در ولادت سبط اکبر ، امام حسن مجتبی علیه السلام
#گریز به #حسنیه_شهادت
.
.
مرحوم انور اردبیلی
.
.
تقدیس ایله ای خامه ازل ذات الهی
ایجا ایلیوبدور کروی مهریله ماهی
قدرتله یاراتمش نِعَم نامتناهی
نورانی پگاهی آیورور لیل دجادن
نومید ایلمور کافریده خوان رجادن
.
.
مین نابغه فکر ایلسه بو باره ده باهم
بیلمزله ندور ذات خداوند معظّم
اندیشه لری لنگ اولور آخرده مسلّم
انساندا توان یوخ تانیا ذات خدانی
حاشا یتیشه دایرۀ باقیه فانی
.
.
هر بنده ایدور خالقه اقرار شهادت
واجبدی صداقتله ایده ذکر و عبادت
دورد فصلدی هر اون ایکی آیدان عبارت
قرآدا ویروب رب توانا بو پیامی
هر آیدان ایدوب پربرکت ماه صیامی
.
.
ماه رمضان ماه شکوفائی قرآن
ماه رمضان ماه فروزان فر قرآن
ماه شرف و تزکیۀ انفس و غفران
ذکر ایله اگر واردی گوزون معنوی پایدا
هر سجده نون اجری بیره یتمیشدی بو آیدا
.
.
دست ازلی پهن ایلیوب خوان ضیافت
مهماندی همان سفره ده ارباب اطاعت
هر لحظه ده باران کیمی نازلدی کرامت
ارزانی ایدوب رخمتینی حضرت باری
بو آیدی نیایش ایده نون ماه بهاری
.
.
سفره سالینار موقع مهمانی گوروبسوز
متننده اولور نعمت الوانی گوروبسوز
زیبا بزه نور سفرۀ احسانی گوروبسوز
عین وسطینده قویولار دسته قزیل گول
چون گلدی ضیافتده گوزه للیک لره سمبُل
.
.
بو آی که ضیافت ایلیوب حیّ تعالی
ارزنده سوزوم وار ایدورم شعریله انشا
حق ایستدی ئوز سفره سینی ایلیه زیبا
مهمانلاری شامل ایلیوب لطف عمیمه
گول تک حسنی زیور ایدوب خوان عظیمه
.
.
نصف رمضان فاطمه نون بی مَثَل اوغلی
ایجاده گلوب ایلکی عزیزی اَوَل اوغلی
بذل ایتدی صفا گوللره گولدن گوزل اوغلی
عطری او گولون عالم امکانی قویوب مات
زهرا گولونه رشک ایلدی گلشن جنات
.
.
تشریف گتوردی نوه دیدارینه طاها
حق بین گوزی مولا ایوینی گوردی مصفّا
زهرایه سلام ائتدی اولوب حالینی جویا
فرمایش ایدوب کاش خدیجه ساق اولیدی
من تک آنوین ساغر آمالی دولیدی
.
.
تک سن گوزلیم حیف اولا بو موقع دشوار
هر حامله فراغ اولا لازمدی پرستار
حامی اولا سندن نه باجون وار نه آنون وار
گلدیم سوروشام حالیوی ای مونس حورا
مندن تزه مولودیوه تبریک اولا زهرا
.
.
پیغمبر خاتم مَلَکِ مِلکِ تجرّد
شخص اول عالم عرفان و تعبُّد
خاتون کبیره ایدوب اظهار تفقُّد
بحرین نجابت گُهرین آلدی قوجاقه
منضَم ایلدی غنچۀ نوبازی بوداقه
.
.
دقتله ایکی دیدۀ شهلاسینه باخدی
تحسین ایلدی حُسن دل آراسینه باخدی
هم صورت و هم عالم معناسینه باخدی
فرمایش ایدوب پیکرۀ صلح دوغولدی
صلحیله ویرن دینیمه رونق بو اوغولدی
.
.
شایسته بالا تحفۀ ذات ازلی دور
آیدان یوزی آیدین افق صبح جلی دور
زهرایه جگر بند ولیعهد علی دور
حلمیم بو بالامدا وار امیدیم علن اولسون
گویچکدی ئوزی آدی گرکدی حسن اولسون
.
.
هر کیمسه محبّ اولسا بو مولود سعیده
بیلسون ئوزونی صاحب ایمان و عقیده
اقرار ایدورم منده محبّم او مریده
واردور بو بالامدا بیلورم من نه لیاقت
دشمندی منه کیم حسنه ائتسه اهانت
.
.
