شب عاشورا
زبانحال امام (ع)
..
..
مرحوم سعدی زمان
..
..
بند بندیمندن منی گر دوغراسا دشمن باجی
دست بیعت وئرمه رم اصلآ یزیده من باجی
..
..
هر کشاکش وار باجی بیر کلمۀ بیعتده دور
بو کشاکشدن ولی بعضی لری حیرتده دور
حفظ ناموس و شرافت، حفظ حیثیتده دور
گئچمرم حیثیّتیمدن اول گيلن ایمن باجی
..
..
آب خضر اولسا ، دنی اشخاص الیندن ایچمرم
باش اگوب ادنایه عالی منصبیمدن گیچمرم
سینه می دولدورسا اوخ بیر دسته گلدن سئچمرم
زخم خنجردن خوشام جسمیم اولا گلشن باجی
..
..
اوز مقدس فکریمه لازمدی جان شاباش وئرم
رونق دین مبین اوسته اوغول قارداش وئرم
چوخ سعادتدور دم شمشیر شمره باش وئرم
فکریمه کون و مکان اهلی دئسون احسن باجی
..
..
امر دینی دور بو مطلب، جنگ شخصیّت دگل
من شهادت ائتمیشم تصمیم بی علّت دگل
لفظ ننگ آوردی بیعت، اؤلماقیم ذلّت دگل
عزّت دین اوسته ئؤلّم من، اسیر اول سن باجی
..
..
بیر نمایش وئرّم ای باجی صباح بو چولده من
مستقیمُ الرَّأی لیقدا آدیمی قیلّام علن
قامت رعناسینه اؤز اوغلومون سالّام کفن
جسمینی اوراق ائدر قرآن کیمی دشمن باجی
..
..
بو بیاباندا پوزار شام اهلی تشکیلاتیمی
داش وورالّار قان دوتار بو حق نما مرآتیمی
نیزه ده وئرّم نشان هر یئرده معلوماتیمی
تا اولا هر یئرده رسوا شمر ذی الجوشن باجی
..
..
اصغریم اوخلانماسا تکمیله یئتمز نیّتیم
اولماز اهل باطله معلوم حقّانیّتیم
کشف اولار اصغر باشیله عین مظلومیّتیم
گون کیمی مطلب اولار عالم لره روشن باجی
..
..
تک به تک وئرّم بو چولده باجی یئتمیش بیر فدا
عالم معناده فخر ائیلر منایه کربلا
اکبرین نعشین گؤرنده لیلیِ مجنون نما
چوللری وار حقّی ائتسون قیس تک مسکن باجی
..
..
قیزلاریم سوز عطشدن بیر ساری گول تک سولار
قارداشیم عبّاس علی اولادینه سقّا اولار
اوخلانار سو مشگی، مشگِ چشمی قان ایله دولار
اللریندن ال چکر عبّاس شیر اوژن باجی
..
..
حفظ حیثیتده دور (سعدی) شرافت لاکلام
تیغیله حقّ اوسته جان وئرماق شرافتدور مدام
بو سوزیله عزّت نفسین وئروب مشقین امام
ئؤلّم اما ائتمرم بیعت یزیده من باجی
..
..
..
#شب_عاشورا #سعدی_زمان #ترکی #زبدةالاشعار #کنزالحسینی2
نظر دهید