شهادت حضرت علی اصغر (ع)
زبانحال حضرت رباب (س)
.
✍️ #زبدةالاشعار ✍️
.
🆔: @nohe_torki
.
#سبک_یارالی_جان_یارالی … 4 سبک
.
مرحوم کاتب اردبیلی
.
بویووی اوخشاماقا چوخ هوسیم واردور علی
سنه لای لای دیرم تا نفسیم واردور علی
.
.
سن حسین گلشنینون تازه گوگرمیش گولی سن
گلیسن غنچه سی سن شاخه سی سن سُنبلی سن
بیلموسن حیف اولا قلبیمده اولان نسگلی سن
سنه لای لای دیرم تا نفسیم واردور علی
.
.
ای اولان عمری سحر اولدوزی قربانون اولوم
تشنه قربانلار ایچینده قوزی قربانون اولوم
گلدی پستانیمه بیل صود اوزی قربانون اولوم
سنه لای لای دیرم تا نفسیم واردور علی
.
.
هر شهیدون بدنینده وار اوغول چوخ یاراسی
نازنین پیکروون گر چه سنون یوخ یاراسی
هامیدان صعبدی حلقونده اولان اوخ یاراسی
سنه لای لای دیرم تا نفسیم واردور علی
.
.
نجه سندن صورا سنسیز گونوم آیا گئچه جک
گوندوزوم تیره لنوب چون شب یلدا گئچه جک
شام هجرون منه بیر محشر عُظما گئچه جک
سنه لای لای دیرم تا نفسیم واردور علی
.
.
اوخشیوب آغلارام هر دمسنه بیر نوعی اوزوم
یاندیرور جمله ی داغ و داشی نسگلی سؤزوم
گورسه بوندان صورا بیر بوش بشیک هر یاندا گوزوم
سنه لای لای دیرم تا نفسیم واردور علی
.
.
میوة نوبریدون غملی بوداقیمده منیم
ائتمدون نشو نما لیک قوجاقیمده منیم
صورتون عین مصوّردی قباقیمده منیم
سنه لای لای دیرم تا نفسیم واردور علی
.
.
هیچ خیال ایلمزیدوم منی بیله آتاسان
بوغازون اوخلانا بو نوعیله قانه باتاسان
قویمادیلار بو قوجاقیمده دویونجا یاتاسان
سنه لای لای دیرم تا نفسیم واردور علی
.
.
قانلی قونداقوه حسرت گوزوم هر لحظه باخار
اورگیم قانه دونر گوشة چشمیمدن آخار
آنون ئولسون بالا نیلوم یاسوی ائتدیله خوار
سنه لای لای دیرم تا نفسیم واردور علی
.
.
ایلدون سینه خراش هم آنوی هم اوزووی
دلون اولمادی منه بیرجه دییدون سوزووی
اوخ دگن وقتیده بیلمم نجه آچدون گوزووی
سنه لای لای دیرم تا نفسیم واردور علی
.
.
بوغازون قانینی سن سو یرینه نوش ایلدون
غم کشیده نوی تیر غمه توش ایلدون
تا وارام اگنیمی هجرونده سیه پوش ایلدون
سنه لای لای دیرم تا نفسیم واردور علی
.
.
نقدر عمریم اولا اگنیمه قاره گیرم
آدوی ازبر ایدوب وا علی اصغر دیرم
آج اولان وقته غذا خون جگردن ییرم
سنه لای لای دیرم تا نفسیم واردور علی
.
.
شیر خواره بالا سن سیز نجه من صبر ایدرم
قویسالار قاللام او گهواره وی بوش ترپدرم
ولی قویمازلا قالام کوفه و شامه گیدرم
سنه لای لای دیرم تا نفسیم واردور علی
.
.
سنی دل آچمامیش اوخ دگدی دانشدیردی اوغول
بینوا مادروون قلبین آلیشدیردی اوغول
سوسوز اوخلانماقون حالیمی قاریشدیردی اوغول
سنه لای لای دیرم تا نفسیم واردور علی
.
.
«کاتبا» آغلا حسین عترتینون غملرینه
قالدی بیچاره رباب حسرت علی اصغرینه
آه او وقتدن که دیردی او ملک منظرینه
سنه لای لای دیرم تا نفسیم واردور علی
.
#اصغریه_کاتب_اردبیلی
#اصغریه_شهادت
#بویووی_اوخشاماقا_چوخ_هوسیم_واردور_علی
#ترکی
.
✍️ #زبدةالاشعار ✍️
.
🆔: @nohe_torki
نظر دهید