استمداد حضرت قاسم (ع)
..
..
مرحوم شهاب تبریزی
..
..
جان یتوب لبلریمه تیز گل عموجان ئولورم
گل گوروم گل یوزیوی جان ویروم آسان ئولورم
تیز گل عمو جان ئولورم
..
..
خدمتیمده ایلمزدیم عمو البّته قصور
چوخ چالشدوم که اولام بیرده شرفیاب حضور
ممکن اولمادی منی قویمادی بوقوم کَفور
قدرت و قوّه گیدوب قالمیوب امکان ئولورم
..
..
بلوسن من نه قدر طالب دیدارم عمو
باشلانوب کعبۀ وصلون یولی ناچارم عمو
تیکمشم گوز یولووا گوزلَرَم آغلارام عمو
انتظاروندی سنون دیدۂ گریان ئولورم
..
..
یتشوبدور سنه چوخ درد سریم بُلّم أؤزوم
عرض حال ایتمگه بیرده عموجان گلمور أوزوم
نه اوزوم وار دیمگه گل و نه هجرانه دوزوم
بو قدر بول ویرورم حسرتیله جان ئولورم
..
..
ویرمیم فکر ایلیده یم زحمتیمی بیرده سنه
آخرِ عمریدی چون خیلی گران گلدی منه
عمو جان خوش گلی بو گلمک امام حسنه
گل ایدوم مقدمیوه جانیمی قربان ئولورم
..
..
جان فدا سن کیمی قربانلارینی سان ویرنه
باشی اوسته دورا لازمدی که قربان ویرنه
سو ویرللر عموجان شرعیده هر جان ویرنه
سو کنارینده اؤزون شاهد اول عطشان ئولورم
..
..
امر قیل عمّه لریم ایمدی جگر داغلیالار
چاک ایدوب سینه لرین باشه قرا باغلیالار
دئ اطاقیمده منیم بیر یغشوب آغلیالار
والدم باشین آچوب ایلیه افغان ئولورم
..
..
اودلانوب طایر روحیم عمو صبریم آلینوب
باش سنوب قانیم آخوبدور ال ایاقیم بویانوب
یتیشوب پیک اجل ای عمو حالیم دولانوب
جان گیدوبدور آپارور ایمدی منی قان ئولورم
..
..
بر یارا دگدی باشیمدان اوتوروبدور قاشما
آخوب اوز باشنا قانیم قاریشوب گوز یاشیما
قویموشام یاره دگل تاج شرفدور باشما
بو شرافتلن اولوب لایق جانان ئولورم
..
..
باغلانوب سو یولی صد شکر آچلوب راه نجات
یاره دَیدوقجا ویرور جسمیمه بیر تازه حیات
ایچمرم گر دوتا دنیا یوزینی آب فرات
تشنۀ جام وصالم گل عموجان ئولورم
..
..
ای کلیم الله ثانی اؤزیوی طوره یتور
تازه بیر شورشی بو وادی پرشوره یتور
مقصدیم سَنسَن ازلدن منی منظوره یتور
وادی عشقده گل گور نجه حیران ئولورم
..
..
او وجودیکه «شهاب» عیشده دم ویردی سنه
اونا الهامدی سوز مطلق او دم ویردی سنه
آلدى فیضین او که بو سوزده قلم ویردی سنه
جان یتوب لبلریمه تیز گل عموجان ئولورم
..
..
#قاسمیه #شهاب_تبریزی #قاسمیه_شهادت #ترکی #زبدةالاشعار
نظر دهید