خامس آل عبانون سیرتی زینبده دور #زینبیه_عینی_فرد

در ایثار حضرت زینب(س)و طفلان عزیز آن بانو
.
زبدة الاشعار

?: @nohe_torki
.
حاج غلامرضا عینی فرد
.
خامس آل عبانون سیرتی زینبده دور
نهضتی اولدی جهانی علّتی زینبده دور
.

جان متاعیلن گلوب بازار عشقه عشقه باخ
گوزیاشیلان سو وئروب گلزار عشقه، عشقه باخ
گل وجودین توش ائدوبدور خار عشقه، عشقه باخ
زینبه عشق عاشق اولدی دولتی زینبده دور
.

اوچ طلاقه ایلیوب دنیانی میر مؤمنان
روز عاشورا بو قدرت اولدی زینبده عیان
یوخسا اولمازدی اؤ طوفان بلاده قهرمان
حیدرون صبر و ثبات و صولتی زینبده دور
.

قدرت ایمان زینبده وَلَه دور انبیا ٕ
پشت پا ووردی جهانه زینب فرّخ لقا
تا ائدوب شرکت حسینون نهضتینده پابه پا
بو شراکت نامه نون بیر صورتی زینبده دور
.

گر قوناق گئتسه بیری بزم ملوکانه یقین
لازم و ملزومدور ممدوح زینت ایلسین
کعبیه مهمان و زینت دور امیرالمؤمنین
بو ضیافتده علینون زینتی زینبده دور
.

رهبری، بیل انتخاب اولسیدی نسواندان اگر
لایقیدی اهل دینه زینب اولسون راهبر
بی معلّم عالمیدی زینب والا گُهر
علم اُمّیدن نشان و قسمتی زینبده دور(۱)
.

اولماسیدی ذات زینب مظهر صبر و وقار
کربلا هنگامه سیندن قهرمان چخمازدیلار
عادی شخصی کربلا طوفانی تز دلدن سالار
رمز تثبیت حسینون نهضتی زینبده دور
.

چشم دنیا شیر عورت گورمیوب زینب کیمی
رهرو راه سعادت گورمیوب زینب کیمی
بعد زهرا کنز عصمت گورمیوب زینب کیمی
مرحبا امّ ابیها عفّتی زینبده دور
.

هر یره گئتدی حسین بی واهمه زینبده وار
سینه سین ائتدی سپر هر بیر غمه زینبده دور
کربلادن اولسا بحث و همهمه زینبده وار
مجلس ماتملرون اُبُهتی زینبده دور
.

اللی ایل گوزیاشی توکدی سیل تک رخسارینه
جانینی وقف ائلدی آزاده لر سردارینه
اهل منطق واله و حیران قالوب گفتارینه
هر نویسنده ، سخنور، صحبتی زینبده دور
.

بیلمورم نه حالیلن میداندا تاپدی اکبری
یا ئولوم مرزینده گوردی زاده ی پیغمبری
آچمادی باشین باشیندا سیلکلندی معجری
بو کشاکشده شجاعت کِسوتی زینبده دور
.

چکدی بیر نقشه حسینون داغی تاپسون التیام
خیمه گهده سسلننده بیرده هل ناصر امام
گوردی زینب خیمه سیندن چیخدی چون بدر تمام
پشت سرده ایکی آهو خدمتی زینبده دور
.

محضر شاهه اوشاقلار سرعتیلن چاتدیلار
ئوزلرین بیردن قدوم شهریاره آتدیلار
خرداجا شمشیریلن مشق ائتدیلر اویناتدیلار
گه اوشاقلاردا ، گهی شه رؤیتی زینبده دور
.

قوزادی یردن حسین چوخ رأفتیلن باشلارین
آغلادی شه ئوپدی گاهی ئوزلرین گه قاشلارین
زاده ی زهرا چاغوردی مهربان قارداشلارین
بیر باخون سویلوب جهانون رقتی زینبده دور
.

اکبری یاددان چیخاتدوم حقدن امداد ایسترم
غنچه نی من گلستاندا آچمامیش گل درمرم
رزمگاهه چوخ اوشاقدور بولّاری گوندرمرم
حقه قربان وئرماق آیا نوبتی زینبده دور؟
.

