#عاشورا_گونی
.
.
مرحوم عابد تبریزی
.
.
بو گون کاخ ستم ویران اولوبدی
حقیقت عالمه اعلان اولوبدی
.
.
بو گون تفسیر اولوب آیات قرآن
بو گون تحکیم اولوب بنیان ایمان
بو گون شرح اولدی فصل شور و عرفان
جهان پر جلوۂ جانان اولوبدی
.
.
بو گون کفره دوروب ایمان مقابل
بو گون جنگ ایلیوب حقیله باطل
بو گون قاندان اولوب شرح مسائل
شهادت شارح قرآن اولوبدی
.
.
بو گون سیلاب تک قان اولدی جاری
که تا خاموش اولا ظلمین شراری
دوتا نور عدالت هر کناری
او دور حق نوری جاویدان اولوبدی
.
.
بو گون قرآن اولوب قانیله تذهیب
که ارواح و نفوس اولسونلا تهذیب
تاپوب اسلام و دین احکامی ترتیب
اساس کفر و کین لرزان اولوبدی
.
.
بو گون بیر عده جام عشق مستی
حریم بزم وحدت می پرستی
وئروبله باشه پیمان الستی
نثار راه جانان ، جان اولوبدی
.
.
حسین آئینۀ نور الهی
امام انس و جنّ و مهر و ماهی
ثبوت حکمت عدله کماهی
دلیل و حجّت و برهان اولوبدی
.
.
گوروب طغیان بیداد فسادی
بولوب ماهیّت کین و عنادی
ایدوب تحکیم بنیان رشادی
چراغ محفل خوبان اولوبدی
.
.
لوای فتح ووردی کربلایه
سالوب شور حسینی نینوایه
بو فتحیندن تمام ماسوایه
امیر و حاکم و سلطان اولوبدی
.
.
گوروب دانای اسرار ولایت
سو تک قان ایستوری نخل هدایت
او غم دیوانینه بدو و نهایت
اودور ئوز قاننه غلطان اولوبدی
.
.
نفوس پاکدن بیر عده یکرنگ
ووروب دامانینه اخلاصیله چنگ
منای عشقده یکسان هم آهنگ
تمامی شوقیله قربان اولوبدی
.
.
بو گون اوجه یتیشدی شور ایثار
اولوب بیر عدّه محو جلوۀ یار
تجلّی گاه وحدت بزم دلدار
او صحرا محفل عرفان اولوبدی
.
.
یتوب شوق لقا ، حدّ وفوره
هامی ذرّاتی تبدیل ائتدی شوره
اولان هر آشنا بزم حضوره
حریم قدسده مهمان اولوبدی
.
.
نفوذ ایلوب وفا خرد و کباره
گلوب آثاری فعلاً آشکاره
اولوب زندان رضیعه گاهواره
که جویای دم پیکان اولوبدی
.
.
ائله مردانه جان بذل ائتدی اصغر
که سالدی حیرته دنیانی یکسر
بویاندی قانینه گردون اخضر
او قان آزین هفت ایوان اولوبدی
.
.
بو گون هر سینه اولدی شرحه شرحه
اولوب آماج از بس ضرب و جرحه
بو فصلین احتیاجی یوخدی شرحه
که ذکر هر غمه عنوان اولوبدی
.
.
بو گون عشق رخ جانان ، اسیری
قبول ایلوب اولا توپراق سریری
نه عالمدور که عالملر امیری
وفایه تابع فرمان اولوبدی
.
.
ائله شوق لقا آلدى توانین
قتاله گوندروب آرام جانین
وئروبدور فدیه اکبر تک جوانین
که جسمی گل کیمی خندان اولوبدی
.
.
بویاندی قانه زلف عنبر افشان
قاریشدی خرمن مشگیله مرجان
نجه بیر زلف هر تل رشتۀ جان
صبا اوندان عبیر افشان اولوبدی
.
.
دوزولدی رشته مژگانه ژاله
دولوبدور چشم مستی چون پیاله
او گوز که رشگیدی چشم غزاله
محاط سایۀ مژگان اولوبدی
.
