یارالی باش
از عاشورا تا خرابۀ شام
..
..
مرحوم حاج حیدر خسروشاهی (حزین)
..
..
حقّی جهانه ایلدی اعلان یارالی باش
قویدی تمام عالمی حیران یارالی باش
..
اهل جفا جفائیله تا ووردی نیزیه
گون تک جداده اولدی نمایان یارالی باش
..
تا امن سیز حرملرینه گوستره امان
تکبیره سس اوجالتدی او ذیشان یارالی باش
..
خولی ائوینده مطبخ تاریک و تارده
اولدی کول اوسته بیر گئجه مهمان یارالی باش
..
گوردی آناسی دیده گلوب دیلده وای اوغول
ائتدی او بزمی محفل عرفان یارالی باش
..
سس ویرماقیله بزم عزایه گلنلره
قوردی بساط شام غریبان یارالی باش
..
آشفته گوردی کوفه نی ظلمات کفردن
سالدی ضیا چو نیّر تابان یارالی باش
..
غفلتدن ایستدی اویادا اهل کوفه نی
نیزه باشیندا باشلادی قرآن یارالی باش
..
شاید بو علته گوره ائتمیشدی انتخاب
کهف آیه سین او آیت سبحان یارالی باش
..
آزاده لر جهاندا باش اگمزله ظالمه
فعلین ائدوبدی قولنه برهان یارالی باش
..
زینب ائشیتدی قارداشینون دلنشین سسین
اولسون دیدی باجون سنه قربان یارالی باش
..
سن نیزه ده تلاوت ائله حق کلامینی
ای حق کلامینه اؤزی عنوان یارالی باش
..
من ناقه ده او آیه لری مرتضی کیمی
تشریح ائدوم بو قومه کماکان یارالی باش
..
قرآن شعاعی پردۀ ظلمتده قالماسون
اولسون بو قوم گمرهه تبیان یارالی باش
..
معلوم اولان بولار بیزی حقدن اوزاق بولور
ایلورله ظلمده بئله طغیان یارالی باش
..
گاهی گولورله عترتیوه گه چالورلا کف
دؤزسون نجه بو جمع پریشان یارالی باش
..
بولمورله بیز رسول خدا اهلبیتیوخ
سنسن بو قومه حجّت یزدان یارالی باش
..
بولمم نه ظلم اولوندى او رأس منوّره
ساکت اولوب او معنی فرقان یارالی باش
..
زینب گوروب که گلموری قارداش سسی ولی
قانه باتوب دوباره او عطشان یارالی باش
..
نحاله قالدی بولمورم الله بولر اونی
سسلندی ای عوالمه ارکان یارالی باش
..
ای زینبون امیدی نیه گلموری سسون
ئولسون باجون ندور گینه بو قان یارالی باش
..
..
#دیر_راهب
..
..
هر بیر دیاره چکدیله محنت قطارینی
اولدی اؤزی او جمعه نگهبان یارالی باش
..
دین مبینه ائتماقا ارشاد راهبی
دیره گیدوب او مظهر ایمان یارالی باش
..
راهب قویوب مقابله اُول رأس انوری
عرض ائتدی ای حقیقته میزان یارالی باش
..
کیمسن دیلون فداسی اولوم نطقه گل دانیش
ایله هویّتون منه اعلان یارالی باش
..
ایله بیان آدون ندی وار نسبتون کیمه
قویما منى قالوم بئله حیران یارالی باش
..
..
اعجازیله گلوب دیله سلطان نُه قباب
گویا بو نوعله ویروب اول راهبه جواب
..
..
راهب طریق معرفته رهنما منم
اسرار کایناته بصیر آشنا منم
..
جدّیم محمّد عربی دور آتام علی
زهرا آنامدی خامس آل عبا منم
..
آزاده لر امیری حسینم قتیل عشق
احیای دین احمده اعظم فدا منم
..
خلقه امام مفترض الطّاعه تا ابد
اسلامیانه عالم آرا پیشوا منم
..
