بهارون موسمی گیچدی گینه فصل خزان گلدی #شام_غریبان_سعدی_زمان

شام غریبان حضرت اباعبدالله الحسین (ع)
.
.
مرحوم حسینی سعدی زمان
.
.
بهارون موسمی گیچدی گینه فصل خزان گلدی
دوتوب غم گوگلیمی گوگلیمدن آه و الامان گلدی
.
سارالدی لاله گل سولدی بنفشه سربدوش اولدی
بلوب بوحالی بلبل گلشنه ناله کنان گلدی
.
نه گوردی گل سولوبدور گلشنون وضعی اولوب برهم
چکوب بیر آه، گوزدن گوز یاشی اولدی روان گلدی
.
گوروب بوگلشن و بو بلبلون حالین گوزوم دولدی
حسینون گلشنی یاده دوشوب دلدن فغان گلدی
.
حسینون گلشنون کرببلاده سولدوروب عدوان
حیالی عترتی شوره بسان بلبلان گلدی
.
کمکلر جان ویروب پیغمبر اوغلی قالدی بی یاور
صف اعدایه یالقوز اول شنهشاه جهان گلدی
.
ایدوب دعوا دگوب یاره آخوب قانی دوشوب دلدن
یر اوسته ذوالجناح أوستن او شاه انس و جان گلدی
.
دوشنده ذوالجناح أوستن یر اوسته قانلو نعشندن
او قانلو توپراقا تازه حیات جاودان گلدی
.
باشی آخدی دالی ضعف ایتدی قلب عالمون قلبی
عزیز فاطمه أوسته سِنان الده سَنان گلدی
.
حیا ایتموب أمامین ووردی بیر نیزه بوغازیندان
فغانه عالم لاهوتده لاهوتیان گلدی
.
اودور علت اوخور زوّاری یا من نَحرُهُ مَنحور
دگنده نیزه حلقی پارچالاندی لخته قان گلدی
.
او قاندان دستماز آلدى نمازه ایلدی اقدام
امامه اقتدا ایتماقلقا قدّوسیان گلدی
.
چالوب طبل فرح اللرده یکسر نیزه و خنجر
او شاه بیکس أوسته دسته دسته شامیان گلدی
.
امامین دوره سین آلدی اولار یا صاحب الاسلام
بهشت عدنیده فریاده سکّان سما گلدی
.
اولار ووردی یورولدی دور و بردن تا کنار اولدی
بیر آیری ظلم اولوبدور نالیه کرّوبیان گلدی
.
قایتدی یرلرینه نیزه و خنجر ووران یکسر
هجوم آور اولوب بیر نچّه دسته داش ووران گلدی
.
او کافرلر او قدری پاره ووردی ال چکوب گیتدی
بومحنتدن فغان و شیونه افلاکیان گلدی
.
دوشوب شمر دنی بو فکره زهرانین ایوین یخسون
حسینون مصرعینه الده تیغ خونفشان گلدی
.
ایدوب بیر ظلم امامه لرزه سالدى عرش اعلایه
او صحرایه پیمبر باش آچوخ ناله کنان گلدی
.
دلیم یانسون دیسم نه نوعی ئولدوردی او مظلومی
که گوگلردن یره بالله ملائک باغریقان گلدی
.
دوتولدی گون او ساعتده هوا تار اولدى قان یاغدی
یخلدی رکن عالم لرزیه هفت آسمان گلدی
.
شهادت امری ختم اولدی خیامه دشمن اود ووردی
نوایه نی تک اولدم زینب بی خانمان گلدی
.
شرار آهمیله قلبیم اود دوتدی بو مطلبدن
بو یاره قلبیمه بیر اوزگه اسرار نهان گلدی
.
هوا چون روز زینب تیره لندی وقت شام اولدی
گیجه شام غریبانه ستمله ساربان گلدی
.
گورنده جسمنی آت دیرناقی پامال ایدوب یرده
اونا بیرحال اوّلده، بوحالتدن عیان گلدی
.
خیال ایتدی قیتسون، قویمادى أمّا طمع گیتسون
خیالینده ظهوره بیر جفای بیکران گلدی
.
کمربند امامه ال آتوب تا ایلسون تاراج
دفاع، قصدیله غیظه پادشاه تشنگان گلدی
.
گتوردی قویدی محکم صاق الین روی کمربنده
نه ظلم ایتدی، که قهره خالق کون و مکان گلدی
.
دولاندی صاق صولا تاپدی او ظالم بیر سنق خنجر
یره سر،پا برهنه عرشدن سبّوحیان گلدی
.
ووروب جبراً کسوب چکدی بلکدن صاق الین اؤزدی
بیله فکر ایتدی بو ایشدن اوزینه عزّ و شان گلدی
.
صاق ال گیتدی حسین صول الّی دوتدی تا کمربندین
صولوندا ووردی قطع ایتدی بیلکدن قان روان گلدی
.
امامون اللرین کسدی ال آتدی تا کمربنده
او ساعت موجه بحر قهر حیّ لامکان گلدی
.
تزلزل ایلدی یرلر اؤزون گیزلندی اول ظالم
گوروب شام غریبانه امیرمؤمنان گلدی
.
پیمبر باش آچوق الده عمامه، مجتبی گریان
آناسی فاطمه حالی پریشان، موکنان گلدی
.
ال آتدی باشه گوز یاشلی اوز اوغلین باسدی آغوشه
خطاب ایتدی اوغول دور بیر اوتور زهرا آنان گلدی
.
گورنده اللرین وامحنتا سسلندی ضعف ایتدی
گلوب هوشه دیدی گور نه آنان قدّی کمان گلدی
.
قالوب جدّون حسینون قانی یرده یا ولی الله
نه وقت گورّم دیولّه گل «حسینی» قان آلان گلدی
.
بو غم اولدم گیدر دلدن گورم جبریل سسلندی
حجاب غیبدن ظاهر اولوب صاحب زمان گلدی
.
.
.
#شام_غریبان_سعدی_زمان #ترکی #زبدةالاشعار