سویلدی قلبیمده بسدور داغ اکبر گئتمیون
اکبرین جسمین داغیتدی تیغ و خنجر گئتمیون
سیز شهید اولساز باجیم زینب غم ایلر گئتمیون
غم گونونده بو حسینون الفتی زینبده دور
.

فرقی یوخ سیزده منیم اوغلومسوز ای دردانه لر
ایندی عبدالله سیزی یثربده گوزلر دیده تر
اولماسا راضی بو امره من رضا اولّام مگر
بیلمورم یا اختیار و رغبتی زینبده دور
.

اولمادی ممکن نقدری امتناع ائتدی آقا
گوردی حاضردور اوشاقلار عشقیلن جان وئرماقا
صاق صولا سالدی نظر هردم امام مه لقا
انعکاس انکسارون شدّتی زینبده دور
.

سسلدی اوندا خانم زینب حسینیم آغلاما
گل قبول ایله بو قربانلاری قارداش سال یولا
کیمده وار طاقت دئدی بیچسون کفن بو قوچلارا؟
عرض ائدوب فوراً بولارون خلعتی زینبده دور
.

باخما تقدیم ایلورم بیر جفت اوغول ای شهریار
اون بیر و دوقّوز اولار یرمی یاش ای کانِ وقار
ایکیسی تک اکبرونله سِینّیده باهم اولار
بیر اوغول وئرّم پس، ای شه نیّتی زینبده دور
.

بونلاری گرچه قیاس ائتمک غلطدور اکبره
ایستورم دوشسون منیم آدیمدا شاید دفتره
زینبون لیلا ثریّائیله دوشسون چوللره
حق یولوندا داغ گورماق یُسرتی زینبده دور
.

سرمه ی عیش و نشاطی گوزلریمه یاخمارام
آند اولا ئوز جانوه هئچ دالّاریجا باخمارام
ثابتم عشقیمده اولدوز تک سماده آخمارام
حق یولوندا وئرسه لر جان لذّتی زینبده دور
.

خوان احسانونده هر قدر اولسا سهمیم چوخ دئمم
بیر زادا یوخدور گمانیم واریم اولسا یوخ دئمم
اوخ اوخ اوستن بولّارا دگسه حسینیم اوخ، دئمم
داغدیده اُمّهاتین رایتی زینبده دور
.

قولّاری دوشسه بولار اوخشار جناب جعفره
دگسه شمشیر باشلاریندان بنزیه لر حیدره
جعفر و حیدر بالالاری گرکدور قان وئره
دین اسلامه ازلدن فکرتی زینبده دور
.

عشقیلن زینب اولارین قدّینه سالدی کفن
چوخ یاراشدی اولّارا گوردی کفن اول شیرزن
ئوزلریندن ئوپمدی قارداش یانیندا حُجبدن
بیرده عباس و حسینون غیرتی زینبده دور
.

چون اوغولسوزلار یانیندا ئوپمز اوغلون هر آنا
جان عالم بو آنایه وار یری قربان اولا
ایلدی ترغیب اولاری شوقیله جان وئرماقا
کنز صبرون گوهر پر قیمتی زینبده دور
.

آچدیلار تلّی شهامتلن او بچه شیرلر
چیخدیلار بیردن غلافیندن ایتی شمشیرلر
لرزه سالدی رزمگاهه بت شکن تکبیرلر
بو اوشاقلاردان ال اوزماق قدرتی زینبده دور
.

باشلیوبلار رزمیده رزمی رجزلر یکسره
رعب و وحشت سالدیلار ناگه صفوف کافره
اوزلرین تعریف ائدوبلر هنگ و تیپ و لشکره
بیلدیلر شهزادگانون نسبتی زینبده دور
.

بیلدیلر هر ایکیسی آماده ی پیکاریدور
بیلدیلر دلدادگان جعفر طیّاریدور
بیلدیلر نوباوگان حیدر کرّاریدور
بئله شمشیرزن بویوتماق مِکنتی زینبده دور
.

عونیله وئردی محمد سرعتیلن دال دالا
ایکی شمشیر ایکی قارداش مغز دشمندن چالا
آت دوشونده قالدی عاجز اولّاری دشمن سالا
بولدولر بو نقشه نون اصلِیّتی زینبده دور
.

