خرابه یئر بو گئجه آسمانه ناز ائلییر #حضرت_رقیه_امانی_اردبیلی

در شهادت حضرت رقیه سلام الله علیها
.
#زبدةالاشعار
.
: @nohe_torki
.
حاج علیرضا امانی اردبیلی
.
خرابه یئر بو گئجه آسمانه ناز ائلییر
گرکده ناز ائلیه ، آفتاب مهماندی
.
بابام خرابه ائوه ائیلیوب قدم رنجه
خرابه ده، نه گوزل گون چیخوب ایشیقلاندی
.
بیر اوچ یاشیندا قیزام یوخدی طاقتیم درده
ئولوم تری دوزولوب آلنیما… نمایاندی
.
بو گون بیلوردوم ئوزوم ، آیری گونله فرق ائیلور
یازیم دییوردی منه ، درده شام پایاندی
.
بو گون گئیوب کئچینن وورمادی منه طعنه
گلن گئدن دئمه دی بو یتیم ، نالاندی
.
دونن دعا ائله دیم بار الهی رحم ائیله
بو بختی قاره قیزا ، خسته دی پریشاندی
.
یورولموشام او قدر روحیم اینجییوب یولدا
یامان گونومدی، بابام گلسه ، ئولمگ آساندی
.
گرگ کی شکر ائلیم ساحت خداونده
ائشیتدی ناله لری ، حق رحیم و رحماندی
.
خداده ایسته مه دی قلبیده قالا آرزم
یئتیردی ئوز بابامی ، وصل جان و جاناندی
.
بو گون بیلوردوم اولار روحیمین قوشی آزاد
بی بیمده بیلمیشیدی… گوردوم اشکی باراندی
.
دئدیم بی بی، سنی چوخ گورمه سین منه الله
دئدی نه اولسا قیزیم تحت امر رحماندی
.
دئدیم چوخ اولدی سنه زحمتیم.. حلال ائیله
دئدی گرکدی دوئزم ابتلایه … پیماندی
.
دئدیم ندن توکولور بو قدر گوزون یاشی
دئدی توکولسه اگر یارون اوسته.. درماندی
.
دئدیم بی بی گئجه لر صبحه جن یوخوم گلمور
اوپوپ دئدی دوزه لر .. جان بالا آجونداندی
.
دئدی قرا گوزووی یوم.. بیر آز یاتوب دینجل
دئدیم نفس سیخیلور، بو خرابه زنداندی
.
دئدی اوتورما.. دو گز.. چکمه آهی آه اوستن
دیدیم باتوبدی تیکانلار ایاقیمه.. قاندی
.
دئدی قرا گوزووی قوی اوپوم ، دئدیم اوپمه
بویوردی ناز ائدوسن ؟ یوخ دئدیم پریشاندی
.
دئدی نیوندی بالا؟ گوزلریم دئدیم آغرور
دگنده سیلی منه عمه ، گوزلریم یاندی
.
.
.
#حضرت_رقیه_شهادت
#خرابه_یئر_بو_گئجه_آسمانه_ناز_ائلییر
#ترکی
.
#زبدةالاشعار
.
: @nohe_torki