زبانحال سیف بنی هاشم ،حضرت مسلم (ع)
.
.
امیر سفیدی اقدم اهری(عاذل)
.
.
تیز ویریب خزان گلستانیوی قالمادی طراوت عم اوغلی جان
اولین گولون دوشدی شاخه دن اوندا یوخدی نکهت عم اوغلی جان
.
.
قوندی امتین آشیانیمه فوری آشیاندان داغیلدیلار
اولمادی پر اوچسونلا گویلره اوجِ کهکشاندان داغیلدیلار
چوخ دیدیم آقام تک دی گیتمیون عاقبت یانیمدان داغیلدیلار
بی سپاهِ عشقم قالان فقط بیر وفالی عورت عم اوغلی جان
.
.
نیلیوم بو شهر ایچره یالقیزام یادیمه دوشوب شاهزاده لر
گوزلریندن اولسون ایراق سنون تکلییب منی سست اراده لر
بیلمیسن نه حاله سالوب منی هم سواره لر هم پیاده لر
اوخشامیر عم‌اوغلون عم اوغلووا اولدی چوخ جسارت عم اوغلی جان
.
.
یوخدی بیر نفر حالیمه یانان ،اوز سفیریوم اوخشورام سنه
داش وران ویرور ، اود توکن توکور، بی حیا جماعت گولور منه
بیر نفر دیمور ورمیون بونی رحم ایدون چکون دارالایمنه
منده سن تک ایله آدامسیزام گورسنور شباهت عم اوغلی جان
.
.
کوفه ده اولوب جامه لر ریا ، مکر و حیله باشدا عمامه لر
نامه نی یازان وقته کوفیان کاش سنیدی اللرده خامه لر
ایمدی ایلیوب شکلنی عوض نیزه ،اوخ، قلج دی، او نامه لر
اوستوه یاغار قتلگاهیده نامه لر نهایت عم اوغلی جان
.
.
یاز رضایتون یوللا مسلمه آز قالور که اولسون ایشیم تمام
بزم عامه گیتسم ده قوخمادیم گرچه گورسنوب اوردا ازدحام
ویردیلر ایچم ایچمدیم سودان ،ویرمیشم سویا تیز بیله پیام
بیر غریبون آخ خیمه گاهنه ایله بیر گون همت عم اوغلی جان
.
.
آز قالور عم اوغلون عم اوغلی جان کوی عشقه تا رهسپار اولا
خوشدی گلشنینده هَزاره نون دردی آرتا بلکه هِزار اولا
حیف دور ولی میزباننه میهمان بیله سنگسار اولا
سنده حاضر اول چون قوناقیسن، واردی هتک حرمت عم اوغلی جان
.
.
یار ، یاره خاطر یارالیدی، وار گوزوم نقدر اولسا یاره ده
عاشق هر بلایه بلی دیر اولماز اولسون هیچ فکر چاره ده
زینب عم قیزیم ناقه ده گزر ، سن جداده، منده قناره ده
عشق اولا بو بولگی بولن پایا اوندا وار حلاوت عم اوغلی جان
.
.
گور یتوب ایشیم کوفه ده هارا، قانلی لار آراسندا یالقیزام
اوخشادی عم اوغلی عم اوغلیا سن کیمی عم اوغلی آدامسیزام
شکر اولا بو قوللار بدن ده دی دوشمیوب دیم منده قولسوزام
وای او قولسوزون حالینه چکر نهرین اوسته عسرت عم اوغلی جان
.
.
شکر اولا بو عشقی باشا ویریب ریزه خوارم ایللردی خوانیوه
مین بهار و مین رنگ و بو سنون آرزو واریم گلستانیوه
سسلورم که قربان دی بام دن مین بیله جوان نوجوانیوه
آغلورام عباده یاتانیوه عالم محبت عم اوغلی جان
.
.
باملردن اود بیر باشا یاغور ، باش نه باش، دوشوب اشتیاقیوه
اولمادیم یانندا نه چاره وار هی دوشم سنون ال ایاقیوه
کوفیه گتورمه رقیه نی ، قویما اورگنه یا قوجاقیوه
خشتِ خامه باش قویسا اینجیر، چوخ اولار اذیت عم اوغلی جان
.
.
آز قالور که بیر زهریلی اوخی قلب عالمه حرمله ساچا
آز قالور تیکانلخدا قیزلارین بیر بیره دگوب قورخوشوب قاچا
ایستمه دی اصغر آناسینه دیلسیزین بو تیزلخدا دیل آچا
آچسا دیل سو ایستر، اولار یقین قِیننه قیامت عم اوغلی جان
.
.
گلمگین اگر اولسا کوفیه کهنه سعی ایله پیرهن گتور
یغ باشا بیر عده آدامسیزی ساچ یولان هم اشکین توکن گتور
ایمدی که گلورسن نه چاره گل، الده لااقل بیر کفن گتور
بوریا یاراشماز یارالیا حیف دور او قامت عم اوغلی جان
.
.
” عاذل” آدلی بیر نوکرون شها بستره دوشوب آختارور طبیب
سن طبیب سن ،نوکرین قالیب بسترینده بی صبر و بی شکیب
هی باخور یولا آختارور سنی اوز ایوینده تا اولماسین غریب
گل ایکی عم اوغلی گیداخ اونی ایلیاخ عیادت عم اوغلی جان
.
.
#مسلمیه #مسلمیه_شهادت #اقدم_اهری #ترکی #زبدةالاشعار
نظر دهید