مجلس ابن زیاد
.
✍️زبدة الاشعار✍️
?: @nohe_torki
.
آسال اردبیلی
.
بنت نطاق علی حامی قرآن زینب
خواهر جان به کف شاه شهیدان زینب
.
زینبون آدی ملکلر دیلینون ازبریدی
مریم و هاجرو حوا باشینون افسریدی
آسمان شرف و معرفتون اختریدی
چاره سیز دردلره آدی مداوا زینب
قالسا مشگلده بشر فوری دییر یا زینب
.
زینبون منزلتین درک ایلمز عقل بشر
نخل اسلام تاپوب نهضت زینبله ثمر
خاک پایین ملک و حور ایلییر کحل بصر
زینبون منزلتین حی توانا تانیور
قول قابیرقاسی سینان حضرت زهرا تانیور
.
زینبی ذات احد حیدره زیور یارادوب
کربلاده سویولان لشگره رهبر یارادوب
خیردا قیزلاری بو سرلشگره لشگر یارادوب
نطقینی تیغ دو پهنا کیمی برّا یارادوب
غیرتین غیرت سقا کیمی دریا یارادوب
.
مرحبا فاطمه نون خصم ییخان دخترینه
تاب ایدوب هرنقدر قمچی دگوب پیکرینه
قویمادی چپ باخا دشمن باشینون معجرینه
بلی بو زینب کبری شرف اسطوره سیدور
مریم اولسا شرفین آیه سی، بو سوره سیدور
.
گرچه هجران حسین قامتین ایلوبدی کمان
محمل اوستونده اونا همدم اولوب آه و فغان
قولی باغلی دولانوب شهرلری ناله کنان
مرحبا همتینه سسلدی سلطان حجاز
ناقه لر اوسته خانیم ایلدی احیای نماز
.
کوفه ده بنت علی همت شایان ایله دی
اسکتو صوتیله عالملری حیران ایله دی
نطقیلن عرصه ده حیدر کیمی طوفان ایله دی
دئدی من فاطمه نون حق دانیشان دخترییم
حیدر صف شکنون الده یالین خنجرییم
.
حاکم دونه خبر چاتدی گلوب آل رسول
بوریوب قلبلرین درد و غم احوالی ملول
دئدی فورا گتیرون صادر اولوب اذن دخول
وار امیدی اولاری دیده سی گریان گوره جک
نادم و غم زده و حالی پریشان گوره جک
.
دئدی اطرافینه مجلسده اولوون سیز هشیار
گله جک ایندی بورا آل علی تعزیه دار
عفو ائدم جرم لرین چوخ ائده جکلر اصرار
ولی من شوکت و عزتلرینی سیندیررام
اوتلانان خیمه کیمین قلبلرین یاندیررام
.
ناگهان داخل اولوب مجلسه دلبند امام
نه حساب ائتدی امیری نه اونا وئردی سلام
پشت ائدوب تخت عبیده ایلیوب یرده مقام
اوتوروب گوشه مجلسده خانیم شیر کیمین
بالالار دوره سینی آلدیلا زنجیر کیمین
.
بو عمل گلدی عبیدالله ملعونه گران
ایسته دی زاده زهرایه ویرا زخم زبان
شکرلله دئدی خوار ائتدی سیزی چرخ زمان
گور حسینی نئجه حق قانینه غلطان ائلدی
عترتین کوه و بیابانیده ویلان ائلدی
.
نئجه گور چوللره سالدی سیزی حق رهبرسیز
نئجه اکبر آناسین قویدی فلک اکبرسیز
نئجه گهواره اصغر دولانور اصغرسیز
گون قباقینده حسین پیکری الاندا یانور
قولی باغلی حرم و عترتی حیران دولانور
.
نئجه مامور ایلدیم من سپه خناسی
سالدیلار قولسوز آت اوستن اوجا بوی عباسی
قطه قطعه اولونوب قامت چون طوباسی
نئجه عباس غمی اگدی حسین قامتینی
نئجه بیر آهن عمود الدن آلوب طاقتینی
.
زینبه ابن زیادون سوزی گتدی هیجان
رگلرینده علوی قانی ائدیبدور فوران
دوردی ناگه ایاغا فخر جنان، شیر زنان
دئدی فکر ائتمه حسین ئولدی چاتوبسان ظفره
نطق برّندمیلن تختووی ساللام خطره
.
من حیا مکتبینون دهریده سر مکتبییم
بدر عصمتدی ننم فاطمه، من کوکبییم
حق دیوب حق دانیشان شیرحقون زینبییم
گلمیشم دین حقی کوفه ده احیا ائلییم
حقی ناحق ائلیین رهبری رسوا ائلییم
.
قلبیده عشق ولا ئولمسه احساس ئولمز
قطعه قطعه اولا گر قیمت الماس ئولمز
مین یارا ویرسوز اگر جسمینه عباس ئولمز
او شرافت آییدی حشره کیمی باتمیاجاخ
علقم اوسته ویریلان قانلی علم یاتمیاجاخ
.
ای جماعت بیلیسوز والی کوفه لقبین
بو امیرون تانیور بیر نفر اصل و نسبین
دانار اللهینی کیم دانسا یقین امّ و ابین
دائما مست می و عازم میخانه دی بو
تانیمازسوز آتاسین زادۀ مرجانه دی بو
.
ای جماعت نقدر ظلمیده طغیان ایله دوز
زادۀ فاطمه نی قانینه غلطان ایله دوز
اوخ ویروب اصغرین آغ دوشلوگونی قان ایله دوز
هانسی دورانیده غم عرش الهه چاتیلوب
هانسی پیکاریده دیلسیز اوشاقا اوخ آتیلوب
.
نئجه گور قوم دنی سالدی بلایه باشیمی
بیر گون عرضینده منیم قان ائلدی گوزیاشیمی
ییخدی تپراقه یوز اوسته اوجا بوی قارداشیمی
مکریلن باغلادیلار قارداشیمون یوللارینی
سالدیلار ظلمیله سقای حرم قوللارینی
.
قلبیمی فوج عدو محنتیلن داغلادیلار
حالیمه جن و بشر، حورو ملک آغلادیلار
فاطمه قیزلارینون قوللارینی باغلادیلار
کوفیان مهر و وفا بندینی کاش قیرمیالار
ویرالار داش ولی دای دل یاراسی ویرمیالار
.
گوره سن کوفه ده بیر دین حقه یاور اولار
کیم دییردی که بهار علوی بیله سولار
فوج غمدن بالالار گوزلری اشکیله دولار
کیم دییردی که وفا زورقی طوفانه دوشر
حیدرون بند دلی سینۀ میدانه دوشر
.
پوزولوب کرب و بلاده شرفون انجمنی
سالدیلار آتلار ایاقینه حقیقت دیینی
نیزه و خنجر اولوب مظلوم حسینون کفنی
جسمی تپراقلارون اوسته باشی اللرده قالوب
آلنینون داش یاراسی طاقتیمی الدن آلوب
.
ابن مرجانه گوروب کافی اولوب بزم عزا
اسرادن چوخ ایدور ئوز سپهی آه و نوا
دانیشور زینب هامی اشک توکور بی پروا
هیئتین سالدی خانیم کاخ عبیدالله
هامی گوزیاشی توکوب قانه بویانمیش شاهه
.
#مجلس_ابن_زیاد
#بنت_نطاق_علی_حامی_قرآن_زینب
#آسال_اردبیلی
#ترکی
.
✍️ #زبدةالاشعار ✍️
?: @nohe_torki
نظر دهید