حالات خروج از مدینه
.
✍️ #زبدةالاشعار ✍️
.
🆔: @nohe_torki
.
مرحوم طوری
.
✔️ وداع قبر رسول اکرم (ص)
.
خیال هجرتی پیغمبر اوغلی جزم ایلدی
وداع قبر رسول انامی عزم ایلدی
.
مشرّف اولدی ضریح منور و پاکه
سلام ایلدی مصداق نور لولاکه
.
مزار جدّینه حسرت گوزیله بیر باخدی
بیر آه چکدی که افلاکی یاندوروب یاخدى
.
زبسکه غصّه لنوب دولدی اشک تر گوزونه
شروع ایلدی گوز یاشی آخماقا یوزونه
.
او قدر آغلادی دلدن دوشوب اولوب بیتاب
یخلدی قبر پیمبر یانندا ایلدی خواب
.
امام عالم رویاده گوردی پیغمبر
گلور ولیک یوزه گوز یاشین نثار ایلر
.
یتشدی گوتدی یر اوزدن حسینینون یوزونی
قولونی حایل ایدوب بویننا اوپوب گوزونی
.
بویوردی ای گوزیمون نوری ای حبیبیم حسین
مریض معصیت امّته طبیبیم حسین
.
گوزوم ایوینده دی دشت بلاده لب عطشان
سنی یخوبلا چوخور یرده قانیوه غلطان
.
بو نازنین بدنین ایلیوبله صد پاره
شماره سیزدی او صد پاره جسمیده یاره
.
گلوبدی یانیما زهرا و مرتضی و حسن
بودور مرامیم اوغول سنده یانیمه گله سن
.
حسین جدّینه عرض ایتدی یا رسول الله
گیدنده ایمدی منی خدمتونده قیل همراه
.
بو عنصر بدنین محبسینده دوستاقم
لقای حضرت پروردگاره مشتاقم
.
بویوردی یا ولدی ، خالق حیات و ممات
سنه بهشتیده تعیین ایدوب بیوک درجات
.
قویوب بنا سنی آب و گل شفاعتیله
یتشمه سن او مقامه مگر شهادتیله
.
اویاندی وحشتیله خوابدن امام زمان
ایدردی جدّینه احوالینی بو نوع بیان
.
✔️ زبانحال امام حسین با پیامبر
.
بیوک بیر امره حسینون ایدوب اراده بابا
ارادهسی بودی تاپسون بقا فناده بابا
.
شرایط عملندن بیان ایدوم نچه سین
که اولماسون سنه درد سریم زیاده بابا
.
حضور حقده ویرم بیر نمایش عالی
بنای صحنم اولا دشت کربلاده بابا
.
حریم کعبه ده مقصوده باغلیم احرام
ایدم او دشتیده حجّیمدن استفاده بابا
.
منیم فدالریمون مذبحی دکل بو منا
گرکدی ذبح اولونا باطنی مناده بابا
.
قالا جنازه لری اوچ گون اوچ گجه یرده
یزیده باشلاری تحفه گیده جداده بابا
.
بنی امیه گله آل هاشم آغلیه قان
آخاندا ثار خدا سو کیمی نژاده بابا
.
چادرلاریم یانا عصمتلی عترتیم سویولا
اسیر اولا هاموسی فرقۀ عناده بابا
.
یارالی باشیمی آت توپراسندا خولیِ دون
شتابیله آپارا زادۀ زیاده بابا
.
سنان و شمر آپارا اهل بیتمی شامه
او ذلّتیله که گلمز گمانی باده بابا
.
بالا اوشاق ، دوه عریان ، موکل ظالم
مینمّیوب قاچالا یولّاری پیاده بابا
.
حرملریم گیده بزم یزیده افسرده
شراب ایچه او خبیث حرامزاده بابا
.
الینده چوب قباقینده تختۀ شطرنج
برابرینده باشیم طشتک طلاده بابا
.
دانیشدیراندا باجیم زینبی او تخم زنا
آتام علی اسداللهی یولّا داده بابا
.
وراندا لبلریمه خیزران یزید پلید
ایدلّه ضجه سماواتیان سماده بابا
بولار که عرض ایلدیم عشردن بیر عشر اولماز
اولار که شرط اولوب اونسون بو ماجراده بابا
.
گناهکار دی « طوری» ولیک چوخ آغلار
منیله زینبه هر مجلس عزاده بابا
.
