دور ای وئرن سو کنارینده تشنه جان یارالی #عاصی_تبریزی

کوچ از کربلا
.
زبدة الاشعار

?: @nohe_torki
.
مرحوم عاصی تبریزی
.
زبانحال حضرت زینب:
.
دور ای وئرن سو کنارینده تشنه جان یارالی
باجوی سال یولا کوچ ائتدی کاروان یارالی
.
اذان وئرولّه مسافر دالینجا رسمدی بو
بو رسمه ایله عمل وئرگیلن اذان یارالی
.
نه حالیمی بُولَنیم وار نه دردیمه یِتَنیم
ائدوبدی باغریمی غم لخته لخته قان یارالی
.
گَلَنده اکبر و عباس پاسبانیمدی
دیردیلر هاموسی سسلینده جان یارالی
.
کومکلریم قریلوب عزّتیم گئدیب الدن
ائدوبدی بار محن قدّیمی کمان یارالی
.
دوتوبدی جانیمی وحشت ز بس آغیردی سفر
اولوب علاوه بیزه شمر پاسبان یارالی
.
مَنِ فلک زده نی نطقه گل دانیشدیر بیر
نه خواب نازیدی قوم اوسته بیر اویان یارالی
.
حسین نیه دئموسن قولّارون ندن قَرَلوب
سوروش مصیبتیمی ائیلیوم بیان یارالی
.
او قدر قمچی دیوب قولّاریم اولوب یاره
صاقالماز حشره کیمی یاره لر اینان یارالی
.
یارالی نعشوین اطرافی خلوت اولسیدی
یارالاریمی وئرردیم سنه نشان یارالی
.
نه فایده کی آلوب دوره می سپاه دنی
دویونجا قویمور ائدم ناله کوفیان یارالی
.
سنان و خولی و زجرین الیندن اهل حرم
تمامیسی گَتوروبلر سنه امان یارالی
.
یوخومدی بیر زادیم الده تالانموشام قارداش
ائدوم بو جسموه من باری سایبان یارالی
.
نقدر وار نفسیم آغلارام سنه یانّام
سیزیلدارام دیرم جان وئرنجه جان یارالی
.
فغانله دیوب اوخشاردی قارداشین زینب
توکردی سو کیمی رخساره گوز یاشین زینب
.
باخوب یاناردی گهی اهل کینه ، کینه سنه
یارالی نعشنی گاهی باساردی سینه سنه
.
ائیله سیزیلدیوب اوخشاردی زینب نالان
گلوردی رِقَّته آغلاردی لشگر عُدوان
.
توکردی گوز یاشنی گول یوزه مثال سحاب
باخاردی گاهی او نعشه ائدردی بئله خطاب
.
خطاب حضرت زینب به برادرش :
.
آتام علی اولا قربان او غُصَّه لی ئولنه
قناعت ائیلدی بیر پاره پاره پیرهنه
.
آتام فدا اونا کی جان وئرنده ایچمدی سو
او کهنه پیرهنینده چخارتدی قوم عدو
.
اولا منیم او آتام بیر یارالیه قربان
که اولدی لشگری مغلوب خیمه سی تالان
.
آتام فدا اونا کی دردی عالمی یاخدی
ئولنده سو دیدی سمت فراته چوخ باخدی
.
آتام فدا اونا کی جان وئرنده قوم عنید
که قویمادی اونی اوز اهل عیالی ائیلیه دید
.
آتام علی او شهیدون اولیدی قربانی
حنوطی تربتی اولدی که غُسلی اوز قانی
.
آتام فدا اونا که حقّه امتحان وئردی
سو ایچمدی سو کنارینده تشنه جان وئردی
.
آتام فدا اونا که بی حساب یاره سی وار
نه صاف یری نه جراحاتنون شمارسی وار
.
فدا اولا او شهید آتام علی ، ولی
نه باشی وار بدنینده و نه بیلکده الی
.
آتام فدا اونا کی رنگی گول کیمی سولدی
ئولنده وئرمدیلر سو او تشنه ذبح اولدی
.

زبانحال حضرت زینب به جده گرامیش :
.
دونوب مدینیه که عرض ائدردی یا جدّا
باخوب حسینوه نه حاله گور سالوب یا جدا
.
همان حسین کی سنون بیر عزیز جانویدی
حُسینُ مِنّی ، همیشه بابا بیانویدی
.
گل ایندی گور اونی بیر امّتون نه حاله سالوب
نه پیکرینده لباسی نه باش بدنده قالوب
.
اولوب گوزوندن ایراق ، پاره پاره گول بدنی
مُرُوَّت ائیلمیوب هرگز اشقیای دَنی
.
بو سهلدور کی کسوب بارماقین بو قوم لَعین
ائدوبله قطع بیلکدن بابا هر ایکی اَلین
.
ایا پیمبر رحمت رسول عالمیان
حسینه باخ نئجه گور قاننه اولوب غلطان
.
سویوبلا رختنی عُریان قالوب قوری یرده
یارالی نعشنه قانی بابا چکوب پرده
.
یانور بابا اورکیم اهل کینه کینه سنه
وروبلا دورت مین اوخی بیر یارالی سینه سنه
.
ئوولونجه وار یری توکسم عُذاره گوز یاشینی
سوسوز کسوبله قفادن حسینون باشینی
.

