شب عاشورا
..
..
مرحوم تائب تبریزی
..
..
دشمن ویروبدی مهلت ای کربلالی زینب
یاتسون بنات عصمت راحت بلالی زینب
..
..
دئ نازنین اوشاقلار ایتسونله استراحت
سن صبحه تک دعا قیل منده ایدوم عبادت
بو لیل غم فزانین صبحینده وار قیامت
بو بیر قیامتین وار چوخ شرح حالی زینب
..
..
صبح اولسا نوجوانلار قانه باتار بو چولده
بو خاک کربلایه قانین قاتار بو چولده
صاحب علم له پرچم باهم یاتار بو چولده
پیر و جوان دوشللر یورقون یارالی زینب
..
..
لیلا تاپار جوانین قان ایچره قانه غلطان
یرده گورور دوشوبدور گُل تک وجودی خندان
بلبل کیمی گول اوسته شوریله باشلار افغان
دیلدن یانار سیزیلدار اوخشار یارالی زینب
..
..
سویله سریّه آلسون اوز قاسمین کناره
اوغلون دویونجا گورسون باری او قلبی یاره
اولسا سحر سالاللار قان ایچره پاره پاره
بیر عمر اونی ایده للر باشی قرالی زینب
..
..
اصغر آناسی چکسون آغوشه دلرباسین
اوپسون بوغازین آلسون بیر عطر جانفزاسین
اولسا سحر بوغازدان اوخلار عدو بالاسین
بلبل کیمی قالار اول شور و نوالی زینب
..
..
ای درد غم شریکیم غملر یتر غم اوسته
ماتم ویرر سنه یوز بو چولده ماتم اوسته
عبّاسیمی یخاللار بو نهر علقم اوسته
قوللارینی سالاللار تندن آرالی زینب
..
..
ای فاطمه باخیشلی ای یادگار زهرا
اوغلانلارون گیت ایله قربانلیقا مهیّا
یوز گوزلرین اوپ ایله حسرتله قیل تماشا
باس باغریوا دویونجا باشی بلالی زینب
..
..
بیر بو گئجه بو چولده امکان و مهلتیم وار
من ایلرم عبادت تا الده فرصتیم وار
اولسا سحر عیاندور شور قیامتیم وار
وار شرکتون سنونده مهر و وفالی زینب
..
..
باجی گرک حسینون درک شهادت ایتسون
برنامه سین قوتارسون عالی مرامه یتسون
سعی ایله سنده قویما قانیم آراده گتسون
مندن صورا قیام ایت ای کربلالی زینب
..
..
قانه باتام گرک من تا کشف مطلب اولسون
جاندان گیچم جهاندا احیای مذهب اولسون
مندن صورا گرکدور غوغای زینب اولسون
تا نهضتیمده گلسون نقصین کمالی زینب
..
..
«تائب» سوزی اوزاتما قیل مختصر کلامی
احیای دین و قرآن اولموش حسین مرامی
زنده ایدوبدی زینب نهضتله بو قیامی
تضمین ایدوب همیشه بو ایده آلی زینب
..
..
..
..
#شب_عاشورا #تائب_تبریزی #ترکی #زبدةالاشعار
نظر دهید