اولونجا صبح مناجات ایدوب نماز قیلوب
حضور حضرت جاناندا کشف راز قیلوب
.
نماز صبحی ادا ایلدی عزیز بتول
حرمسراسینه تشریف آپاردی زار و ملول
.
بویوردی عترتینه محنتیله همدم اولون
گلن گجه سفر مکّیه مصمم اولون
.
بو ماجرانی دانشماقدان امتناع ایلیون
قالان قبیله میزی بیر به بیر وداع ایلیون
.
على الخصوص که صغری وطنده قالمالیدور
چخاتمیون اونی یادان که یاده سالمالیدور
.
پیمبرین قاپوسین بو قیزیم آچار باغلار
بیزی شهید ایلینده عزا دوتار آغلار
.
آناسی یوخدی اودی دلشکسته دور بو بالام
غُل مصیبتله پای بسته دور بو بالام
.
او دم که محضر شهدن بو امر اولوب صادر
حرمسرای امامتده حشر اولوب ظاهر
.
✔️ وداع حضرت علی اکبر با حضرت صغری
.
وداعه اولدولا مشغول آل پیغمبر
مریضه خواهرینون گلدی یاننه اکبر
.
سلام ویردی ازل غم کشیده صغرایه
دیدی نه حالده سن ای بلایه پیرایه
.
حرارت مرضون سنده حدّتی نجه دور
بو گون آزالماقی یا اینکه شدّتی نجه دور
.
بو التفاتی علیدن گوروب خانم صغری
دیدی منی ایلدون ای مسیح دم احیا
.
ولیک سنده على طرفه بیر نظر گورورم
باخاندا حالتیوه عازم سفر گورورم
.
بویوردی ای باجی ایتمه بو حالی استسفار
قاباقدا آل علینون بیوک مصیبتی وار
.
مدینه دن بو گجه شاه انس و جان گیده جاق
دوشوب رکابینه اون یدّی نوجوان گیده جاق
.
مخدّرات حرم خانه و غلام و کنیز
از او کسکه طالب اولا ویرسون امتحان گیده جاق
.
تشکر ایله سنه قسمت اولمادی بو سفر
بو بیر سفردی شهید و اسیر اولان گیده جاق
.
بتول نایبه سی ختم الأنبیاء نوه سی
اسیر اولانلارا اولماقه پاسبان گیده جاق
.
پیمبر اوغلنون امری اولوب اورا منجر
بنی امیه الیندن قاچوب نهان گیده جاق
.
وجودی علت غائی وجود امنه اولان
که بلکه بیت خداده تاپا امان گیده جاق
.
ولیک آلمیه جان دارالامّته ایمن
بلا دیارینه گوز یاشلی باغریقان گیده جاق
.
جوان و پیر و صغیر و کبیر و سودامری
بلا چولونده الیندن یگان یگان گیده جاق
.
یولا سالاندا على اصغری اؤپوب ایگله
خدنگ حرملیه اولماقا نشان گیده جاق
.
أوتوز مین اهل جفا بیر حسینه حمله ایدر
خیام طاهره دن گوگلره فغان گیده جاق
.
جنازه سی قالاجاق اوچ گون اوچ گجه یرده
جدا باشندا باشی شامه ارمغان گیده جاق
.
قالاندا نعشی چوخور یرده اون بیریمجی گجه
الینی کسماقا بی دین ساربان گیده جاق
.
او گونکه عزم سفر ایلدی دمشقه گیده
تنور خولیه اوّلده میهمان گیده جاق
.
گیدنده شامه حیا معدنی خانم عمه
بیز اولماروخ یانیجا شمریله سنان گیده جاق
.
جوانی، سودامری، قارداشی، عزیزی ئولن
دمشقه بیر بیله گوز یاشلی کاروان گیده جاق
.
امیدواریدی « طوری» بو جمعیله گلن ایل
حسین دیه دیه قبرینه نوحه خوان گیده جاق
.
سوزون تمامه یتور دی عزیز ختم ماب
زبانحالیله صغری بو نوعی و بردی جواب
.
بو قدر آغلاما ای گوزلریم ضیاسی علی
او آغلیان گوزون اولسون باجون فداسی علی
.
مریضه ام منی بو حالیله قویوب گیتمه
ترحّم ائت من بیماره حق رضاسی علی
.
