ورود به کربلا
.
✍️ زبدة الاشعار ✍️
?: @nohe_tork
.
#سبک_زینبم_جان_اوستیم (بیش از 4 سبک)
.
مرحوم هندی تبریزی
.
بو دیار کربلادور کعبه ایمان باجی
من گرک بوردا کسم یتمیش ایکی قربان باجی
.
.
کربلادور بوردا باجی جلوۀ دلدار وار
جستجو وار جذبه وار شوق جمال یار وار
بزم خلوت انس و الفت لذّت دیدار وار
هم بهشت آرزو هم رحمت رحمان باجی
.
.
من بو صحراده مکرّر عکس منظر چکمیشم
عکس منظر نامنه تصویر دلبر چکمیشم
آرزوی وصلنی حسرتله ایللر چکمیشم
تاپمیشام جانانیمی آیریلمارام بیر آن باجی
.
.
هر بلا بو یرده گلسه باشیمه تاب ایلرم
عاشقانه ترک اهل و قوم و اصحاب ایلرم
بسکه بو دشتی قیزیل قانیله سیراب ایلرم
کربلانی ایلرم پروردۀ احسان باجی
.
.
سرگذشت کربلا سرّ سرشتیمدور منیم
قانیله باشدان یازیلمیش سرنوشتیمدور منیم
ایستی قوملار اوستی دیبای بهشتیمدور منیم
فرش عرش عشقدور یا سُندس رضوان باجی
.
.
باش باشا قویماق بو یرده تیغ زهرآلودیله
عهد و پیمانیمدی باشدان حضرت معبودیله
سوز ویروب سوز آلمیشام من شاهد مقصودیله
سینسا جان پیمانه سی سیندیرمارام پیمان باجی
.
.
روح اجدادیم بو یرده بیر بویوک اجلاس ایدر
قاسمی داماد ایدن گون طوی ائوینی یاس ایدر
فاطمه دُرّ سرشگین تودۀ الماس ایدر
بیر اولور روز وصالیله شب هجران باجی
.
.
بیر بشارت ویر عروسه خاطرین شاد ایلسون
قانیله آرایش حسن خداداد ایلسون
آغلاسا داماده آزادانه فریاد ایلسون
ایتمسون شرم و حیادن دردینی پنهان باجی
.
.
بو گلستاندا که هر بیر برگی یارین لطفی دور
بیر قیزیل گل وار که اون سگیز بهارین لطفی دور
بو گلون هر جلوه سی پروردگارین لطفی دور
تیز سولار بو گل ولی گل آچمادان خندان باجی
.
.
منده طاقت یوخ دیم بو غنچۀ تر آدینی
باخ یانقلی قلبیمه قوی داغ اکبر آدینی
امّ لیلادن سوروش شبه پیمبر آدینی
گُل آدین سالماز دیلیندن بلبل نالان باجی
.
.
هاردا اولسان یاده سال سرداریمون احوالینی
اوخلانوب پرپر چالان شهبازیمون شهبالینی
قرمزی قانیله دولموش مشگ مالامالینی
باوفا جاندان گیچن سرداره جان قربان باجی
.
.
باش یاریلمیش قول دوشوب باشدان ایاقه غرق خون
قدّ موزونی اولوب قدّ علم تک سرنگون
پاره مشگی سینه سینده یاره حدّیندن فزون
تشنه لر سقّاسی امّا جان ویرن عطشان باجی
.
.
سود امر اوغلوم عطشدن سو یرینه قان ایچر
قان ایچر اما اونوندا قانینی پیکان ایچر
نوک پیکانی اَمَر چون شیرۀ پستان ایچر
برگ ریحان تک اَسَر اولور لرزان باجی
.
.
قارداشون چون خاطر آزادی فارغ بال ایدر
پیک پیکانی اورکدن حسن استقبال ایدر
نازنین یارین چکر آغوشه حسب حال ایدر
خوش خبردور طایر دولت کیمی پیکان باجی
.
.
عاشق جانبازه تن لازم دگول یوخ ایسترم
قان توکن قامت بوکن طاقت شکن اوخ ایسترم
اوخ عزیز خاطریمدور خاطرین چوخ ایسترم
چون پیام آور کبوتر تک، گیچر جاندان باجی
.
.
تیر خونین پَر هُمای اوج عزتدور منه
فاخرانه حامل حکم شهادتدور منه
سینم اوسته وار یری شایان حرمتدور منه
صدر سینمدور مقام قاصدک جانان باجی
.
.
اوخ گلور تقدیم دعوت نامۀ یار ایلسون
جام وصلی قانیله لبریز و سرشار ایلسون
قلبیمه یاتسون یاتان دنیانی بیدار ایلسون
یارِ بی آزار اولور قلبه یاتان مهمان باجی
.
.
ظهر عاشورا که قرص لاله گون آفتاب
آتشین رخساردن یکسر کنار ایلر نقاب
جانیمی هم آفتاب هم قحط آل ایلر کباب
اوندا گَل گور قوملار اوسته یاتمیشام عریان باجی
.
.
آخرین دملرده جان سرتا به پا مجذوب اولور
شوق دیداریله محو طلعت مطلوب اولور
ورد و ذکریم دلده یا معبود و یا محبوب اولور
یا کریم الصَّفح یا ذالعَفو و الغُفران باجی
.
.
قان ایچینده ال ایاق چالّام مناجات ایلرم
جان و دلدن باش و جان ویّرم مباهات ایلرم
حق سوزین ئولسمده مین نحویله اثبات ایلرم
نیزه باشیندا کسیک باشیم اوخور قران باجی
.
.
خیمه گاهیم اود دوتوب تبدیل اولاندا کوللره
هولدن اولاد و اطفالیم قاچاندا چوللره
بیر به بیر یغ باشیوه لطف ایت سارالمیش گللره
قالماسون باشسیز اوشاخلار چولده سرگردان باجی
.
.
قید تندن قورتولوب آزاد اولاندا جان پاک
کفن و دفنیم باره سینده، اولما چوخ اندوهناک
نیزه تابوتیم اولار بُرد یَمانی خون و خاک
شمع بالینیم شراره آه مظلومان باجی
.
.
سویله «هندی» ضعف و نسیان حرفین عنوان ایتمسین
خدمتینده صادق اولسون ترک شکران ایتمسین
دردی اولسا نوحه یازسون فکر درمان ایتمسین
درد بی درمانینه من ایلرم درمان باجی
.
#ورود_کربلا
#بو_دیار_کربلا_دور_کعبه_ایمان_باجی
#هندی_تبریزی
#ترکی
✍️ #زبدةالاشعار ✍️
?: @nohe_torki
نظر دهید