تسلی دادن حضرت زینب به امام سجاد :
.

ائیله سیزیلدیوب اوخشاردی زینب مضطر
گلوردی رقّته آغلاردی حالینه لشگر
.
دوشوب او حالیده سجّاده ناگهان نظری
گوروب یوزونده هویدادی احتضار اثری
.
جهازسیز دوه اوسته او سیّد نالان
باخور او حاله یانور آز قالور که وئرسون جان
.
بولوب بو باره ده لازمدی اهتمام اولسون
مباد حُجّت حق غصّه دن تمام اولسون
.
یانقلی خاطرینه بو قضیّه اود ، وردی
وداع ائیلدی قارداش جنازه سین دوردی
.
کسوب علاقه سینی قارداشیندان حسرتیله
حضور سیّد سجّاده گلدی سرعتیله
.
دیدی اوغول علی عمَّن اولا سنه قربان
نه غصّه دی سنی بو نوعیله ائدوب حیران
.
نیه بو حاله قالوبسان بو اضطراب ندور
بو اودلی آه ندور دلده التهاب ندور
.
بو نحویلن که توکورسن عُذاره اشگ بَصَر
بویور گوروم علی بس نیلَسون مُخَدَّره لر
.
اگر چه وار یری صبرون غم و ملال آلسون
سن آغلیاندا اولار بس نه حالته قالسون
.
تیکوبدی گوز سنه بو بیر بویوک اوشاق عورت
تسلی ویر اوزیوه اولما بئله بی طاقت
.

زبانحال حضرت سجاد به حضرت زینب :
.
بویوردی عمه سبب وار بو داد و شیونیمه
عبث دگول آخور اشگیم بو نوع دامنیمه
.
نه بو طناب و نه بوینومداکی بو سلسله دور
منی بو حاله سالان عمّه جان بو مسئله دیر
.
بوگون ایونده کی عریان بدنلری گوردوم
قوری یر اوسته قالان بی کفن لری گوردوم
.
که یوخدی غسل و کفن ائیلین بو اجساده
نئجه دوشوبله او نوعی قالوبلا صحراده
.
منای مهر و وفانون بولار فدالریدور
طریق و مذهب و آئین رهنمالریدور
.
صَلاتی قائم ایدن حافظان قرآندور
بولار تمامیسی ای عمه جان مسلماندور
.
ائدوب ئولنلرینی دفن فرقۀ گمراه
قوری یر اوسته قالوب جسم اولیاء الله
.
امام فکرینی لازم یولوب ائده مشغول
دئدی اوغول بو قدر اولما دلفگار و ملول
.

راجع به حدیث ام ایمن:
.
حدیث معتبریم واردی ام ایمَندن
اونادا جدّیم اوزی ذکر ائدوب ائشیت مَندَن
.
دئدی بویوردی منه بیر گونی رسول الله
گل ائیلیوم سنی من بیر قضیّه دن آگاه
.
حسینمی اولی بیر گون شرار اهل نفاق
عراقه دعوت ایدلَّر اونی به رسم قوناق
.
ز بسکه نامه یازالّار ایدلّه چوخ اصرار
عراقه گتماقا آخر بالام قالار ناچار
.
عیانی گوتوروب عاقبت او شاه زَمَن
مین حسرتیله حسینیم اولار جَلای وطن
.
اوزین صحابه لرین کربلا دیارینده
سوسوز شهید ایدلَّر سووین کنارینده
.
یارالی نعشلری نچه گون قالار یرده
اولاری اهل قُرا دفن ایدللر آخرده
.
بو قبرلر اولاجاخ شیعیه زیارت گاه
مقام تربتنی غبطه ائیلر عرش اِلاه
.
طواف ایدلَّه آتان شاه مشرقین قبرین
باسالّا شیعه لر آغوشینه حسین قبرین
.
توکلَّه گوز یاشی آغلالّا های هائیلن
ایدلَّه نوحه بو لب تشنیه نوائیلن
.
همیشه شیعه لر اشگ بَصر یوزه باغلار
مُدام حسینی سوونلَر حسین دیر آغلار
.
گَلولّه نالیه اوغلی ئولن آنالار تک
اولار مزاری هامی صاف قلبُ ، قلبه محک
.
او کسلرون کی اولار قارداشیما اخلاصی
خدا گئچر گنهوندن ولو اولا «عاصی»
.

#کوچ_کربلا
#دور_ای_وئرن_سو_کنارینده_تشنه_جان_یارالی
#عاصی_تبریزی
#ترکی
.
#زبدةالاشعار

?: @nohe_torki