رأس امام بر سر نیزه
..
..
مرحوم صدری اردبیلی
..
..
گوردیلر نیزه ده بیر رأس مطهر دانشور
بئله فکر ایلدیلر ختم پیمبر دانشور
..
..
بو نجه سرّدی گون وادی ظلماته گلوب
یا که بیر نوردی بو کشف حجاباته گلوب
گون دگول بیر کسیلن باشدی مناجاته گلوب
سوزی الله سوزیدور دیلده مکرّر دانشور
..
..
عقلى حیران ائلیوب لفظ گهرباری اونون
جذب ائدوب هر گوره نی دلده کی اسراری اونون
حق دیور حق دانشور حقّیدی اقراری اونون
سرّ اکبر بودور اول خالقه مظهر دانشور
..
..
نیزه اوستون ائلیوب طور مناجات ائلیور
هر نفس نطقه گلور محیىِ اموات ائلیور
گون کیمی حقّی تمام عالمه اثبات ائلیور
عزّ و تمکین له وئروب نیزیه لنگر دانشور
..
..
گرچه موسى یتیشوب طوره مصلا ائلدی
لن ترانی ائشیدوب ترک تمنّا ائلدی
بو همان نوردی طور ایچره تجلّا ائلدی
نور باران ائلیوب شامی سراسر دانشور
..
..
عاشق حیّ گرک قطع علایق ائلیه
نیزه باشینده گوروب سیر دقایق ائلیه
عهده بیر فکری بودور کشف حقایق ائلیه
بو حقیقتله اولا عالمه رهبر دانشور
..
..
صوت قرآنی سالوب عالمه بیر شور و شرر
اونی درک ائیلمه دی مردم بی عقل و بصر
سنگ باران او باشی عورت اوشاق ایلدیلر
دئدیلر سحردی بو نیزه ده کی سر دانشور
..
..
دلده بیر سرّی بونون واردی بئله داده گلر
گوزیاشی جاری اولار ناله و فریاده گلر
بو شهنشه دی بلی عالم معناده گلر
نالیه خیلی پریشاندی مکدّر دانشور
..
..
هردم اؤز دوندرور اؤز اهل و عیالینه باخار
پوزولان حشمتینه جاه و جلالینه باخار
زینبون گوز یاشینا غصّه لی حالینه باخار
قولی باغلی باجی سین گورسه برادر دانشور
..
..
ای دلیم لال اولاسان بو غم و بو محنته کاش
نه روا بیر یارالی باشه دگه ظلمیله داش
عشق بیر یرده ایدی زینب اونی ائیلدی فاش
هر مصیبتده حسینیله برابر دانشور
..
..
..
#کوفه #صدری_اردبیلی #راه_شام_صدری_اردبیلی #ورود_شام_صدری_اردبیلی #ورود_شام #راه_شام #ترکی #زبدةالاشعار
نظر دهید