تنور خولی
.
#زبدةالاشعار
.
: @nohe_torki
.
حسنی تبریزی
.
بیگانه اولان محفل جانانه دولانماز
بیگانه دی بو محفله بیگانه دولانماز
.
بیر محفل اولا شمع اولا پروانه ده واردور
خاموش اولا گر شمع اورا پروانه دولانماز
.
گل شاخه سینه وار هوسی بلبل زارین
گل اولماسا بلبل که گلستانه دولانماز
.
یعقوب اگر قالماسا بیت الحزنینده
وصل اولماسا یوسف داخی کنعانه دولانماز
.
معشوقی پناهندۀ اغیار اگر اولسا
اغیار ایوین عاشق دولانی یا نه دولانماز
.
زهرا یارالی باشه اگر اولماسا عاشق
چوللرده مصیبتله بو عنوانه دولانماز
.
تاپدی یارالی باشینی مطبخده گوروبدی
کول سدّ ایلیوب قاننی هر یانه دولانماز
.
سسلندی حسین دور دولانوم باشوه یوخسا
ایو صاحبی دورِ سرِ مهمانه دولانماز
.
پیمانه کیمی دولدی گوزوم اشکیله گوردی
خشکیده لبون دورینه پیمانه دولانماز
.
اشکیم توکولور بو قوریان لبلرون اوسته
ایسلانماسا سو بو لب و دندانه دولانماز
.
عشق اولدی سبب عاشقی چولدن چوله سالدی
صحرالرى اوز باشینه دیوانه دولانماز
.
باشون آناوی مست ایلیوب کوفیه چکدی
وار رهبری بیجا یره مستانه دولانماز
.
کول مرهم اولوب یاره سینه یاره لی باشون
بو غمده آنان اشکی اوغول قانه دولانماز
.
حسرتله باشا ورماغمون علّتی واردی
زهرا نجه بو غمده یانا یانه دولانماز
.
پیچ اولدى سر انگشت مصیبت سرِ زلفه
چوخداندی گوروب آغ ساچما شانه دولانماز
.
گه کرب و بلاده گنی من کوفه ده یانّام
اصلا یوخی بو دیدۂ گریانه دولانماز
.
بو کوفه ده من شام غریبانوه گلدیم
زینب نیه بو شام غریبانه دولانماز
.
وار عذری یانان خیمه ده قیزلار آراسندا
مرهم داخی اول سینۀ سوزانه دولانماز
.
عشقین «حسنی» ایلدی آزادیله توأم
قبرین او شهین گورمه سه رضوانه دولانماز
.
.
#تنورخولی_حسنی_تبریزی
#بیگانه_اولان_محفل_جانانه_دولانماز
#ترکی
.
#زبدةالاشعار
.
: @nohe_torki
نظر دهید