حسینین عاشقی …
..
..
..
فراقی
..
..
..
حسینین عاشقی دنیاده بی ایمانه یار اولماز
حسینین عاشقى لا مذهبیلن هم قطار اولماز
..
حسینین عاشقی آزاده دی اوباشه باش اگمز
گیدر آزاده دنیادن جزاده شرمسار اولماز
..
حسینین عاشقی مزدوره مزدور اولمیوب اولماز
قویار تاج شرافت باشینه عزّتله خوار اولماز
..
حسینین عاشقی شخص شرور و نابکاریله
دولانماز همقدم یا همنشین و هم شعار اولماز
..
حسینین عاشقی گوزلر گوزون نامحرمه باخماز
اولار سلمان بوذر تک، ردیف نابکار اولماز
..
حسینین عاشقی چکمز حسینین عاشقین بنده
حیا ایلر آقاسیندان غلام اهل نار اولماز
..
حسینین عاشقی بد خلق و بدگفتار و بدکردار
بد اندیش و کج اندیش و لوج و کجمدار اولماز
..
حسینین عاشقی مهر و محبت قصرینی یخماز
جفا شهرینده کاخ ظلمده خدمت گذار اولماز
..
حسینین عاشقی دین اوسته عمرینجه دیر یا حق
گیدر میثم کیمی داره ملول و دلفگار اولماز
..
حسینین عاشقی دین ملکینی کافرلره ساتماز
عدالت توپراقیندا مرکب ظلمه سوار اولماز
..
حسینین عاشقی قلب یتیمی داغدار ایتمز
یتیمی شاد ایدن عقباده قلبی داغدار اولماز
..
حسینین عاشقی ایتمز اسیره ظلم بی پایان
اسیره رحم ایدن خوار و ذلیل روزگار اولماز
..
حسینین عاشقی کاشانه سین بزم شراب ایتمز
می آلماز می فروش اولماز و یا که میگسار اولماز
..
حسینین عاشقی عقبانی ساتماز فانی دنیایه
فنا دنیاده شه لر یا گدالر ماندگار اولماز
..
حسینین عاشقی اهل و عیالین بی حجاب ایتمز
حجابی کشف اولان ناموسده عزّ و وقار اولماز
..
حسینین عاشقی سرمشق آلار زهرای اطهردَن
طریق زینب کبرادن عالمده کنار اولماز
..
حسینین عاشقى تجدید اولاندا روز عاشورا
شکار ایلر عدونی دشمنه هرگز شکار اولماز
..
حسینین عاشقی دنیانی گر عشقیله دولدورسا
مدال عشق آلان عبّاسی تک بیر نامدار اولماز
..
حسینین عاشقی نفسین حسینه ایتمه سه ایثار
باشی کرب و بلادن شامه تک نیزه سوار اولماز
..
حسینین عاشقی ویران سراده ایتمه سه مسکن
سفارتخانه سی ویران سراده برقرار اولماز
..
«فراقی» یاز بواشعاری جهاندا بولمین بولسون
ضلالت سفره سین رنگین ایدنلر پایدار اولماز
..
..
..
..
#حسینیه #فراقی #پندیات #حسینیه_مدح #ترکی #زبدةالاشعار
نظر دهید