خروج از مدینه
زبانحال حضرت صغری (س)
.
#زبدةالاشعار
.
: @nohe_torki
.
#سبک_زینبم_جان_اوستیم ….
.
سیفی اردبیلی
.
تک قویوب یارب بو یثربده منی ائللر گئدور
هم بی بیم زینب گئدور هم قارداشیم اکبر گئدور
.
.
من مریضه بیر قیزام جان دردی همدمدور منه
درد هجران هر نه دن دشوار و أعظمدور منه
روزگارون بیلمورم مهری نیه کمدور منه
من نفسدن دوشمشم آرخام ائلیم یکسر گئدور
.
.
اولمشام خانه نشین مرغان بی شهپر کیمی
غم، دل بیماریمی هردم یارار نشتر کیمی
دوشمشم گوزدن کأنّه بیر سنق گوهر کیمی
کُنج محنتده پریشان آغلورام زرگر گئدور
.
.
بیر زمان بخت اولدوزوم سیّار برج نازیدی
طایر عزّت گئجه گوندوز منه همرازیدی
کاروان عمریمون چاووشی خوش آوازیدی
باتدی اقبال اولدوزوم افسوس او خوش گونلر گئدور
.
.
قوزانور نای جرسدن دمبدم صوت رحیل
آیریلور بیت امانیندن خلیل ابن خلیل
هامی عازمدور فقط من قالمشام زار و علیل
دردیمون درمانی الدن ایندی سرتاسر گئدور
.
.
شعله ی آهیم ائدر دل مجمرینده پیچ و تاب
کاسه ی چشمیم توکر دامانیمه نار مذاب
درد الیندن سویلرم هر دم من ای مالک رقاب
رحم ائله برج وقاریمدن مه انور گئدور
.
.
سن گواهی سن منیم سینمده سوز و سازیمه
دست بیداد محن اولموش مسلّط نازیمه
جغد غم خیمه ووروب کاشانه ی اعزازیمه
باشیم اوستن سایه ی لطفین کسوب دلبر گئدور
.
.
بیر طرفدن درد الیندن ایلیوب قلبیم ورم
بیر طرفدن آیریلور مندن بنات محترم
دردیمون درمانی اکبردور او گئتسه نیلرم
اکبریم یوخ بلکه روحیمدور آچوب شهپر گئدور
.
.
کاروانسالار عشقه ایلورم چوخ التجا
التجای قلبیمه ائتمور بابام بیر اعتنا
بیلمورم علت ندور من سیز دوشور ائللر یولا
مهربان عمّم، عموم قارداش گئدور خواهر گئدور
.
.
ایلرم حسرتله جاری دامنه من گوز یاشی
کوره ی آتشفشانه بنزیوب قلبیم باشی
کاش اولیدیم منده بو نازلی قطارون یولداشی
اختر بختیم گوریدوم یاریلن یاور گئدور
.
.
اولمشام بو صحنه دن غرق شرار اضطراب
آز قالور اولسون هامی اهل سفر پا در رکاب
همسفر دور شیر خواریلن بو گون حتى رباب
ناظرم هجرانه اما ائتمورم باور گئدور
.
.
#خروج_مدینه_سیفی_اردبیلی
#حضرت_صغری
#تک_قویوب_یارب_بو_یثربده_منی_ائللر_گئدور
#ترکی
.
#زبدةالاشعار
.
: @nohe_torki
نظر دهید