حسین مظهر آیات حی اکرم دور #دیر_راهب_سعدی_زمان

#دیر_راهب
ـــ
متن مقدمه این شعر در حالات ازدواج حضرت امام حسن عسکری (ع) با شاهزاده روم و میلادیه حضرت امام زمان (عج) میباشد: با مصرع اول : #توسل_ایتماقا_امر_ایلیوب_بشیر_و_نذیر
ـــ
..
..
..
مرحوم #سعدی_زمان
..
..
..
حسین مظهر آیات حی اکرم دور
اولوم فدا آدینا آدی اسم اعظم دور
..
سالاندا یادیمه کیفیت کلیسانی
فلکده داد و نوایه گتورم عیسانی
..
گیدوبدی ناطق قرآنی باشی کلیسایه
پیمبر اوغلونا اکرام ایدوبدی نصرانی
..
فغان و آه که انجیل سربلند اولدی
بو قصه ایلدی شرمنده اهل قرآنی
..
او گونکه لشکر کفار قرب دیره یتوب
اوتورموشیدی کلیساده پیر دیرانی
..
بیر اوزگه دللریله گوردی سسلنور ناقوس
صداسی الدن آلور طاقت و شکیبانی
..
فغانی هر ایشیدن دلدن اختیار آلوری
سسینده وار دیه سن داد و شیون عنوانی
..
ایله سیزیلدوری گویا الوب جوان اوغلی
اوغول آناسیدی عرشه چخوبدور افغانی
..
دوروب ایاقه چخوب دیشره دیریدن راهب
بو فکریله که ایده کشف بو معمانی
..
نه گوردی شیون و فریاد و هایهوی گلور
غبار و گرد دوتوب روی چرخ مینانی
..
سپهره اوج ایدوب آت شیحه سی، غریو سسی
پیاده، آتلی، قوشون دولدوروب بیابانی
..
ووروبلا نیزه لره بیر پارا کسوک باشلار
منور ایلوب او باشلار تمام صحرانی
..
دالینجا ناقه ده هشتاده دین خانم عورت
آلور سسی اولارین طاقت و توانانی
..
قاباقدا بیر یارالی باش محاسنی پرخون
ایدور خجل یوزینون نوری مهر رخشانی
..
باخور کجاوه ده اول باشه بیر خانم عورت
دیور حسین سنه قربان بو زینبین جانی
..
امان بو شمرین الیندن که قویمور آغلاماقا
ایدنده ناله ووروب اهل بیت طاهانی
..
بیر آیری نیزه ده بیر نازنین جوان باشی
که حسنی واله ایدور ماه عالم آرانی
..
باخور او باشه ده بیر عورت ایلوری شیون
اونون نشان ویروری حالی حال ثکلانی
..
دیور علی او گوزل باشیوه اوزوم قربان
غمون سالوب چوله مجنون ایدوبدی لیلانی
..
بو ماجرانی گوروب دوشدی حیرته راهب
مخاطب ایلدی اتباع آل سفیانی
..
دیون گوروم منه کیمدور رئیسی قافله نون
کیمون بو لشکره مجرادی امر و فرمانی
..
نشان ویروبله اونا شمری لشکر اشرار
او ظالمین یانینا گلدی پیر دیرانی
..
خطاب ایلدی شمره که ای رئیس قوشون
بو باش کیمون باشیدور نیزه ده آخور قانی
..
یارالی باش که دانیشماز اوخور بو سورۀ کهف
بو کیمدی ازبر ایدوب نوک نی ده فرقانی
..
او بیحیا نه دیدی آشکار من دیمرم
جری اولار بلی ال تاپسا عالیه دانی
..
دیدی او پیر ویرون او باشی منه مهمان
زمان صبحیده ویرم بو قانه غلطانی
..
ویروبله راس منیر امامی ترسایه
فغانه گتدی بو غم مریم و مسیحانی
..
گتوردی دیرینه راهب او نازنین باشی
ولیک حال وله دوتدی پیر ترسانی
..
او باشدان ایلوری گوردی سپهره نور عروج
او نور گوستروری نور طور سینانی
..
او شمع باشینه پروانه تک یانور دولانور
فغان و شیونیله بیر جوان نورانی
..
دوتوب سپهره یوزین ایلور انبیانی ندا
زیارته چاغیرور آدمیله حوانی
..
چاغوردی نوح و کلیم و مسیحی آخرده
رسول اکرمی یعنی حبیب رحمانی
..
گلوبله دیره اولوالعزم انبیا یکسر
زیارت ایتدیله راس امام عطشانی
..
او قانلی باشی اپوب باغرینا باسوب طاها
توکوب عذاره در اشک چشم گریانی
..
دیدی اوغول یارالی باشیوه فدا جدون
ندن بو حاله سنی سالدی دشمن جانی
..
کسوبله باشون، ایدوبلر بالالاریوی اسیر
سالوبلا آت دوشونه هاشمیه نسوانی
..
دویونجا آغلادی قویدی یره اوغول باشینی
عروح ایلدیلر انبیای روحانی
..
نه گوردی راهب او دمده بیر آیری سس گلوری
نه سس که پارچالوری قلب سنگ خارانی
..
الی قابرقالاریندا اوغول آناسی گلور
یریله گوی آراسین دولدوروبدی افغانی
.
نزول ایلدی بیر تخت عرش اعلادن
ایدوب احاطه اونون دورین عرش سکانی
.