آنام ئولوبدی اوزوم ناخوشام غمیم چوخدی
شکسته دل اولی قیز اولماسا آناسی علی
.
خوشا رباب و سکینه رقیه نون گونونه
یانندادی اولارین مهربان آتاسی علی
.
تصور ایله نولور بیر مریضه نون حالی
قالا تک ایوده گیده قوم و اقرباسی علی
.
غم مفارقتون غصّه مرگ ایدر بولّم
سن اولماسان باجوین خوار اولار عزاسی على
.
شفا امیدی نجه بیر مریضه ویرمک اولور
که غصّه و غم اولا شربت و غذاسی علی
.
سپاه محنت و اندوه فوج فوج گلور
آچوبدی باشیمون اوستونده غم لواسی علی
.
عمولر، عمّه لریم هم آنام هاموز گیدیسوز
نجه اوجالماسون عرشه باجون نواسی علی
.
جمالون آئینه سی گوسترور من زاره
ندور سنون بو سفرده باشون بلاسی علی
.
ایشتمیشم بویوراردی پیمبر صادق
حسین اوغلومون حتمی دی کربلاسی علی
.
یخالّا قولسوز علمدارینی یاتار علمی
جهانی دولدوری فریاد وا اخاسی علی
.
او یرده قاسمه بیر طوی دوتار که دامادین
اولور باشندان آخان قانی طوی حناسی علی
.
دینده دشمنه هل ناصر ینصرنی
گوی اهلینی گتورر درده التماسی علی
.
همیشه « طوری» ایدر ذکر کربلا غمینی
باشوندا واردی اونون کربلا هواسی على
.
علیله فاطمه اولدی علیله هم آغوش
او قدر آغلادیلار دوشدولر یره بیهوش
.
سو سپدی جاریه لر باجی قارداشون یوزینه
دوباره هر ایکی سی گلدی غشّدن اوزونه
.
وداع ایلدی صغرانی شبه پیغمبر
حرمسرایه قویوب یوز گوزونده اشک بصر
.
یتشدی گوردی مهیا اولوبدی محملّر
سوار اولماقا لیلی علی یولون گوزلر
.
کجاوه لرده حرملر هامی دوتوبدی قرار
بتول نایبه سی زینب اولمیوبدی سوار
.
خیالی اولدی خانم عمه سین سوار ایلسون
بو خدمتیله مباهات و افتخار ایلسون
.
دیدی ای عمّه منی قوم ایچنده ممتاز ائت
منیم الیمله سوار اول منی سرافراز ائت
.
دونوب صاقا صولا بیر باخدی بنت مرضیّین
بویوردی هاردادی بس قارداشیم امام حسین
.
گلوب اوزی منی تخت روانه میندورسون
مقام و شأنیمی عالملره بولوندورسون
.
امام کون و مکانه عیانیدی مطلب
ندور بو باره ده مکنون خاطر زینب
.
اوزون یتوردی شتابیله نازلی خواهرینه
نوازش ایلدی قائم مقام مادرینه
.
دیدی نه خواهشون اولسا باجی گوزوم اوسته
میننده محمل زرتاره گل دیزیم اوسته
.
✔️ #گریز #غارت_خیام
.
جلال و شوکتیله شاه آسمان و زمین
مدینه ده ایلدی زینبی کجاوه نشین
.
بو یرده آتش غم اولدی شعله ور دلده
آخوب گوزوم یاشی خامه سیزیلدادی الده
.
مجسّم اولدی گوزیمده بو غم کشیده خانم
بلا چولونده اولان قامتی خمیده خانم
.
او گونکه غارته گیتدی جلالی قارداشینون
سویولدی دشمن الینده عیالی قارداشینون
.
ایاق یالین باش آچوخ آل عصمت اطهار
داغلدیلار چوله برّه کیمی صغار و کبار
.
نظرده ایله مجسّم او پوزقون احوالی
یغار نه نوع بیر عورت او قدر اطفالی
.
یغنجا بیر یره خوردا اوشاقلارین چولدن
او قدر رنج و مشقّت چکوب دوشوب دلدن
.
یانق چادرلارى بند ایلدی بیری بیرینه
تهیه ایلدی بیر خیمه گاه اوزلرینه
.
آلوب کنارینه هشتاده دین عزیزی ئولن
بش آلتی ساعتین عرضینده قامتی بوکولن
.
او هولناک بیاباندا تیره چادرده
نجه گیچندیله ایتمز خطور خاطرده
.
گجه او خیمه ده الله بولور نه حالتیدی
کمال نقصیدی ظلمه دیسم قیامتیدی
.
فراش ریگ بیابان ، چراغ شعلۀ آه
طعام خون جگر، نوحه خوان صدای سپاه
.
✔️ #گریز #کوچ_کربلا
.
گجه گچوب سحر اولدی یتشدی وقت زوال
قوتولدی دفن ملاعندن اول سپاه ضلال
.
اراده ایلدیلر شهر کوفیه گیدولر
پیمبر عترتینی ظلمبله اسیر ایده لر
.
ایدوبله ظلملرین ظاهر اهل آفاقه
گتوردولر نچه عریان مهار سیز ناقه
.
معیّن ایلدی سعد اوغلی بیر نچه مأمور
سوار ایتماقا ایتسونله زینبی مجبور
.
دایاندی خیمه قباقینده ابن ذالجوشن
شماتتیله دیدی زینبه گوزین روشن
.
قوجاقلیوب دیزیوی ایلمه اوزون دلگیر
گتورمشم سنه مرکب دور ایلمه تأخیر
.
امیر کوفه عمرسعده گوندروب فرمان
جلالیله آپارام کوفیه سیزی مهمان
.
ولیک بول نجه دور اهل کوفه کرداری
قوناقی باشی آچوخ گزدورلَّه بازاری
.
بو وضعدن صورا بزمه قوناق اولور وارد
گلولّه دیده زن و مرد طارد و شارد
.
قوناقچی اگلشو مهمان دورار ایاق اوسته
او عیش ایدر بولار آغلار ولیک آهسته
.
خلاصه ظلم الینی آچدی فرقه ملعون
مخدرات همان خیمه دن ایدوب بیرون
.
بالا اوشاقلاری قومأخدان ایتدیله خسته
دوتوب آتاردیلار اوچ طفلی بیر دوه اوسته
.
مخدرات نه نحویله اولدی ناقه سوار
دله گتورماقا دلدن کمال شرمیم وار
.
کمال رقّتیله بنت شهریار نجف
توجّه ایلدی گودال قتلگاهه طرف
.
زبانحالیله قارداشینا خطاب ایلدی
یانوقلی دیللری عالملری کباب ایلدی
.
مطوّل اولدی کلام ایتمرم داخی تصدیع
مدینیه قیدوب ایلورم سوزی تبدیع
.
✔️ #خروج_مدینه
.
بتول نایبه سی دوتدى محمل ایچره قرار
قالان خانملاریدا نوجوانلار ایتدی سوار
.
جلال و جاهیله شبه رسول ربّانی
سوار محمل زرپوش ایتدی لیلانی
.
حسن نشانه سی شهزاده قاسم ناکام
ویروب آناسینا زیبنده محمل ایچره مقام
.
کنار محمل زینبده یدّی قارداشی
دوزولدی هر بیرینون الده تیغ خون پاشی
.
اولوب مقدمة الجیش برگزیدۀ ناس
علم الینده علمدار کربلا عباس
.
ایدنده کوچ وطندن امام کون و مکان
دوشوب رکابنه دورت مین رشید پیر و جوان
.
او وقتیده که قویوردی اوزی رکابه قدم
اولوندی قلبینه الهام صبر ایله بیر دم
.
✔️ وداع امام با محمد حنفیه
.
محمد حنفیه ایشتدی بو خبری
عزیز فاطمه نون وار ارادۀ سفری
.
امام خدمتنه گلدی چوخ شتابیله
آخا آخا یوزه گوز یاشی اضطرابیله
.
سلام ویردی جواب سلامنی آلدی
نجه دیوم ایکی قارداش نه حالته قالدى
.
بیری بیرینی باسوب باغرینا ایکی قارداش
آخاردی چشمه کیمی یوزلرینه گوزدن یاش
.
محمد عرض ایلدی یابن مکة و منا
تمام عالمه سن سن بو گون امام هدی
.
مدار عالم و کونه مدیر ثالث سن
مکوّناته سبب عقل کلّه وارث سن
.
ائدوبدی حق سنی عین حقیقته منهاج
دگلسن هیچ کسون عقل و رأینه محتاج
.
