شهادت حضرت علی (ع)
..
..
مرحوم کریمی مراغه ای
..
..
گلمیشوخ عیادتیوه، یا اباالحسن نجه سن
عاشقوخ زیارتیوه، یا اباالحسن نجه سن
..
..
دوشموسن ندن بو حالا، ای یتیملر آتاسی
دوشه خسته جانیمیزه، آقا جانوین قاداسی
دگه کاش قلبیمیزه، یارالی باشون یاراسی
یاناروخ جراحتیوه، یا اباالحسن نجه سن
..
..
او گوزل محاسنوی، نیه قان خضاب ایلیوب
بو قضیه شیعه لرین، اوره گین کباب ایلیوب
یاراوا باخوبدی طبیب، دیه سن جواب ایلیوب
نه گلوب شجاعتیوه، يا اباالحسن نجه سن
..
..
قان آخوب او قدری یوزون، ساری گل کیمی سارالوب
نه گلوب جوانلارووا، سنی کیم بوحاله سالوب
باشووا دگنده یارا، حسنون هایاندا قالوب
گله تا حمایتیوه، یا اباالحسن نجه سن
..
..
سنی ایتدی خانه نشین، او گروه کینه سیر
اورگون غمیله شیشوب، سنه شام اولوبدی سحر
سالدی بوینووا شالووی، سورودی او منبع شر
هامی یاندی حالتیوه، يا اباالحسن نجه سن
..
..
سنی گور بو حاله سالان، حسنینه نیلیه جاق
ایچه جاقدی زهری حسن، کیمه دردینی دیه جاق
قان ایچینده اوغلون حسین، سنی داده سسلیه جاق
یاناجاق مصیبتوه، یا ابالحسن نجه سن
..
..
نیه ووردی درگهیوه، سنون اود او قوم دغا
نیه دوگدی همسریوی، اوز ایوونده اهل جفا
قاپینون دالندا خانم، ایله چکدی شور و نوا
اثر ایتدی غیرتیوه، یا اباالحسن نجه سن
..
..
گل عم اوغلی آزجا قالور، گلون اود ایچینده یـانا
بالام ئولدی سیندی سینم، بدنیم بویاندی قانا
قالاجاقدی فاطمه دن، بویانان قاپی نشانا
قربانام شهامتیوه، يا اباالحسن نجه سن
..
..
گل عم اوغلی جان ویرورم، ئولورم آمان گونیدی
سندیروبلا شهپریمی، عمریمون یامان گونیدی
زینبی گتور یانما، آتاسیز قالان گونیدی
ال تاپوبلا عترتیوه، یا اباالحسن نجه سن
..
..
نه گلوب عم اوغلی سنه، بله چاره سیز قالاسان
نه اولار ازلکی کیمی، اله ذوالفقار آلاسان
بودی زحمتیم گله سن، باشما عبا سالاسان
بیر باخام او صورتیوه، یا اباالحسن نجه سن
..
..
من کریمیم یانارام، آغلارام قرادی یوزوم
غرق بحر معصيتم، جرميمه مقرّم اوزوم
جان ویرن زمان گله سن، قالمیا یولوندا گوزوم
قائلم ولايتيوه، يا اباالحسن نجه سن
…
…
…
#حیدریه #کریمی_مراغه_ای #حیدریه_شهادت #ترکی #زبدةالاشعار
نظر دهید