اگینده قاره او تخت ایچره بش نفر عورت
اولوبلا شوریله اول قانلی باش نواخوانی
.
بیرین آرایه آلوبلار بلند قامتی وار
گورن او صاحب قد بلند و بالانی
.
بولر که اوغلی الوب، غصه دن بئلی بوکولوب
نشان ویرر بوکولن قدی شکل چوگانی
.
الی، یوزی، آغاران ساچلاری باتوب قانه
خضاب ایدوب آغاران زلفینی اوغول قانی
.
اوغول باشین گوتوروب باسدی بیر اورک باشینا
گتوردی شیونه فریادی کون و امکانی
.
دیدی اوغول یارالی باشیوه آنان قربان
سنی بو حاله سالوب هانسی مرتد و زانی؟
.
نه قدر زحمتیوی چکدوم ای گوزوم نوری
عجب او زحمتیمون اولدی اجر و پایانی
.
هنوز اللریمون گیتمیوب اوغول قاباری
او قدر چکمیشم عالمده ال دگرمانی
.
بو بس دگلدی که اود ووردولار قاپوم یاندی
بالامی سقط ایلدی جور و ظلمیله ثانی
.
او بیحیادن عمرسعد شوم آلوب سرمشق
خامیوه ووروب اود، ویردی نهب فرمانی
.
شهید ایدوب سنی اهل و عیالون ایتدی اسیر
ایدوب ملول منی، شاد آل سفیانی
.
دولاندیروبدی باشون نیزه لرده شهرلری
بو غصه آغلاداجاق حشر اولونجا زهرانی
.
قوناق آپاردی باشون گاه خولی بی دین
او حرمتیدی که قویدی کول اوسته مهمانی
.
گهی آقاجدان آسوبلار اوغول یارالی باشون
باسوبلا داشه گهی اهل کوفه صبیانی
.
زیادین اوغلی گهی قویدی پای تختینده
گتوردی درده دل زینب پریشانی
.
بس اولمادی که فز ووردولار دوداقلاریوا
مقام ویردیلر آخر سنه کلیسانی
.
بلالی باشیوین اولموب هله بلاسی تمام
گرک گوره هامی محتوم اولان قضایانی
.
حجاز شاهی سن اما شراب مجلسینه
کسوک باشون آپارار شهر شام سلطانی
.
اوغول آناسی دیوب درد دل دوشوب دلدن
سالوب یانینجا خواتین خلد و رضوانی
.
سوار اولوبلار او تخته گینه ایدوبلر عروج
خانملار ایتدیله ترک اول محل و ماوانی
.
گوروب کشیش خانملاردا انبیاده گیدوب
گلوب گوتوردی سر پاک شاه والانی
.
گلاب و مشک ووروبدور قویوب برابرینه
مخاطب ایتدی او محبوب حی یکتانی
.
دی بیر گوروم منه ای راس نازنین کیمسن
یارالی باشدا گوروب کیم بو عزت و شانی
.
بیله خیال ایدورم کردگاره سویگلوسن
محبتون بو گجه دیره گتدی عیسانی
.
خطور ایلسه حسنون خیالی قلبیندن
قلم الینده قالار مات حشره تک مانی
.
گلوب تکلمه پیغمبر اوغلینون باشی
دگوب بیری بیرینه لعل شکر افشانی
.
انا القتیل بسیف العدی، انا المظلوم
انا الذی بسعیر یجر عدوانی
.
دیدی او پیر بو واضحدی اولموسان مظلوم
منه ولیک بولوندور بو سر پنهانی
.
کیمه یتر نسبون، هانسی گلشنین گلوسن
معطر عطرون ایدر گلشن و گلستانی
.
زبانحالیله گویا امام ویردی جواب
مخاطب ایتدی او سرخیل قوم رهبانی
.
او مودمود که انجیلیده ویروبله خبر
کلیمیاندا بولر فارقلیط او مولانی
.
همان محمد محموددور منیم جدیم
که دینی نسخ ایدوب عالمده جمله ادیانی
.
آتام علیدی اونا سیزلر ایلیا دیه سوز
بیر آیری آدی اونون شنطیادی سریانی
.
آنامدی فاطمه مخدومه یعنی منصوره
کنیز ایدوب اونا حق مریمیله سارانی
.
برادریمدی حسن سیز دین شبر هاشن
شبیر بول منی هوشینم عشق قربانی
.
او پیرمرد ووروب باشینه چکوب ناله
دیدی فدا آدیوا ای سوسوز آخان قانی
.
منه دیانت اسلامی ایت گیلن تعلیم
آتوم ضلالتی درک ایلوم اصل ایمانی
.
شهادتینی امام ایتدی راهبه تعلیم
شفاعتینده ضمانت اولوندی پیمانی
.
او قانلی باش او گجه دیریده یاتوب راحت
صباح اولاندا آلوب تابعان سفیانی
.
جدایه ووردولا شامه آپاردیلار بیر باش
که قالماسون خط سیرینده جای نقصانی
.
بو آستانیه هر کیم گلوب امیدیله
اولوبدی دردینون آخر #حسینی درمانی
.
سنونده دردیوه لطفاً شفا عطا ایلر
او کسکه حکمته دارا ایدوبدی لقمانی

.
#دیر_راهب
#حسین_مظهر_آیات_حی_اکرم_دور
#چهارده_معصوم_حسینی ص 391
#ترکی #سعدی_زمان
#زبدةالاشعار