کوچ از شام
.
#زبدةالاشعار
.
: @nohe_torki
.
مرحوم نجمی تبریزی
.
بو شام شومیده ای شامیان بالام قالدی
ویرن خرابه ده حسرتله جان بالام قالدی
.
نه گوردی شامیده بلمم بیله قبول ایلدی
خرابه گوشه سین ایتدی مکان بالام قالدی
.
آدی رقیّه بنی هاشمه عزیزه ایدی
ترابه حسرتیله یوز قویان بالام قالدی
.
یتیمه دور سیزه بو طفلی تاپشوروب گیدورم
ترحّم ایلیون ای شامیان بالام قالدی
.
اولاندا لیلۀ جمعه گیدون زیارتینه
ایدون تلاوت قران امان بالام قالدی
.
سالون خیالوزه معنای اکرم الضّیفی
بو طفله حرمت ایدون ناتوان بالام قالدی
.
دویونجا آغلاماقا قویمادی منی دشمن
سیز آغلیون ایدون آه و فغان بالام قالدی
.
گولون دالینجا او بلبل کیمی فغان ایتدی
اولون بو خوردا گله باغبان بالام قالدی
.
یاناردی گل یوزی گونلر ایوینده چوخ گونلر
خرابه ده گون ایوینده یانان بالام قالدی
.
منیم یریمه آچون چترآهوزی باشینا
بو یرده گورمه دی بیر سایبان بالام قالدی
.
یاتاردی گاه قوری یرده گاه سینمده
اولان بو سینمه گل مهربان بالام قالدی
.
بو یرده چوخ گیجه نی آج یاتاردی صبحه کیمی
اورکده نسکلی وار باغریقان بالام قالدی
.
وورا وورا بالامی شمر شوم ئولدوردی
اولان خدنگ جفایه نشان بالام قالدی
.
طناب ظلمیله باغلیدی جان ویرنده قولی
طنابین اولمادی بیر کس آچان بالام قالدی
.
سرشک حسرتیله غسل ویرموشم بالاما
بیر عمرعمّه سینی آغلادان بالام قالدی
.
کفن تاپولمادی اوز کوینگیله دفن ایلدیم
حسینه مظهر اولان ناتوان بالام قالدی
.
بویرده «نجمی» دایان یاندی دفتر و خامه
بو سوز کفایت ایدر شامیان بالام قالدی
.
.
#کوچ_شام #نجمی_تبریزی
#بو_شام_شومیده_ای_شامیان_بالام_قالدی
#ترکی
.
#زبدةالاشعار
.
: @nohe_torki
نظر دهید