن اؤپر
حرمسرای امامتده گیر داره باخون
.
بیری دیر بابا قیتر بیزی مدینیه سن
تمنّی و دل اطفال گلعذاره باخون
.
بیری دیور بابا بیرده منی قوجاقوه آل
او حال پراسف عترت طهاره باخون
.
باخور حرملرینه شه کمال حسرتیلن
آخور سرشگی یوزه چشم اشگباره باخون
.
معاینه گوروری دست بسته قیزلارینی
ثبات و صبر دل میر کامکاره باخون
.
ویرور بالالارینا گاه اوزی ئولوم خبرین
قتیل عشق خداوند کردگاره باخون
.
بلالی زینبه گه تاپشورور حرملرینی
امید و ملجأ وعالمده وضع کاره باخون
.
دیور آنام باجی هر بیر بلایه صبر ایلیون
رضای خاطر خلّاق نور و ناره باخون
.
نقدر ئولمه میشم من اوجادان آغلامیون
شماتته دل آچان قوم کین شعاره باخون
.
باش آچمیون باجی جان وورمیون یوزه سیلی
شعار ایدون اؤزوزه صبری اصطباره باخون
.
هانی آتام هانی جدّیم هانی آنام زهرا
بو روزگارده بیر عُمر مستعاره باخون
.
ویروب تسلّی دل اهلبیت اطهاره
او مست جام محبّتده اضطراره باخون
.
دیینمورم نجه آیریلدی اهل بیتندن
باشندا شوق هوای وصال یاره باخون
.
سوروب آتین دایانوب دسته لر قباقینده
او بی معین و هوادار و غمگساره باخون
.
او قوم باطله حق حجّتین یتورماق ایچون
آچوبدی درج گهربار او دل فکاره باخون
.
بویوردی شرم ایدون ای اشقیای دور زمن
بو چولده آز ستم و ظلم ناگواره باخون
.
سوسوز جوانلاریمی دوغرادوز بو صحراده
غم فراقیله بو سینه داغداره باخون
.
بو خیمه لرده اولانلار بنات زهرادور
عیال عصمت پیغمبر کباره باخون
.
یاخندی سوز عطشدن بوگون هلاک اولالار
خیامدن اوجالان آه پرشراره باخون
.
پیمبرین قیزینون اوغلیام هامی تانیون
معاینه من زاره ایدون نظاره باخون
.
آتام علیدی آنام فاطمه بابام طاها
آدیم حسینیدی بیر رفعت تباره باخون
.
بو یر یوزینده منم حجّت خدای جهان
امام مفترض الطّاعه افتخاره باخون
.
جواب لا و نَعم گوردی ویرمدی اشرار
پوزولدی حالی او گنجینۀ وقاره باخون
.
آتاسی حیدر کرّار تک دیوب تکبیر
او رونقی پوزولان تشنه شهریاره باخون
.
اوزین ووروب قوشونا ابن ضیغم الغزوات
الینده قبضۀ شمشیر آبداره باخون
.
نظام لشگری پوزدی صفوفی بر هم ایدوب
او شیر بیشۀ هیجاده کارزاره باخون
.
جناح و قلب و یمین و یسار اولوب پامال
هواده رعد کیمی برق ذوالفقاره باخون
.
یر اوسته باشلاری توکدی بسان برگ خزان
کمال قدرت سلطان نامداره باخون
.
اوجالدى ضجّه و ناله سران لشگردن
صدای الحذر فرقۀ شراره باخون
.
بدن یارالی عطش سوزشی اوزی یالقوز
گینه او اوغلى ئولن شهده اختیاره باخون
.
سَرِ سران عزیز سپاه کوفه و شام
قالوبدی خاک مذلّتده خوار زاره باخون
.
قاچاردیلار قباقندان قُشون او بی یارون
غریو غلغله و بانگ الفراره باخون
.
دیردی قاچمیون ای کوفیان خون آشام
آخان بو دشتیده قانیله جویباره باخون
.
بلیمی سندیروب ئولدورمسوز جوانلاریمی
بو قان ایچینده کی ابدان زخمداره باخون
.
پوزوب جفائیله پرگاریمی هارا قاچوسوز
الیمده قائمۀ تیغ شعله باره باخون
.
داغتدی مور ملخ تک او قوم کُفّاری
رشادت شه ابرار غم دچاره باخون
.
قلج وروب یورولوب دوشدی بسکه طاقتدن
یارالاریندان آخان چشمه چشمه ثاره باخون
.
قلجلانوب باشی باشدان آخوندی ثارالله
جمال حقّه چکوب پرده استتاره باخون
.
ووروبلا آنّنا داش سجده گاهی پارچالانوب
جفای فرقۀ بیشرم و ننگ و عاره باخون
.
شکسته قلبنی اوچ شعبه اوخ بیچوب گچدی
کسوب دامارلارینی تیر زهرداره باخون
.
دالی طرفدن اوخی چکدی ذوالجناح اوستن
یخلدی توپراقا اول قلبی داغداره باخون
.
الینه نیزه گلن اوخ گلن هجوم ایلدی
آلوبلا دوره سنی قوم نابکاره باخون
.
بو دسته ووردی پوزولدی بیر آیری دسته گلوب
او بیکسه وورولان زخم بی شماره باخون
.
او قدر ووردولا داش نیزه اوخ قلج خنجر
دوشوبدی دلدن او مظلوم بیقراره باخون
.
داغلدی گل بدنی جزء جزء قرآن تک
کلام ناطقۀ آفریدگاره باخون
.
او گیر دارده آیریلدی شمر لشگردن
الینده خنجر برّان و جانشکاره باخون
.
یتیشدی چکمه لی چخدی یارالی سینه سنه
عزیز فاطمه ده حال احتضاره باخون
.
گھی ساقا گھی ساقدان صولا ویروب حرکت
یارالی شاهده جان اوسته انزجاره باخون
.
چوخ اینجیدوب باشنی کسدی تشنه لب دالیدان
جداده راس منیر شهِ فخاره باخون
.
اوجالدی نیزه باشندا صدای تکبیری
کسوک باشندا اولان جلوۀ نگاره باخون
.
قالوبدی آتلار ایاقینده نازنین بدنی
سُم سمندیله اعضاسی خاکساره باخون
.
دایاندی بیر یره سوز دوشدی نطقدن صحّاف
مفصّل امرده بیر وجه اختصاره باخون
.
.
#حسینیه #صحاف_تبریزی #حسینیه_شجاعت #ترکی #حسینیه_وداع #وداع