اراده اللهون اولماز اراده سنده خطا
لسان ناطق حقون دگل کلامی هوا
.
قصور عقلیمه من ایلورم اوزوم اقرار
ولی محبتیم ایلر جسارته وادار
.
فدا اولوم سنه ملک عراقه ائتمه سفر
که قورخورام سنه اولسون او پر محل خطر
.
آتام علیدن ایشیتدیم که کوفیان عنید
سویون یانندا حسینی سوسوز ایده لّه شهید
.
علاوه بیر پارا سوزلر دیوب ولی خدا
گتورمگه دلیمه ایلورم اوزومدن حیا
.
بو قدر عرض ایدرم گیتمه کربلایه حسین
روا دگل سالاسان باشوی بلایه حسین
.
بو امتناعیم اگر اولماسا محل قبول
أیکمجی عرضیمی ایله قبول یابن رسول
.
لقای یاره سنون وار باشوندا شوق وصال
آپارما کوی نگاره یانونجا اهل و عیال
.
خدا نخواسته ئلدورسه اهل کوفه سنی
ترحم أیلمز اولادیوه او قوم دنی
.
عناد اوزیله بیری ایلیه امامی شهید
نه گلسه فکریوه اوندان دگل او ظلم بعید
.
او کسکه سویدی امامین تن مطهرینی
یقینیدور سویاجاق اهل بیت مضطرینی
.
محل شبهه دگل کشفدور سنه مطلب
اسیر اولوب گیده جاق شامه دربدر زینب
.
محمدین بو سوزونده بتول نایبه سی
ایله پوزولدی که بی اختیار اوجالدی سسی
.
کجاوه دن چخادوب باشینی او عصمت حق
ویرن بساط بسیط شهادته رونق
.
دیدی محمده بو سوزلری بیان ایلمه
حسینمون اورگین لخته لخته قان ایلمه
.
آتام بو حادثه نی تک نه بیر سنه بویوروب
منه حسینمه هم امّ ایمنه بویوروب
.
محالیدور چکم ال نور هر دو عینمدن
ئولنجه آیری دوشم بیر گجه حسینمدن
.
بو یرده آخدی یوزه «طوری» گوزلریم یاشی
مجسم اولدی گوزومده یارالی قارداشی
.
✔️ #گریز #قتلگاه #کوچ_کربلا
.
او ساعتی که یولی دوشدی قانلی میدانه
گوزی ساتاشدی او دورت مین یارالی عریانه
.
یره آتوب اوزونی پشت ناقه دن قاچدی
قاچا قاچا هر ایکی باغلانان قولون آچدی
.
او پاره پاره اولان نعشی باسدی آغوشه
اور کلنوب اورگینده غمی گلوب جوشه
.
گوروب نه جسمیده باش وار نه ال نه بارماق وار
یارالی عضولر اوسته نشان دیرناق وار
.
تن مطهرینی دوغریوبلا بند به بند
قاتوبلا بیر بیره لحم و عظامی سمّ سمند
.
دولاندروب یوزونی سمت یثربه باخدی
دل پیمبری جنّتده یاندروب یاخدی
.
دیدی بابا بو سنون نور هر دو عینیندور
بوغازینی لبینی اوپدیگون حسینیندور
.
توجه ایله نه حاله سالوبلا گور بدنین
کفایت ایله میوبله بونا کسوبله الین
.
باشی الی کسلوب تنده چوخ جراحتی وار
علاوه بو یارالار زخم نار علامتی وار
.
دیردی جدی رسول خدایه درد دلین
یتشدی قمچی الینده او دمده شمر لعین
.
نه ظلم ایدوب آیروب خواهری برادردن
ایشتمه سن اونی هرگز بیر اهل منبردن
.
بو قدر عرض ائدرم ایش اولوب هارا منجر
که آغلادی خانمون وضع حالینه لشگر
.
اشاره ایله مسم تا ندور حقیقت حال
گلور خیالیمه ایراد ایلسون جُهّال
.
دیوب امام او دانای کل مستورات
کلام جامعه سینه شعور منشورات
.
بو اولدی بو هامی سوزدن نتیجۀ مطلب
نجه حسیندن آیرلدی بس خانم زینب
.
یارالی قارداشنین قویدی یرده گل بدنین
دیار کوفیه دوندردی یوز ملول و حزین
.