فیض وجودیمیله جهان برقرار دور
عصرین امامی لنگر ارض و سما منم
..
باخما سوسوز باشیم کسیلوب غرق محنتم
فُلک نجات امّت ایچون ناخدا منم
..
بیر تک منی قتیل جفا ائتمیوب بوقوم
یتیمش ایکی شهیده بوگون مقتدا منم
..
ظلمات شرکدن سن اگر ایسته سن نجات
بینا گوزیله باخ منه نور هدى منم
..
معناده بو مکانه هامی انبیا گلوب
چون نور دیدۀ شرف انبیا منم
..
آیا ائشیتموسن آنامون وای اوغول سسین
باخسان ائدن بو محفلوی غمسرا منم
..
معناده سس ویرور آناما ویرور مریم و مسیح
اهل ولایه مایۀ شور و نوا منم
..
دردون ندی بیان ائله باخما یارالیم
عیسالره ویرن دم و فیض شفا منم
..
هر کیمسه صدق اوزیله توسل ائده منه
مأیوس ائتمرم اونی کان سخا منم
..
ظاهرده باخما غالب اولوب اشقیا منه
باطنده نظم کفره ووران پشت پا منم
..
تکمیل نهضته گیدورم شهر شامه من
برهم زن بساط یزید دغا منم
..
..
راهب ائشیتدی تا بو گهربار سوزلری
بیر آه چکدی دولدی سرشگیله گوزلری
..
عرض ائتدی ای حبیب خداوند کائنات
ای وجه حق نماسی قویان کایناتی مات
..
سن مظهر جلال خدای جلیل سن
وار سنده حىّ لم یزلیدن تجلّیّات
..
موسی هایاندادی هانی عیسی مسیح تا
گلسونله ایلسونله تماشای معجزات
..
بیر باش که ظلم الیله بدندن اولوب جدا
اعجازه سیر ایله اونا یول تاپمیوب ممات
..
دائم بهار بیر گله بنزر گلور مدام
اوندان مشام جانه روانبخش رایحات
..
قاندان عقیق احمر اولان لعل لبلرون
سرچشمۀ حیاتیدی روحه ویرور حیات
..
افسوس بولمیوبله بو لعلین بهاسینی
بیقدرلر ووروبدولا سنگ تعدّیات
..
فیض دمون دیریتدی منیم مرده روحیمی
روحیم سنه فدا من زاره قیل التفات
..
ای نیّر هدى منه اول هادی طریق
ظلمات شرکدن منه نورونلا ویر نجات
..
قیل وعدۀ شفاعتیله شاد گویلومی
ای عرصۀ محاکمه ده شافع عصات
..
..
چون صدق اوزیله ائتدی توسل او حضرته
حل ائتدى مشکلون اوزی حلال مشکلات
..
تعلیم ائتدی راهبه اسلامی شاه دین
شوق تمامیله دیدی راهب تشهّدات
..
توفیقه باخ سعادته باخ اتفاقه باخ
هاردان هارا آپاردی اونی گور تصادفات
..
توحید صرفه قویدی قدم شرکت محضدن
الطاف حقّدن اونا اولدی توجّهات
..
گل تک قویوب مقابله اول نازنین باشی
حسرتله باخدی، ایگلدی ، اؤپدی او خوش صفات
..
تاراج اولوردی صبری او پیر موفّقین
یاده سالاندا نیلیه جاقدور گونوز طغات
..
ای کاش اولمییدی گونوز چیخمییدی گون
تحویل ویرمییدی او باشی او پاک ذات
..
راحت قالیبدی دیرده رأس قتیل عشق
ظلمیله وورمییدی گینه نیزیه عدات
..
..
صبح اولدی اهل قافله مهمانین آلدیلار
مهمانینی دئمه که عزیز جانین آلدیلار
..
..
راهبدن آلدیلار او باشی فرقۀ لئام
سالدی نظامه قافله نی قوم بدنظام
..
