شهادت حضرت علی اکبر (ع)
زبانحال امام حسین (ع)
.
.
حاج اسماعیل زرین
.
.
دور باشون اوسته گلمیشم گوزلریمه ضیا اوغول
گل دیله منله بیر دانیش قلبیمه وئر صفا اوغول
.
.
گور نه چتیندی من گورم ظلمیله قانه با تموسان
زخملی آهو تک دوشوب ایستی قوم اوسته یاتموسان
سیل سرشگیمی آخان قانیوه یرده قاتموسان
بیله یخیلماقون ائدر مرگیمه اکتفا اوغول
.
.
سن منه نور عین سن دیزلریمه توان و تاب
روحیم او قدری قالموری آیریلا ویر منه جواب
صورتیمی اوغول ائدوب باشدان آخان قانون خضاب
دور دورا بیلمورم اؤزون اول الیمه عصا اوغول
.
.
گتدی او دم که قاصد غم منه غملو بیر پیام
یعنی قولاقیمه یتوب اوندا که دلنشین سلام
بولدوم او دمده قلبیمون بندینی قیردی اهل شام
دردینه قلبیمون داخی اولمیاجاق دوا اوغول
.
.
گر چه تمام عشقیله من سنی وئرمیشم فدا
راه خداده اولموشام درد فراقیوه رضا
لیک نئجه گوروم سنی تیغیله دوغریوب عدا
گور اولی باشون اوسته من ایلمیوم نوا اوغول
.
.
ایله حصار محنته لشکر غم سالوب منی
قرب کناریده گوزوم گورموری غصّه دن سنی
عرشه اوجاتموشام اودور داد و فغان و شیونی
گر چه گولور بو حالیمه دشمن بی حیا اوغول
.
.
من نئجه یانمیوم اوغول سن کیمی نوجوانیمه
سن دانیشاندا هر زمان قوت یتردی جانیمه
دست قضا سَپوپدی غم توپراقی دودمانیمه
آغلیاجاق نه قدری وار عمه باجی آنا اوغول
.
.
گور نه بو قوم کینه جو اولدولا حقّدن کنار
ائتدی پیمبر عترتین بیر بئله غملره دچار
جدّیمه بنزیَن جوان یئرده دوشوبدی زخمدار
جسم لطیفوون اولوب هر طرفی یارا اوغول
.
.
جام شهادتی ایچوب مقصده نائل اولموسان
وصل نگاره چاتموسان لطفونه شامل اولموسان
زر کیمی بوطه دن چیخوب رتبه ده کامل اولموسان
ایمدی سنه باخان دیر عشقیوه مرحبا اوغول
.
.
عشق خدادی رتبه و شأن و مقامون آرتوران
دینیوه چوخ بصیریدون دلده سوزوندی آندیران
راه خداده سن کیمی کیمدی اوغول قدم ووران
حقّیوى یاخشى ایلدون دینیوه سن ادا اغول
.
.
بینش حقّیله قدم راه خداده وورموسان
گورموسن حق رضاسی وار حال رضاده دورموسان
یاره سالوبدی نطقدن سسلورم ایمدی دورموسان
داعی حقّه حقّیله سویله میسن بلا اوغول
.
.
من دگُلم فقط سنه بیله اؤرکدن آغلیان
کون و مکاندی مؤمنون دردینه سینه داغلیان
سیل سرشگی صورته جدّیم آتامدى باغلیان
حق آدی دلده اولموسان دینیوه سن فدا اوغول
.
.
جسمیوی بند بند ائدوب تیغیله قوم اشقیا
قطعه به قطعه دوغریوب ایلمیوبله اکتفا
باشدا واروندی بیر یارا مثل على مرتضی
قتله یتوبدی گوئیا سرور اولیا اوغول
.
.
گلموری جسمده على یاره لرون شماریه
بنزوری یاره جسمده هر بیری بیر ستاریه
دل دوتولار باخاندا بو پیکر پاره پاریه
حالیمی لیک چوخ پوزوب سینه ده کی یارا اوغول
.
.
بولمورم ایمدی نیلورم سن کیمی مبتلایه من
حملینه نعشوون گرک چنگ ویرام عبایه من
نه دلیله خبر ویروم لیلی بی نوایه من
نازلو سکینه خیمه ده سسلوری وا اخا اوغول
.
.
دور بئله نازیله اوغول ایستی قوم اوسته یاتما سن
بیله شکسته حالیله توپراقا قانه باتما سن
ناله می عرش طاقنه بسدی بیله اوجاتما سن
دور عوض ایله سیروی بُرجده مه لقا اوغول
.
.
بی کس آتان بو دشتده درد و بلا انیسی دور
ایستی هوا سو یوخلوقی داد و نوا انیسی دور
دشمن آلوبدی دوره سین جور و جفا انیسی دور
گوزلریمه ایشیق گونی تار ائدوب اشقیا اوغول
.
.
ظلمیله کریلا یولون سد ائلیوبدی مفسدین
«زرّینه» چوخ چتیندی بو گورمیه قبرین اکبرین
محفل غمده دائماً آغلوری چوخ حزین حزین
ایسته خدا گئدوب اولا زائر بو آتا اوغول
.
.
.
.
#اکبریه #اسماعیل_زرین #اکبریه_شهادت #ترکی #زبدةالاشعار
نظر دهید