جهاندا لفظ عشقیلن واریمدی الفتیم منیم #زینبیه_عینی_فرد

حالات حضرت زینب سلام الله علیها
.
.
.
حاج غلامرضا عینی فرد زنجانی
.
.
جهاندا لفظ عشقیلن واریمدی اُلفتیم منیم
بو عشقی بولمدیم ندور چوخالدی حیرتیم منیم
.
حکیملر یازوبدولار بو یولدا شعر و نثرلر
اولار قالیب وله چوخی، غلطدی دعوتیم منیم
.
دینمیوبدی عاشقم او عارفان حق شناس
نجه من ادّعا ایدوم هانی لیاقتیم منیم
.
عصای آهن الده و ایاقدا کفش آهنی
گزر مثلدی عاشقی یوخومدی جرئتیم منیم
.
فنا عصا و باشماقی اولار طریق عشقده
دیر باشا یتیشمَدی گوزل طریقتیم منیم
.
طریق عشق سالکی ، گرکدی کوه صبر اولا
دیر وصال یاریدور مرام و نیّتیم منیم
.
لسان غیب حافظین اوخی کتاب عشقینی
اوزنمرم او بحریده واریم ارادتیم منیم
.
یازار که عشق سهل اولوب صورا سالوبدی مشگله
چتیندی عشق و عاشقی چوخالدی وحشتیم منیم
.
بو راه پرخطرده کیم نشان ویروبدی باشینی
باشی بدنده قالمیوب یقیندی صحبتیم منیم
.
طبیعته باخار بشر اولاردان عشق ئورگَشَر
واریمدی بو زمینه ده اوزون حکایتیم منیم
.
تاپار گل اوسته بلبلی چمنده بهرینه گیدر
دیر بولارجا عشقده اولار صداقتیم منیم
.
قانادلارین تکان یارار گل اوسته بلبل اُفّ دیمز
دیر بو راه عشقدور واریمدور عادتیم منیم
.
بیریسی شمعدن تاپار رموز عشقی سس گلر
واریم جهاندا عشقده بر آیری شهرتیم منیم
.
رگ حیاتی قلبیدن گورر یواش یواش یانور
دیر گرک ایشیق ویره نگاره طلعتیم منیم
.
شب فراق یانمیشام ایشیقلیقا چخارتمیشام
یانان منم نه شمعدور چخور حرارتیم منیم
.
نخ اولماسا و مایه ده چتندی نور قوزانا
ئورگی عاشقین یانار بودور مهارتیم منیم
.
دیلینده چوخدی دم وران من عاشقم ، من عاشقم
یالان دیور او قومیدن واریم بَرائتیم منیم
.
حسینون عاشقی گرک عملده گورسه ده اوزون
دوز اولسا نوکرم اونا آزالماز حرمتیم منیم
.
حسینون عاشقی اولار متین و باوقار و پاک
دیر حسینه زینبه واریمدی نسبتیم منیم
.
حسینون عاشقی اولار همیشه حق مدافعی
دیر بو یولدا گتسه ده گیدوبدی مکنتیم منیم
.
حسینون عاشقی بلا گلنده داغ کیمی دورار
یخانمیوبدی سیل و یل واریم درایتیم منیم
.
سوزون یغوم ایاقینی یوخومدی قصد موعظه
بیر عاشقین باشیندادور یانق کتابتیم منیم
.
بو گجه شهر شامیده خبر واروزدی کیم ئولور
آدین دیله گتورجاقین پوزولدی حالتیم منیم
.
بو گجه شهر شامیده رقیه سسلور عمه وای
منیم کیمی غریب ئولور بو تاج عزتیم منیم
.
اجل خزان یلین چالور گل پیمبر اوستنه
الی ئورکده سسلنور یتشدی رحلتیم منیم
.
هایاندا قالیمسان حسین آدامسیزام جان ئوستیَم
یورولمیشام دارخمشام قوتاردی غربتیم منیم
.
او زینبم که یخمشام یزیدی اقتداریدن
اوزونی کاخ ظلمینی یخوب صلابتیم منیم
.
او صاحب بیان سنی هرایه سسلننموری
نفس دوشوب شماریه آزالدی قدرتیم منیم
.
ساچیم آغاردی قامتیم کمان اولوب تانینمارام
پوزولدی باد ظلمیلن گوزل طراوتیم منیم
.
سکوت آچوبدی منظره مجّسم اولدی گوزلره
دوشوبدی شمر و خنجره گنه نظارتیم منیم
.
باشیوی قاتلون کسیر او لحظه قاره یل اسیر
باجون ایاق یالین قاچیر اولوب قیامتیم منیم
.
نه نوعی تلی آشمیشام ایاقیوه دولاشمیشام
سالوبدی قاتلون یره سینندن هیبتیم منیم
.
آنام سسین ایشتمیشم او وای دیوب من آغلادوم
او حاله لشگر آغلادی وای اولدی قسمتیم منیم
.
حسینیم ، آتش محن ایله اریتدی جسمیمی
گورن دیر که یرده نقش اولوبدی قامتیم منیم
.
گوزوم قالوبدی یولدا گل بو پیکریمه سایه سال
اولوم سن، اوندا من، بودور ئورکده حسرتیم منیم
.
گورن دیسون حسیندی بو دوشوبدی یرده سایه سی
خدایه شکر وار سنه عجب شباهتیم منیم
.
او ساربان کسن الون قوی ایندی سینم اوستنه
ئورگیم اضطراب ایدور پوزولدی صورتیم منیم
.
یادیمدا وار وداعیده اسوردی دیزلریم حسین
الین قویاندا قلبمه آزالدی رعشتیم منیم
.
آنام کیمی باجوندا گل الی دیواردا یول گیدور
ننه می یادیمه سالار بو حال هیئتیم منیم
.
سینمده قانلی کوینگون منه امید بخشدور
معاملات عشقیدن بو اولدی ثروتیم منیم
.
ایکی جهانی ویرسه لر بو کوینگوی ویرمرم
قاریشدی قاننه نچه ایل اشگ حسرتیم منیم
.
اوشاقیدوم آنام اونی قاپی یاناندا باشلادی
توخودی آغلادی دیدی یتوب شهادتیم منیم
.
ویریب منه دیدی حسین گینده اوپ بوغازینی
مواظب اول قزیم سنه بودور امانتیم منیم
.
سویاندا پیکرون قوشون دوشوبدی الدن اللره
مصمم اولدوم آلماقا قزیشدی غرتیم منیم
.
ایلیم داغیلدی اگنمون قراسینی چخارتمادیم
تمام غملره اولوب حق اوسته شرکتیم منیم
.
نفس دوشوب تلاطمه گل ای عزیز فاطمه
ویر آیرلقا خاتمه قوتاردی طاقتیم منیم
.
رواجی زینبیّه نون خلوص هیئتینده دور
عیاندی «عینی فرده » وار حسین عنایتیم منیم
.
.
#زینبیه_مدح
#زینبیه_شهادت
#جهاندا_لفظ_عشقیلن_واریمدی_الفتیم_منیم
#ترکی #زینبیه
#زبدةالاشعار