کوچ از شام
.
✍️ #زبدةالاشعار ✍️
.
🆔: @nohe_torki
.
ستار رزاقی تبریزی
.
بو خرابه گوشه سینده یاتما خسته جان رقیه
دور گیداخ منی غمونده ایتمه باغریقان رقیه
.
.
بو خرابه یرده یاتما دخت شاهه ناروادی
خاصه بیر قیزی که سن تک دخت شاه کربلادی
نسگلین اورکده دائم بیر ساغالمیان یارادی
ایدورم اودورغمونده روز و شب فغان رقیه
.
.
قورتاروب یزید الیندن اهلبیت دلشکسته
لیک ظلم و جور الیندن هاموسی ملول و خسته
دوشنوبله دیده گریان خرداجا مزارین اوسته
گوزلریندن اشک خسرت اولوری روان رقیه
.
.
بو جهاندا صبر ایدن ای غم و مِحنت و بلایه
غم و محنتون الیندن بیزه ایتمین گلایه
دور گیداخ بیزیله سنده او دیار کربلایه
اورگینده واردی چونکی غم بیکران رقیه
.
.
بو قدر غمیله سنسیز نجه شامی ترک ایدیم من
یوخ کسیم بو غربت ایچره تا کی سویلسون نئدیم من
سنی بو خرابه یرده کیمه تاپشوروب گیدیم من
کی بو شامیده سنیله اولا همزبان رقیه
.
.
باباوین غم فراقی سنی بسکی سالدی دلدن
ایله وضع حاله قالدون گیدوب اختیارین الدن
باد ظلم اسوبدی سن تک بلبلی آیردی گلدن
عاقبت خرابه اولدی سنه آشیان رقیه
.
.
منه بو چتین سفرده یارو همزبان سنیدون
تک نه همزبان بو یولدا یار مهربان سنیدون
اهل کاروانه هردم غملی نوحه خوان سنیدون
گیدوب ایلدون غمونده بیزی نوحه خوان رقیه
.
.
بو جهانه سن تک عاشق گلمیوبدی گلمز اصلا
عشقیده یاراتدون الحق بو جهاندا شور وغوغا
درس عشقی مکتبوندن آلاجاقدی اهل معنا
عشقیوی جهانیانه ویرموسن نشان رقیه
.
.
هیچ قیزون باشی سنون تک دهریده بلالی اولماز
هیچ گول آفت خزانه بیله گولستاندا سولماز
هیچ یتیمه نی بونوعی مِحَن زمانه یورماز
غم و محنتیله ایتمز اونی امتحان رقیه
.
.
ستم یزید کافر سنی غصه مرگ ایدیبدی
کی خرابه دن بو غمده گوگه اللامان گیدیبدی
دیین اولمادی یزیده کی یو قیزسنه نئدیبدی
اولا تا گوزونده اشکی بو جهاندا قان رقیه
.
.
گلی بیر زمان همین یئر اولی اهل عشقه مأوا
قبریوی زیارت ایلر گوزی یاشلی اهل تقوا
خرداجا مزارین اوسته بزم غم ادلّه برپا
آغلیوب دییلّه ایوای غمی جانستان رقیه
.
.
چوخلاری سالار گذارین خسرتیله بو دیاره
ولی بعضیلر اوزاقدان گوز یاشین تو توکر عذاره
سسلر ای خدای (رزاق) نظر ایت بو جمع زاره
تا گلوب خرابه ایچره ایده لر فغان رقیه
.
.
.
#کوچ_شام #ستار_رزاقی
#بو_خرابه_گوشه_سینده_یاتما_خسته_جان_رقیه
#ترکی
.
✍️ #زبدةالاشعار ✍️
.
🆔: @nohe_torki
نظر دهید