زبانحال جناب رباب (س) با حضرت علی اصغر (ع)
.
.
.
#سبک_ای_باشی_سرنیزده_معراج_ایدن
مشابه
.
.
.
مرحوم نجمی تبریزی
.
.
.
توکمه بو قدری یوزه اشک تری
آغلاما صبر ایله بالام آغلاما
بیر بیله یاندیرما بو غم پروری
آغلاما صبر ایله بالام آغلاما
خسته بالام آغلاما
آغلاما چوخ آغلاما
تشنه بالام آغلاما
آغلاما چوخ آغلاما
..
..
..
..
اوچ گیجه گوندوزدی فغان ایلوسن
گوز یاشی رخساره روان ایلوسن
باغریمی تشنه بالا قان ایلوسن
جاری ایدورسن یوزه اشک تری
خسته بالام آغلاما
آغلاما چوخ …
..
..
..
..
آغلاما بیر بیله تلاش ایلمه
دلده نهان سرّیمی فاش ایلمه
سینه می بیربیله خراش ایلمه
آغلیوب آغلاتما منِ مضطری
خسته بالام آغلاما
آغلاما چوخ …
..
..
..
..
توکمه یوزه گوز یاشیوی سو کیمی
چالما قناد یاره لی تیهو کیمی
آز مله آخر ملر آهو کیمی
سو تاپا بلمم گزرم چوللری
خسته بالام آغلاما
آغلاما چوخ …
..
..
..
..
من شرر آهیوه یاندیم علی
رنگ مصیبتله بویاندیم علی
خیمه لری هر چه دولاندیم علی
گوردوم اولوب دور آنالار ازبری
خسته بالام آغلاما
آغلاما چوخ …
..
..
..
..
آتش درد و غمه وورما اتک
بایشمه کول توکدی بو چرخ فلک
وار بیر آنا گور منِ بیچاره تک
سو دیه قوینوندا قالا اللری
خسته بالام آغلاما
آغلاما چوخ …
..
..
..
..
گوزلریمون قیمتی اولسا اگر
سو سنه آللام من خونین جگر
لیک نه چاه ایدیم ای سود امر
یوخ گوزومون نوری گوزه مشتری
خسته بالام آغلاما
آغلاما چوخ …
..
..
..
..
حالیوه باخدوقجا اورک داغلارام
سس چکرم غنچه بالا آغلارام
چاره سیزم اللریوی باغلارام
کوسمه گذشت ایله بو بی یاوری
خسته بالام آغلاما
آغلاما چوخ …
..
..
..
..
قول قانادی قوش کیمی بسته بالا
آز ال ایاق چال الیم اوسته بالا
ایلمه خسته منی خسته بالا
بیر بیله یورماز بالالار مادری
خسته بالام آغلاما
آغلاما چوخ ….
..
..
..
..
آغلاما قوی بیر دولانیم باشیوا
منده قاتوم گوز یاشی گوز یاشیوا
یوخدی دییم من علی قارداشیوا
گل علی اکبر گور علی اصغری
خسته بالام آغلاما
آغلاما چوخ …
..
..
..
..
آغلاما چوخ باغلیدی سو یوللاری
سدّ اولونوب صاقلاری هم صوللاری
دوشدی سو اوسته عمووین قوللاری
اممه سوسوزدان قوریان لبلری
خسته بالام آغلاما
آغلاما چوخ …
..
..
..
..
قالمیشام حیرتده اوغول وای دیوم؟
ناله ایدوم شوریله ایوای دیوم؟
یا الیم اوسته سنه لایلای دیوم
یا گتوروم شیونه عالملری
خسته بالام آغلاما
آغلاما چوخ …
..
..
..
..
ای ثمر گلشن آل عبا
صالح و نجمی سنه ایلر نوا
سالکیلن اولدیلا تا همصدا
یازدیلا یاندیدیلا چوخ دللری
خسته بالام آغلاما
آغلاما چوخ …
..
..
..
..
#اصغریه #نجمی_تبریزی
#اصغریه_شهادت
#توکمه_بو_قدری_یوزه_اشک_تری_آغلاما_صبر_ایله_بالام_آغلاما
#ترکی
#زبدةالاشعار
نظر دهید