بو ماجرادن اولوب آگه آل پیغمبر #اکبریه_حقیر_خویی

در عزم رزم حضرت علی اکبر(ع)
.
.
مرحوم میرزا عبدالوهاب حقیرخویی
.
.
بو ماجرادن اولوب آگه آل پیغمبر
که رزمگاهه گئدور نوجوان علی اکبر
.
اوجالدی شور و نوا اهل بیت عصمتدن
چخوب کناره هامی خیمهٔ طهارتدن
.
مخدّرات حرم عترت رسول الله
آلوب او ماه وشین دوره سین چو هالهٔ ماه
.
بنات نعش آراسیندا او کوکب سیّار
جُدی مثال چخوب انجم ایچره دوتدی قرار
.
یوزی سپهر ملاحتده شمس نور افشان
جبینی زهرهٔ زهرا کیمی اولوب تابان
.
ائدوب احاطه اونی اختران برج حیا
قرین اولوب قمره اولدی مشتری لیلا
.
الین آلوب الینه سویلدی جوانیم اوغول
منیله خیمیه گل ای عزیز جانیم اوغول
.
که دور رویوه ای شمع محفل شب تار
اجازه وئر گله پروانه تک دولانیم اوغول
.
یوزوی سینمه قوی اضطراب قلبیمدن
سنه عیان اولا سوز دل نهانیم اوغول
.
ترحّم ایله غریبم علی پناهیم یوخ
بو غربت ائلده گلور بیر سنه گمانیم اوغول
.
من غریبی اگر مبتلای هجر ائده سن
فلک لره اوجالور ناله و فغانیم اوغول
.
سن اولماسان بو جلالیم گئدر علی الدن
سنیله محترمم یوسف زمانیم اوغول
.
اگر دلیمده دئسم قلبیدن رضا دگلم
سنون فراقوا یوخ طاقت و توانیم اوغول
.
نه گوردی لیلی بیچاره اؤزگه حاله دوشوب
ولی او حالیله بیر اولمیان خیاله دوشوب
.
اگرچه فصل خزاندور بهاره مایلدور
زمان هجر یتوب فکرت وصاله دوشوب
.
گوزیندن اشگ یوزه دمبدم اولور جاری
گل اوسته بس دیه سن قطره قطره ژاله دوشوب
.
دئدی چوخ آغلاما صبر ایله مهربانیم آنا
غم زمانه ئیله قامتی کمانیم آنا
.
منه بویور گوروم آیا نه نوع منع ائدوسن
بیر امریدن که ائدوب سرور زمانیم آنا
.
مگر حسینیدن آرتوقدی اکبرین جانی
اولیدی مین بئله عالمده کاش جانیم آنا
.
پیمبر اوغلونا قربان اولیدی هر آندا
آخیدی هر طرفه چشمه چشمه قانیم آنا
.
بو قدر آغلاما آرتوق منی کباب ائتمه
دولوبدی اشگیله گور چشم خونفشانیم آنا
.
اگر چه مشکل اولور درد هجر چاره ندور
آز آغلا صبر ائله ای راحت روانیم آنا
.
دوشوبدی باشیمه سودای حق بو سودادن
به غیر سودنه معلومیدور زیانیم آنا
.
قوری یر اوستی اولا فرش خاک بالینیم
مقام قرب اولور منزل و مکانیم آنا
.
گر اولماسا کفنیم اولماسون نه باک اولا گر
حریر شعشعه ی شمس سایبانیم آنا
.
کبوتر حرمم طایر بهشت برین
فراز کنگره ی عرش آشیانیم آنا
.
گهر نثار اولوب لعل گوهر افشانی
آلوب فصاحتی آرام و صبر لیلانی
.
اوغول یرینه آنا ائتدی حسرتیله نگاه
او گل جماله باخوب جوش ائدوب اورک قانی
.
دئدی اوغول سر زلفون کیمی پریشانم
دوباره ائتمه پریشان من پریشانی
.
جانیمه سالدی شراره عشق پنهانون سنون
اولموشام پروانه سان نار ایچره سوزانون سنون
.
بیر ساغالماز یاره دور سینمده کی یارم منیم
بیر توکنمز دردیدور بو درد هجرانون سنون
.
کاکلون تک درهم و آشفته دور حالیم منیم
تیتروری گوگلوم کیمی زلف پریشانون سنون
.
خم اولور پشت گمان تک نخل شمشادیم منیم
دوشسه گر رفتاریدن سرو خرامانون سنون
.
زهر هجرانیله آرتار دمبدم دردیم منیم
شربت وصلیله وار بو درده درمانون سنون
.
روزگاریم تیره زلفون تک قرا بختیم منیم
طالعیم همرنگ زلف عنبر افشانون سنون
.
کهربائی رنگ اولور بو چهره ی زردیم منیم
قانیله گلرنگ اولا گر ماه تابانون سنون
.
قطره قطره خوندل جاری ائدر دیدم منیم
گر توکولسه خنجر بیدادیله قانون سنون
.
ناوک محنتلره آماج اولور سینم منیم
محنت دنیادن اما قورتولور جانون سنون
.
اؤز الیمله چاک اولو پیراهن صبریم منیم
چاک اولا شمشیریله گر جسم عریانون سنون
.
من نه لیلایم ظهور ائتمز ولی عشقیم منیم
اولماسام مجنون کیمی قیس بیابانون سنون
.
قویمارام گوزدن سنی وابسته دور روحیم منیم
جان گئدر الدن الیمدن گئتسه دامانون سنون
.
قلبیمی اولار آناجان آه و افغانون سنون
صبر قیل هرچند وار درد فراوانون سنون
.
بو فنا دنیاده یتدی آخره عمریم منیم
سهل مطلبدور من ئولسم ساق اولا جانون سنون
.
راضیم مین یردن اولسون چاک بو سینم منیم
اولماسون چاک اوز الونله بیر گریبانون سنون
.
راضیم میداندا آخسون چشمه تک قانیم منیم
آخماسون بیر قطره اشگ چشم گریانون سنون
.
وار شهادت عهدینه اوّلده میثاقیم منیم
هم اسیر اولماقلیقا محکمدی پیمانون سنون
.
وار یری اولسون ذبیح اللهه بو فخریم منیم
سنده فخر ائت هاجره اکبردی قربانون سنون
.
شامه تک نوک جداده سیر ائدر باشیم منیم
ظلمت شام ایچره اولسون ماه تابانون سنون
.
کاکلیم گورسون اولوب چون شدّهٔ مرجان منیم
اولماسون آشفته گیسوی پریشانون سنون
.
.
#اکبریه_شهادت
#بو_ماجرادن_اولوب_آگه_آل_پیغمبر
#حقیر_خویی
#ترکی
#زبدةالاشعار