نه قافله که شرحینه شرم ایلوری قلم
گورمز بیر ایله قافله بو چرخ نیلفام
..
نه قافله قاباقدا گیدور نیزه دارلر
سر نیزه ده ویروبله کسیک باشلارا مقام
..
اما نه باش که هر بیریسی بیرایشیقلی آی
گون تک سالور شعاع هدایت سر امام
..
بیدار اولان تاپور او شعاعیله دوز یولی
چون وار او باشدا نور خداوند لاینام
..
اما هزار حیف که غافل جماعتون
وار گوزلرینده عارضۀ جهلدن غمام
..
هر معجزه گورورله اویانمورلا خوابدن
چون سلب اولوب اویانماقا توفیق اهتمام
..
آزارینه پیمبر رحمت عیالینون
مأمور اولوبلا غفلته باخ فرقۀ ظلام
..
مأمورلر شقی و ستمکار و سنگدل
اما اسیرلر اؤرگی داغلیدور تمام
..
اوغلی ئولن ، آتاسی ئولن ، قارداشی ئولن
تن خسته دل شکسته اولوبلار بلایه رام
..
بیر عدّه بانوان حریم عفاف و حجب
جبراً جهازسیز دولرده تاپوب مقام
..
نازیله پرورش تاپان اطفال نچّه گون
نه سو ایچوب دویونجا نه میل ایلیوب طعام
..
بیراهه یول ، گون ایسّی سی مأمور رحمسیز
خوردا اوشاق بو ظلمه نجه ایلسون دوام
..
داده گلنده هر بیر اوشاق ساربان وورور
باخمور یتیمی وورماقى الله ائدوب حرام
..
بیر نوعیله مقیّد اولوب فخر ساجدین
گویا که فرض ائدورله اونی بیر قاچاق غلام
..
طیّ طریق ائدردیله جبراً اسیرلر
بیر حالیلن که گوندوزی ایلردی تیره شام
..
بیراهه یول گیدردیله گویا بو قصدله
حقّى بولوب مباد جماعت ائده قیام
..
شامه ننوعیله یتوب اول کاروان غم
نه وضع و حالدیدی او گون شام و اهل شام
..
تاپموش شیاع شهره گلور خارجی اسیر
چیخمیشدی اهل شهر تماشایه خاص و عام
..
..
صبر ائتدی هر بلایه عیال شه امم
تا شهر شام شومه یتیشدی قطار غم
..
..
#ورود_شام
..
..
آه و فغان جسارت قوم لئامدن
فریاد گردش فلک نیلفامدن
..
یا فاطمه اوزون نظر ائت آز قالور دوشه
دل تابدن بو واقعه ده دیل کلامدن
..
سوز بیر مقامده دایانوب اولماسا نظر
عاجزدی خامه یازماقا سؤز بو مقامدن
..
واردور یری دیسم گوروب اوضاع محشری
اولاد مصطفی جریانات شامدن
..
داخل اولاندا شامه عیال شه انام
مملویدی مسیرلری خاص و عامدن
..
وارد اولوبلا صبح زمانی او شهره لیک
گون باتمادا اولوبلا خلاص ازدحامدن
..
بیر صبح شامه تک نه لر اولدی او شهرده
آل علی نه لر گوروب اول صبح و شامدن
..
شرح و بیانه دلده توان یوخ بو قدر وار
تار اولدی گوندوز اونلارا لیل ظُلامدن
..
الله بولور نه چکدی بنی فاطمه او گون
جور و جفای ملّت بی ننگ و نامدن
..
گه طعن ائدوب اسیرلره گه گولردیلر
گه داش آتاردیلار گهی اؤد کوی و بامدن
..
راوی دیر او حاله باخوردوم کناردن
حیرتده صبر عترت خیر الانامدن
..
قلبیم یانوردی لیک ائدنموردوم آشکار
بیر کیمسیه اورکده کی سوز ضُرامدن (1)
..