قرخ یدّی ایل عمر ایلدی دنیای فناده
بی مثلدی زهد و ورع و ذکر و دعاده
انگشت نمائیدی کرامتده سخاده
سالمیشدی گوزل خصلتی آوازه حجازه
دائم آچوقیدی قاپوسی اهل نیازه
.
.
هم رزمیدی مولائیله هنگام ستیزه
دعواده آپارسیدی الین خنجر تیزه
ایلردی صف دشمنی مجبور گریزه
شمشیر کجی اژدر آتش دهن اولدی
جنگ جملون فتحینه باعث حسن اولدی
.
.
صلحی که معاویه ایله ایلدی امضا
ایستوردی حفاظتده قالا مکتب طاها
کیم وئرسه امام حسنه نسبت پروا
ناپخته دی تابع اولوب اندیشۀ خامه
توهین ایلیوب ساحت والای امامه
.
.
صلح حسن و جنگ حسین ابن پیمبر
بیردور ایکیسی اجر و فضیلتده برابر
هر قارداشا بیر نوعی وظیفه ایدی مقرّر
جان شیشه لری دگمیشیدی ذرّیده سنگه
وئرمیشدی تعهد بیری صلحه بیری جنگه
.
.
نصف رمضاندور بو گجه لیلۀ شادی
درک ایلمشوک مجلس پر فیض مرادی
روح حسنه آند وئرون ربُّ العبادی
اعطا ایلیوب خضره او که آب حیاتی
وئرسون بیزه ده بو گجه غفران براتی
.
.
یا ربّی بو حضار الی بوش بنده لروندی
بیر عدّه گنهکاریدی شرمنده لروندی
درگاهیوه صدقیله پناهنده لروندی
یا محسن مطلق حسنه سن بیزی عفو ائت
مظلوم و غریب وطنه سن بیزی عفو ائت
.
.
#گریز به شهادت
.
.
یا رب دم آخر گوئرن لبلره خاطر
یا رب جگری پارچالانان رهبره خاطر
تابوتیده اوخلاره نشان پیکره خاطر
شرمنده گتورمه بو احبّانی معاده
هر گوز حسنه آغلاسا آغلاتما جزاده
.
.
یارب حسنون بیر کسه آزاری یوخیدی
صلح ائتمیشیدی نیّت پیکاری یوخیدی
شیرین سخنیدی آجی گفتاری یوخیدی
غم همدمیدی حجتیوه هر نفسینده
قُمری کیمی باغلیدی قنادی قفسینده
.
.
یارب حسنه منزلی بیت الحزن اولدی
اوز شوهرینه همسری قاتل ندن اولدی
آغ رنگ گولون رنگی دونوب یاسمن اولدی
جُعده نیه اوز یارینی بیگانیه ساتدی
زهرا ئورگین داغلادی زهری سویا قاتدی
.
.
یارب حسنه دشمنی تنگ ایلدی دهری
همشهریلری دل یاراسی وردیلا قهری
میل ائتدی شیرین سو عوضینده آجی زهری
زهرین اثری عارض زیباده گوروندی
افعی ووران اشخاص کیمی صاق صولا دوندی
.
.
تأثیر ایلدی زهر جفا جوهری قاندا
ایجاد شرر ائتدی عروق و شریاندا
مسموم ئورگین سوزشی آرتدی ضرباندا
هر بیر نفسی آتش اولوب چخدی جگردن
حاشا دیدی سالم قوتارام من بو خطردن
.
.
قینر سو کیمی طاق جبینیندن آخوب تر
فکر ایله او حالتده حسن گور کیمی سسلر
امداده رشیده باجیسین سسلدی پی در
آچ گوزلریوی باجی غریب وطن ئولدی
زینب خبرون یوخدی خبردن حسن ئولدی
.
.
قارداش سسینی آلدی باجی دوردی هراسان
گوردی حسنون لبلرینی قانیله الوان
قول بوینونا سالدی دیدی زینب سنه قربان
رنگون گوئروب آتش تبده چوبالورسان
تیترور بدنون گاه اوتوروب گاهی دورورسان
.
.
ای حلقۀ پر قیمت عرفانه گوزل قاش
سن بو حالا قالمیدون ئولیدی باجون ایکاش
دریا کیمی دردون واردیدی قلبده قارداش
علت ندی آشفته گزورسن اطاقوندا
کول باشیمه قان لخته لنوبدور دوداقوندا
.
.
#حسنیه_میلادیه
#تقدیس_ایله_ای_خامه_ازل_ذات_الهی
#حسنیه #انور_اردبیلی
#صدای_عاشورا_انور
#ترکی
#زبدةالاشعار
.
نظر دهید