عون، استمداد ائدور هر لحظه عون اللهدن
نعره چکدوقجا محمده ده دل آگاهدن
ماهیدن قوزاندی آهی تا گئچوبدور ماهدن
فرد فردی ماهدور ماهیّتی زینبده دور
.

سسلنوللر اِبنِ بنتِ ساقی کوثر بیزوق
باخمیون سینّن اوشاقوق شیر هیجالر بیزوق
حضرت زهرا کیمه اولسون بیوک مادر؟بیزوق
قهرمان پرور بتولین جرأتی زینبده دور
.

قارداشا قارداش سسی روح آرتیرور جان آرتیرور
هاشمیّه رگلرونده عشق جانان آرتیرور
جان دیور اوندا محمد نور و ایمان آرتیرور
بو جهادون هم شکست و رفعتی زینبده دور
.

عون سسلور حضرت عباسی تک وار دایمیز
تلّیده ایندی اؤ سرداره چاتور های هایمیز
اولدوزوق بیز آسمان عشقه عباس آیمیز
اشجع الناسین دمادم حیرتی زینبده دور
.

سسلنور گاهی محمد ای جماعت قوخماروق
گلسه هر قدری قوشون وار بیزده قدرت قوخماروق
چون وئروب زینب بیزه شیرشجاعت قوخماروق
ئولدوراق یا جان وئراخ بیز عزتی زینبده دور
.

ایله جنگ ائتدی ایکی قارداش قشون اولدی وَلَه
چکدیلر نقشه جهان پست فطرت دینجله
ایکی قارداش اورتاسیندا سالدی لشکر فاصله
لحظه به لحظه قیامت حالتی زینبده دور
.

دوشدولر آتدان یره اکبر کیمی جان وئردیلر
آلدیلار جام شهادت عمره پایان وئردیلر
دین اسلامه شهامتلن اولار قان وئردیلر
اولدیلار راحت فراقون مُرّتی زینبده دور
.

ایستدی قویسون الین عون اول رخ گلنارینه
اوخ الین تیکدی یوزوندن آخدی قان رخسارینه
توش ائدوب دشمن گل سرخی شقاوت خارینه
بو اوخون معناده زجر و ضربتی زینبده دور
.

بیربیریندن تا اوزاخلاشدی اؤ بچه شیرلر
ظلمیله قالدی اوغولسوز زینب خونین جگر
خیمه ده ناگه حسین گوردی اوشاق صوتی گلر
سسلدی گلدیم، ئورکده رقّتی زینبده دور
.

گلدی میدانه حسین عباسیله تز دیده تر
آختارور آغلور اوشاقلاری امام بحر و برّ
گوردی که پرپر اولوبلار باغبانسیز غنچه لر
دیسگینوب بیلدی بلانون شدتی زینبده دور
.

جان کیمی آغوشه آلدی ایکی جسم اطیبی
قویمادی پامال ائده اولّاری دشمن مرکبی
سعی ائدوردی زینبه آندیرمیا تا مطلبی
تلّیدن آشدی خیامه دقّتی زینبده دور
.

قاچدیلار پیشوازه یکسر اهلبیت مصطفا
خردا قیزلار آچدی باشین ایلدی داد و نوا
دورمادی اما یریندن قهرمان کربلا
گوردی قارداشی حسینون رؤیتی زینبده دور
.

ائتدی فرمایش حسینه وئرمیشم قول، آغلامام
تا رضا اولسون بو ایشدن ذات حیّ لاینام
صبر قیلّام هم رضا اولسون جوان ئولمیش آنام
چون آنامون حمد لله سیرتی زینبده دور
.

عمه سین تعریف«عینی فرد»ائدوب زین العباد
عمَّتی اَنتِ بِحَمدِ اللهیلن اول مرد راد
ایندیده احرار عالم سسلنوللر زنده باد
سوز یازان چوخ شعرون اما، ملحتی زینبده دور
.
(۱)قال امام سجاد(ع): عَمَّتی اَنتِ بِحمدِالله عالَمَةٌ غیرُ مُعلِّمَة
.

#زینبه_مدح
#طفلان_زینب
#خامس_آل_عبانون_سیرتی_زینبده_دور
#عینی_فرد
#ترکی
.
#زبدةالاشعار

?: @nohe_torki