زبانحال رباب خاتون به حضرت علی اصغر (ع)
..
..
مرحوم صحاف تبریزی
..
..
بو قدری آغلاما ایتمه فغان علی اصغر
بو حالون ایتدی منی باغریقان علی اصغر
..
آلوبدی سوز عطش اختیاریوی الدن
ایدوب بو نوعی سنی ناتوان علی اصغر
..
سولوب یوزون سارالوب غنچه لبلرون قوریوب
اسوب جمالوا باد خزان علی اصغر
..
بو گل کیمی سارالان رنگیوه آنان قربان
ئولیدی کاش او بیکس آنان علی اصغر
..
نه حسرتیله گوروم گوزلرون دوشوب چوخورا
گوزوم ایشقلقی روح روان علی اصغر
..
بالق کیمی چابالورسان اوغول قوجاقمده
یاخوندی کیم ویره سن تشنه جان علی اصغر
..
اوزون هلاک ایلمه بیر دقیقه آرام اول
نه اضطرابیدی بوسنده جان علی اصغر
..
همی منی هم اوزون یاندوروب کباب ایلدون
سیزیلداما بیله ایتمه فغان علی اصغر
..
ایدوم نچاره نه امجگلریمده واردی سودیم
نه خیمه لرده سویا وار گمان علی اصغر
..
سنون کیمی سوسوزام منده اود دوتوب یانورام
یتوب دوداقیمه جانیم اینان علی اصغر
..
ندور علاجیم اوغول سو تاپوم سنه هاردان
کسوب سو یولّارینی کوفیان علی اصغر
..
ئولوب سو اوسته سوسوز قارداشون على اکبر
قویوب آناسینی ناله کُنان علی اصغر
..
سو ایستمه سنیده قورخورام الیمدن آلوب
آنان مَلَر قویالار شامیان علی اصغر
..
بلایه سالما اؤزون آت سو فکرینی باشدان
آمان بو قومون اَلیندن آمان علی اصغر
..
دوتوبدی گوزلرینی قان گوزتلوری یولوی
اَلینده حرمله تیر و کمان علی اصغر
..
قالور نحاله او ساعت غریب و بیکس آنان
ایده اگر سنی تیره نشان علی اصغر
..
گرک ئولنجه دیم وای سوسوز ئولن بالا وای
غریب آناسنی آغلار قویان علی اصغر
..
گوروم منیم کیمی قالسون بالاسنا حسرت
سنون بو غملرون آسان سانان علی اصغر
..
توجه ایله اؤزون دل شکسته «صحّافه»
اولوب بیر عمر سنه نوحه خوان علی اصغر
..
اورکده دردی وار آغلار سنه توسّل ایدر
بو شرح حالیوی ایلر بیان علی اصغر
..
..
#اصغریه #صحاف_تبریزی #اصغریه_شهادت #ترکی #زبدةالاشعار
نظر دهید