گینه خیالیم ایدوب مرغ طبعیمی ترغیب
اوچوب مدینیه ایتسون کلامنی تعقیب
.
✔️ #خروج_مدینه
.
گوروب محمد ایدنمز بو عزمدن ترفیع
تلاوت ایلدی حسرتله آیۀ ترجیع
.
بویوردی خادمنه شاه دین امام امم
بو یرده حاضر ایله کاغذ و دوات و قلم
.
اطاعت ایلدی امر امامه خدمتکار
حضور شهده بویوردوقلارون ایدوب احضار
.
پیمبر اوغلى وصیّت لرین ایدوب ترقیم
ایدوب محمّده اوز دست خطّینی تسلیم
.
بویوردی ای آتام اوغلی بو شهرده سن قال
نه حادث اولسا منه ویر خبر بودور احوال
.
وداع ایلدی قارداشینی امام جلیل
ویروب او قافلۀ کربلایه اذن رحیل
.
مدینه قافله سی کربلایه یولّاندی
اگر دیسم یری وار عرش غمدن اودلاندی
.
#آمدن_ملائک_و_جن_خدمت_امام
.
مدینه دن حرکت ایلیوب امام زمان
یاننجا اهل و عیالی حجازه اولدی روان
.
صحابه دن بیری عرض ایتدی حجت اللهه
فدا اولوم سنه ایله یولیوی بی راهه
.
مدینه حاکمی شاید سپاه گوندرسون
کسوب قباقیوی یولدان دوباره دوندرسون
.
او شخصه لطفیله فرمایش ایتدی شاه زمن
گرک یولیله گیدم هر دیاره گیتسم من
.
بو علّته که ولیّ حق قدیمم من
حقیقت آختارانا راه مستقیمم من
.
منه وظیفه دی گمراهی من هدایت ایدم
نجه اولور من اوزوم جاده دن کناره گیدم
.
نه قدر یتمه میشم کربلایه ایله یقین
تاپانماز ال منه اولادیمه جماعت کین
.
او دمده خدمتینه نازل اولدی فوج ملک
سلام ایدوب دیدی ای علّت مدار فلک
.
بیزه گوره نه دور امرون بویور ایداخ اجرا
وجود دشمنیوی ایلیک بیر آندا فنا
.
بو گفتگو آراسندا یتشدی زعفر جن
سالوب یانینجا گتورمشدی بیر وزیر مسن
.
اولار دین سوزی زعفرده ایلدی اظهار
که یعنی قویماسون آل امیه دن آثار
.
وئروب جواب سلام هر ایکی گروهه امام
نوازش ایلدی هر فرد فرده تام ینام
.
بویوردی سیز قییدون امروزه اولون مشغول
خدا بو خدمتی سیزلردن ایلسون مقبول
.
ولیک ماه محرمده فرقۀ شورا
شهید ایدلّه منی عصر یوم عاشورا
.
سیزه گینه دئمورم من گلون عیاد تیمه
ولیک امر ایلورم گلماقا زیارتیمه
.
دوباره ایلدی اظهار جن سلطانی
اجازه ویر ائلیاخ دفع شرّ اعدانی
.
اگر دیسن بیزی گورمز او فرقۀ کفره
اولار کیمی دوشروخ بیزده صورت بشره
.
بویوردی سرور دین من ولیّ یکتایم
مراد دفع عدو اولسا سیزدن اولایم
.
منم امام منم قدرت خدای قدیر
منم ادارۀ کلّ مکوّناته مدیر
.
ایدوبدی معرفت حقّه ، حق منی منهاج
هاچان اولوب اولا منهاج ظلمته محتاج
.
بو امری فرض ایلیوب ذوالجلال والاکرام
گرک منیله تاپا امر فرض حق اتمام
.
گیدون مقاموزه اوز مسکنوزده راحت اولون
گر ایسته سوز اولاسوز فیض یاب او ساعت اولون
.
قیتدی هر ایکی فرقه یرینه رأفتیله
سایاردیلار گونی آیی کمال دقتیله
.
بو جنّ لر بو ملک لر نه وقت دست به هم
گلوبله کرب و بلایه یرینده عرض ایدرم
.
#خیال_هجرتی_پیغمبر_اوغلی_جزم_ایلدی
#ترکی
.
✍️ #زبدةالاشعار ✍️
.
🆔: @nohe_torki
نظر دهید