وداع حضرت حسین (ع)
..
..
مرحوم نخستین اردبیلی
..
..
خوشدور همیشه جایگه خلوت عاشقه
گل باجی سال یولا یتیشوب نوبت عاشقه
..
..
من تاج عشقى باشیمه قاندان قویام گرک
جانان یولوندا، یتمیش ایکی جان قویام گرک
صندوق عشقه بیر قوزی قربان قویام گرک
دیلسیز گلوب دله اولا هم صحبت عاشقه
..
..
سن بیلموسن که فکر و خیالیم ندور منیم
عشق عالمینده مال و منالیم ندور منیم
جانان یولوندا اهل و عیالیم ندور منیم
بیر ایل کئچور بو صحنه ده بیر ساعت عاشقه
..
..
من تشنیم وصال حقه جانی نیلورم
مین دردیم اولسا دردیمه درمانی نیلورم
هشتاده دین بو زلف پریشانی نیلورم
عشقین فشاری هی گتورر سرعت عاشقه
..
..
من قتلگاهه پهن إئدرم جا نمازیمی
یاریم گؤرر او حالیده راز و نیازیمی
آلّام کسیلمیش اللریله امتیازیمی
روز جزا پناه آپارار امّت عاشقه
..
..
سنده بو خوردا قیزلاری سرباز دین إئله
هم درد و هم مرام ایله همراز دین إئله
قرآن تلاوت ابله خوش آواز دین إئله
دین اوسته خوشدی گر إئله سه خدمت عاشقه
..
..
چک بیر کناره لشگروی من گئدوم باجی
قرآن و دین خطرده دى درمان إئدوم باجی
منکه مرامیمی سنه بیربیر دئدوم باجی
واجبدی هر نه دن بیلوسن نهضت عاشقه
..
..
آلدیم ال اوسته اصغری دنیانی داغلادیم
اوخ دگدی گولدی اصغریم امّا من آغلادیم
امضاء اولوندی دفتری ، پیمانی باغلادیم
قدرت ویروب او وقته ید قدرت عاشقه
..
..
عاشق گرکدی عشقیده پُر افتخار اولا
فخر ایلیه ئوز عشقینه صاحب وقار اولا
غم بوته سینده سعى إئده کامل عیار اولا
قیمت گذاری حق اولا پُر قیمت عاشقه
..
..
سعی ایله باجی طایر روحون سیخیلماسون
عاشق گرک بو عشق یولون ترک قیلماسون
آتدان حسین یخیلسادا پرچم یخیلماسون
لازمدى قانلو پرچم حرّیت عاشقه
..
..
بو آخرین وداعدى خداحافظ ایلیَم
جانانه من گرک گئدوب ئوز دردیمی دییَم
چک دوره دن کناره بو قیزلاری نیلیَم
عاشق دیمز له گر ایلسه غفلت عاشقه
..
..
بیماری قویما خیمه یانان وقته یانماقا
یوخ وقت فرصت ایله زماندا بویانماقا
پروانه تک پر آج باجی سن اوتدا یانماقا
قویما یانا کمک إئله بی طاقت عاشقه
..
..
گر ممکن اولسا گلمه چنین وقته یانیمه
باخما مقام عشقیده کی سازمانیمه
یغ بلبلان عشقی یانان آشیانیمه
الله رضاسی وار ایلسون خدمت عشقه
..
..
من راه عشقه بذل إئدورم باش و جانیمی
جانانه واگذار إئدورم سازمانیمی
من صادق عاشقم وئرم ئوز امتحانیمی
عاشق مجازی اولسا یتر ذلّت عاشقه
..
..
سن خوردا قیزلاری باجی ساخلا پناهیده
خیمه یاناندا قویما یانا خیمه گاهیده
تقسیم غارت ائتمگه دور شاهراهیده
عشقین قواسی اوندا ویرر جرأت عاشقه
..
..
قویما حسن نشانه سینی خیمه دن چخا
آشفته حال او بلبل شیرین سخن چخا
چکمیله سینم اوسته گرک باش کسن چخا
روحیم دوشه فشاره ویره لذّت عاشقه
..
..
..
#وداع #نخستین #حسینیه_وداع #ترکی #زبدةالاشعار
نظر دهید