حسین عاشقلرى قان آغلیون تا دلده قان واردور #ورود_محرم_حسین_ساکت

حسینون ذکری قورتولماز
.
.
حسین ساکت خسروشاهی
.
.
حسین عاشقلرى قان آغلیون تا دلده قان واردور
دیوللر کربلا دشتینده توفاندور دومان واردور
.
ائشیت معناده هر یر کربلادی هرگون عاشورا
عجب سوزدور قسم اللهیمه بو سوزده جان واردور
.
جهانین عمری قورتولسا حسینین ذکری قورتولماز
حسین اوستونده بیر ال وار او ال وار تا جهان واردور
.
سنه ای عالمین آزاده سی بیزدن سلام اولسون
سنون عشقونده عالملر بویی صبرى تالان واردور
.
ئوزون أمداد ائله ای معنویت ملکینه سلطان
اورک لر چرپنور قبروندن اؤتری ناگران واردور
.
من عاشورا گونی دنیایه قویماقدا قدم گوردوم
ائدور ناله جماعت بیر بیوک غمدن نشان واردور
.
دوداقیم صود دوشوندیدی آنام آغلاردی سویلردی
اوغول ایندی بلا دشتینده بیر صوددن یانان واردور
.
خزان اولموش بهارینده حسینون اوزگه غوغادور
گل آردینجا یانان بلبل دوداقینده فغان واردور
.
آنا بیر گوشه ده آغلار بالا بیر گوشه ده آغلار
کیمی قربان وئرن واردور کیمی قربان اولان واردور
.
نجه قان آغلاماز اصغر آناسی بیله نسگلدن
مگر اوچ پر اوخا دیلسیز بالاسیندا توان واردور
.
ربابین وای سسیندن فاطمه قیحا چکر آغلار
گورون زهرا عروسینده نجه اودلی بیان واردور
.
اوغول لایلایمه بیر باخ باشون قوی سینم اوسته یات
بولایلاییمده پنهان ائتمه لی راز نهان واردور
.
منیم آهو بالام گل ایستمه سو گئچ بو فکرتدن
بو صحراده على اولادینه چوخ بدگمان واردور
.
مروّتسیز اولان دشمن سنه رحم ایلمز اوخلار
کمینونده دوروب صیّادلر الده کمان واردور
.
سنه جان شیره سیندن ممکن اولسیدی وئرردیم صود
سودوم یوخدی خجالتدن دیلیمده الامان واردور
.
علی دردون سنون درمان گوتورمز یاره دی والله
بئله درده دایانماز هر قدر دردون قانان واردور
.
دینه ای مُدعی سی «ساکتین» ال چک خباثتدن
الونده هانسی کسدن تُهمته حکم روان واردور
.
حسینچی اولماقمدا شکّون اولسا شکّیدن گئت چیخ
منیم قانه دونن باغریمدا جانانه مکان واردور
.
.
.
#ورود_محرم #حسین_ساکت #اصغریه_حسین_ساکت #اصغریه #اصغریه_شهادت #ترکی #زبدةالاشعار