زنجیر ظلمه سید سجّاد باغلانوب
فریاد و داد کینۀ قوم ظُلامدن
..
فکر ایلدیم امام گیوب قرمزی لباس
یا للعجب دیدیم بو امام هُمامدن
..
قارداشلاری ، آتاسی ئولوب سینه داغلیدی
بیر ایله داغه یوخدى خبر التیامدن
..
اما یاخینلاشاندا نه گوردوم که آه آه
قاندور آخور وجود شریف امامدن
..
زنجیر یاره سیندن او قدری آخوبدی قان
رنگین اولوب لباسی دمِ سرخ فامدن
..
ایلوردولر حیا نه پیمبردن اهل شام
قورخوردولار نه قهر حق لاینامدن
..
ایوای او ظلم لر که کسیک باشلارا اولور
دوشمور ندن بو گردش عالم نظامدن
..
اما بیر ایله ظلمله هر بیر یارالی باش
گون تک ایشیق سالور گینه خونین غمامدن
..
..
گون باتدی دیل یاراسی شمادت تمام اولوب
آل رسوله شور قیامت تمام اولوب
..
..
#خرابه-شام
..
..
شام اهلینون جفاسی یتیشدی نهایته
کُنج خرابه اولدی مکان آل عصمته
..
امانجه خرابه نه سقفی نه سایه بان
نه فرشی نه چراغی باخون درد غربته
..
شمع و چراغی شعلۀ آهی اوشاقلارین
تیره تراب فرش اولوب اهل محبّته
..
یورقون یارالی داغ بدل آل بو تراب
بولمم یتوبله اوردا نجه استراحته
..
ظاهرده گرچه گوشۀ ویرانه دی او یر
اما شرفده مایۀ حسرتدى جنّته
..
عصرین امامی حجّت حق فخر ساجدین
ساکن اولوب او یرده باخ اوردا شرافته
..
توپراقلار اوسته اوردا قویانلار گول اوزلرین
معناده آبرودیله سیمای خلقته
..
ظاهرده گرچه شرم ائلمور شامیان گلور
ایذایه دیل یاراسینا ، طعنه ، شماتته
..
باطنده اول مکان شریف و مقدّسه
ارواح اولیادی گلنلر زیارته
..
ختم رسل گلور یانیجا خیل انبیاء
شیر خدا گلور اُسرادن عیادته
..
زهرا گلور که زینب و کلثومه باش چکه
همراه اولوب آناسی خدیجه او حضرته
..
گورسون باجیلارین حسن مجتبی گلور
ویرانسرا مبدّل اولوب بزم الفته
..
اما جناب زینب علیا مکرمه
صبرائتدی اوردا نه غمه نه درد و محنته
..
اهل حرم بؤیوک گیچیک اودلی بیانیله
دردین دیردی هر بیری اول کان عفته
..
اما رقیّه نیسگیلی فوق ملالیدی
هر لحظه آرتیراردی غم آل رسالته
..
گاهی باباسین ایستیری که قارداش آختاردور
گاهی با خور قولوندا کی قید اسارته
..
فکر ایلوری مدینه هارا شام غم هارا
نه گلدی ائل قبیلیه، اجلال و شوکته
..
ویرانسرایه قصد تماشائیلن گلن
تا مطلبی بولردی باتاردی مصیبته
..
بعضی لری ویرردی تصدّق ترحّماً
واقف دگیردی آل رسالتده حرمته
..
بولموردی اهل بیته تصدق حرامدور
مخصوص اولوبلا حقدن اولار بو کرامته
..
یا رب بحق حرمت اولاد بو تراب
مشمول قیل «حزینی» عطایه عنایته
..
دنیاده لطف ائله اونا توفیق معرفت
عقباده ده رهین ائله عفو و شفاعته
..
(1) ضرام = آتش
..
..
#حسینیه #حزین_خسروشاهی #حسینیه_شهادت #کوفه #ترکی #زبدةالاشعار #راه_شام #کوفه
نظر دهید