.
دوشندی سنبل تر عبهر اوسته
سحاب تیره گویا اختر اوسته
یاتوب مژگان صفی چشم تر اوسته
فروغ مردمک پنهان اولوبدی
.
.
قالوب بیر ایله گوزلر گردشیندن
که گردونی سالاردی چرخشیندن
جهان بی قدر او گوزلر ارزشیندن
نگاهیندن ملک حیران اولوبدی
.
.
گوتورموش گوز جهاندان چشم شهلا
اولوب عکس دله محو تماشا
بو حالتده ندور دنیا و عقبا
که منظر جلوۂ جانان اولوبدی
.
.
غبار ره اوتوردی سنبل اوسته
سالوب گون شائبه گویا گل اوسته
گوروب تا قطره قان اول کاکُل اوسته
چمنده شرمگین ریحان اولوبدی
.
.
صبا اسدی او زلف مشگ فامه
آپاردی عطر جان سمت خیامه
آلوب بو عطری تا لیلا مشامه
جنون عشقه همدستان اولوبدی
.
.
تاپوب رنگ شفق قانیله مهتاب
سولوب سوز عطشدن لعل سیراب
گنه بو لعلدن یاقوت نایاب
دوشوبدور جلوه دن ارزان اولوبدی
.
.
نگارین چهره سی اولدی ارغوانی
شفقدن باش وئروب برق یمانی
یره نقش اولدی شور زندگانی
فلک سیرینده سرگردان اولوبدی
.
.
سحر نوری شفق آلوده پرده
باشی اوستونده گون حالی فسرده
دل ماه و ستاره گلدی درده
خجل ئوز دورینه دوران اولوبدی
.
.
دوشوب زلفینده مین آهو کمنده
عقیق لعلى یوخ هرگز یمنده
دل آرا حُسنونه صدقیله بنده
هزاران یوسف کنعان اولوبدی
.
.
قد موزونی غوغای قیامت
قیامیله قیامتدن علامت
خرام نازیله بیر سرو قامت
طراز سرو سروستان اولوبدی
.
.
اولا گر گوش جان اسراره حسّاس
فراتین نغمه سیندن ایلر احساس
که هر دم سسلنور عباس عباس
دل دریا غمیندن قان اولوبدی
.
.
بانوب چون شمع نار اشتیاقه
دوشوب شوق لقادن احتراقه
گلوب شور حجازیله عراقه
نوادن پر او دشتستان اولوبدی
.
.
امید ما سِوالله فرد و تنها
دایاندی مرکز میدندا تنها
فروغ و جذبۀ عرفان سراپا
وصاله عشق پابندان اولوبدی
.
.
گیدوبلر یکّه تازان سبُک سیر
فنا فی الله اولوبدور زمرۀ خیر
قالوب جانان و جان بِا الجُمله لا غیر
که جان جانان و جانان جان اولوبدی
.
.
هامی ذرات عشق یاره تسلیم
جهان بیر جلوۀ جانانه تقدیم
نه کام خشک نه کوثر نه تسنیم
که جام عشقدن ریّان اولوبدی
.
.
یاخونلاشدی زواله مهر خاور
پدیدار اولدی شور روز محشر
اولوب آئینۀ امکان مکدّر
شفق ابر مه تابان اولوبدی
.
.
تجلّی ائتدی امّید شهادت
تحقّق تاپدی امّید شهادت
مه و خورشید و ناهید شهادت
سپهر عشقده رخشان اولوبدی
.
.
حسین ئولدی شهادت زنده قالسون
شهادت شیوه سی پاینده قالسون
حقیقت جلوه سی تابنده قالسون
بو سوز قاندان بو گون عنوان اولوبدی
.
.
یوزه عابد روان ائت اشگ عینی
نشان وئر شور شاه مشرقینی
سنه دم وئردی «غشیّ» و «حسینی»
بو نوحه زینت دیوان اولوبدی
.
.
#عابد_تبریزی #ترکی
نظر دهید