کوچ از کربلا
.
✍️ زبدة الاشعار ✍️
?: @nohe_torki
.
مرحوم ناظم آقا تبریزی
.
دور ای ویرن قوری یرلرده تشنه جان قارداش
باشون دالونجا گیدور شامه کاروان قارداش
.
قالوبدی گل بدنون بیکفن نه چاره ایدیم
باشوی شمر ایلیوب زینت سنان قارداش
.
سویوبلا پیکریوی قالمیوبدی پیرهنین
نه رحمسیزدیله بو قوم کوفیان قارداش
.
قویوبلا اوچ گجه گوندوزدی پیکرون عریان
بو چولده یوخدی سنون حالوه یانان قارداش
.
قولومی رشته عشقونله باغلیوب دشمن
او عشقدور منی بو گونلره سالان قارداش
.
باشیما قمچی وورار شمر آغلیاندا سنه
گوگلده غملریوی ایتموشم نهان قارداش
.
سالوبدی نعشوی صد پاره قوملار اوستنده
باشوی شمر آپارور شامه ارمغان قارداش
.
گلنده کرب و بلایه مدینه دن واریدی
منیله اکبر و عباس هم عنان قارداش
.
شهید اولوبدی بو صحراده یار و انصاریم
اولوبلا آل علی جمله باغریقان قارداش
.
ایچوبدی قاسم اجل جامنی بو صحراده
اولوبدی عترتوه خولی پاسبان قارداش
.
ووروبلا عابد بیماره بیر آغیر زنجیر
اوزی علیل بدن خسته ناتوان قارداش
.
سکینه ناله ایدن وقته ناقه اوستنده
وورار سکینه وی بی رحم ساربان قارداش
.
چوخ اضطراب ایدوری قورخورا سکینوندن
گیدونجه شامه ویره حسرتیله جان قارداش
.
قباقجا قانلی باشون خولی کوفیه آپاروب
ایدر تنورده کول اوسته میهمان قارداش
.
باشین بلاسین آلوم سیر ایدور جدالرده
خیالی وار ایلسون دیرده مکان قارداش
.
گیدونجه مجلس ابن زیاده قانلی باشون
شماتت ایلر او دم قوم کوفیان قارداش
.
یزید مجلسنون کوفه دن سراغین آلوب
گیدور گوره ستم چوب خیزران قارداش
.
اولوب بیر عمریدی مشتاق کربلا (ناظم)
اولا او قبر شریفونده نوحه خوان قارداش
.
#کوچ_کربلا
#دور_ای_ویرن_قوری_یرلرده_تشنه_جان_قارداش
#ناظم_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید