دفن شهدا
.
✍️زبدةالاشعار✍️
?: @nohe_torki
.
هدایتی تبریزی
.
دریای مصیبتده گرفتار بلایم
گرداب غم یارده مغروق عزایم
حیرت زدۀ حالت دفن شهدایم
بیلمم نئجه گلدی او چوله سرور عبّاد
دفن ایتدی آتا قارداشنی سید سجاد
.
گوز یاشلی گلیب کرب و بلا دشتنه مولا
گوردی دایانیب ایلیری بیر عدّه تماشا
ایلیر شهدانین بدنی یرده تجلّا
باشدان گئچیب هر تک تکی مقصوده چاتیب لار
قان بسترینی خوش گوروب آسوده یاتبلار
.
بیر پاک بدن لر کی نظیری گله هیهات
لاهوتی لری ایلیب ایثارلری مات
پامال اولوب ، عرش اهلینه ایلورله مباهات
باشسیز یارالی پیکر عریان توکولوبدور
قول دور کسیلیب پنجه دی یان یان توکولوبدور
.
فرمایش ایدیب دفن شهیدانه گلیب سیز
دفن ایلماقا اشرف انسانه گلیب سیز
حامی اولاسیز یا من نالانه گلیب سیز
سیزده ئوزوزی دعوت ایدین من کیمی صبره
ابدان شهیدانی قویاق بو گجه قبره
.
بیر قدر گزیب صاق سولا بیر یرده دایاندی
باخدی بابانین مصرع خونینینه یاندی
گوز یاشی آخیب صورتی اشکیله بویاندی
چوخ حسرتیله اول یارالی پیکره باخدی
ظلمیله سنیب پخش اولونان گوهره باخدی
.
ایتدی آتانین دفنینه بیر قبر محیّا
ایستیردی قویا قبره آتا جسمنی ، امّا
هر یاندان الین آتدی ، الینده قالیب اعضا
هئچ گل بلی گلشنده بونوعی سولا بیلمز
قبره آتانین جسمی گوروب حمل اولا بیلمز
.
بیر قدر باخیب گوزلری اطرافنه خیره
تاپمادی کفن کی بوکه اعضاء امیره
آخرده قناعت ایلدی کهنه حصیره
نعشین یانینا سالدی گویه آهی اوجالدی
آهسته چکیب نعشی حصیر اوستونه سالدی
.
قرآن داغلیب آیۀ قرآنی توکولدی
سنمشدی صدف لوء لوء مرجانی توکولدی
ال دگدی ، آچلدی یارالار قانی توکولدی
قان سوزدی ، حصیری ایلدی قانیله سیراب
قرمز شفقه چولقالانیب مهر جهان تاب
.
بیر جسم کی باشدان باشا یکسر یارالی دی
بارماق یارالی دی ، کسیک اللر یارالی دی
داغلی ئورگی یاره لی ، حنجر یارالی دی
خنجر یرینه قویدی دوداقین یانا یانه
ئوپدی بوغازندان اوجادان گلدی فغانه
.
خوش حالینه بو یر سنی آغوشینه آلدی
گیتدین ، بو جهان دودۀ ظلمتده قارالدی
جهلین آغاجی ریشه لنیب هر دم اوجالدی
نورونله بابا آخرتی روشن ایدبسن
ظلمتده قویوب عالمی عقبایه گیدبسن
.
بیر قدر ئورک دردینی شرح ایلدی یاندی
گوز یاشی آخیب عارضی اشکیله بویاندی
امر ایتدی ، گلن لر او بیابانی دولاندی
تاپدی جسد اصغر عطشانی گتیردی
حلقی بیچلن تیریله ، قربانی گتیردی
.
دلسیز بالانی گورجاق امامین قانی جوشدی
گوردی آتانین سینه سی اوسته یری بوشدی
گتدی بالانین نعشین آتا نعشینه قوشدی
اوخ پارچالیان گوهری گنجینیه قویدی
یعنی بالانی اوخ داغیدان سینیه قویدی
.
اطرافده وار گوردی کی چوخ جان ویرن عاشق
لایق هامیسی اشرف و زهّاد خلایق
یاتماقه ایاق آلتدا بیلیب اکبری لایق
امر ایلدی اکبر بدنین تئز گتیریبلر
نه حالیله بیلمم ولی یردن گوتوروبلر
.
گلبرگی پراکنده خزان دیده گولیدی
از بس چوخودی یاره عبایه بوکولیدی
صاف یر یوخودی قطعه به قطعه سوکولیدی
قویدی ایاق آلتدا بالانین نعشینی ساده
گویا یارالی جسمینی دفن ایتدی عباده
.
ئورتدی آتانین قبرینی تا حجّت یزدان
بیر جمله یازیب ویردی هامی عالمه اعلان
بو قبر حسین دور ، سو یانیندا ئولوب عطشان
طاغوت زمانیله جهاد ایلدی ئولدی
ایثاریله ظلمون دوه سین پیلدی ئولدی
.
بیر قبریده دفن ایلدی سونرا شهدانی
هم قاسمی ، عبدللهی ، مردان خدانی
هم زینبین اوغلانلارین هم آل عبانی
هم پیر حبیبیله بریریله زهیری
اهل کرم و جود و برّ و بخشش و خیری
.
یوز قویدی سورا حضرت او دم علقمه ساری
دلده عمو آدی گوزونون گوزیاشی جاری
گورجاخ عمونون نعشینی صلب اولدی قراری
عرشه اوجادوب ناله و فریاد و فغانین
سسلندی اولا باشنه تپراق بو جهانین
.
بیر قبر ایلدی حاضر او سردار دلیره
حسرتله نظاره ایدیب اعضاء وزیره
گوردی اوقدر یاره وروبلار کی او شیره
باشی کسیلیب ظلموله اللر کسیلیب دیر
پیکر دیمه اعضاسی سراسر کسیلیب دیر
.
یغدی عمونون پیکرینی خیرداجا قبره
گوزیاشنی دوندردی گینه بارش ابره
سعی ایلدی تسلیم اولا هر چند که صبره
قویدی دوداقین نحر اولونان حنجرین ئوپدی
بیرده گوتوروب حیدر ئوپن اللرین ئوپدی
.
الله سنه رحمت ایده ای ثانی حیدر
غبطه ایدر احوالوه جنّتده شهیدلر
جعفرله وورارسان عمو جنّاتده شهپر
جنّتده دولان شاد و خرامان سنه قربان
بیز کوفه ده افسرده و نالان سنه قربان
.
#دفن_شهدا
#دریای_مصیبتده_گرفتار_بلایم
#هدایت_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید