شجاعت حضرت امام حسین علیه السلام
.
.
ابوالفضل فرهنگی
.
.
نوۀ حضرت پیغمبر مختار حسین
پسر شیردل حیدر کرار حسین
.
سید و سرور و سالار شهیدان لقبی
دین پیغمبر اسلامه فدا ام و ابی
.
قاپوسی باب رجا دهریده نومیدلره
آبرو کسب ائدن عالمده تمام بشره
.
عرش اعلایه تولدده گئدن قنداقی
كائنات اهلی گؤزل قنداقینون مشتاقی
.
پیک حق بدو تولدده بشیک تَرپَدَنی
حوریلر دایه کیمی دوره ده لایلای دئیَنی
.
پنجمین اختر تابندۀ اسپهر ولا
معدن جود و سخا و کرم و لطف و عطا
.
جهل و ظلمتده کی انسانلارا مصباح هدى
موج گردابه دوشن شیعه لره راهگشا
.
ائتمین بیعت ازلدن طلقازاده لره
درس حرّیت و عشق اؤرگدن آزاده لره
.
روز عاشوریده کی اولدی جرى قوم عدو
لشکر کفر و نفاقیله اولوب رو در رو
.
حضرت فاطمه نون صاحب تدبیر اوغلی
قویدی میدانه قدم شیر حقون شیر اوغلی
.
کربلاده او نمایندۀ حیّ ازلی
ئوز دوتوب لشکر اشراره حسین ابن على
.
ذكر بسم اللهیلن لبلرینی باز ائلدى
سؤزلرین باشلادی خاتم کیمی اعجاز ائلدی
.
الله آدیله ویروب بیربیره عطشان لبینی
بیر به بیر ذكر ائلیوب دلده اولان مطلبینی
.
دیدی ای لشکر اشرار حسینم تانیون
جدّیم احمددی، اونا نور دوعینم تانیون
.
آسمان شرفین اولدوزونون اوغلی منم
ختم پیغمبر رحمت قیزینون اوغلی منم
.
شه خیبر کن و اژدرفکنین اوغلی منم
جنگ خیبرده کی مرحب بؤلنین اوغلی منم
.
صاحب بخشش و جود و کرمین قارداشیام
افتخاریمدی امام حسنون قارداشیام
.
قویموشام عرصۀ میدانه قدم مردانه
حجّت اتمام ائلییَم آل ابوسفیانه
.
جنگی لنگ ایلمرم شیر کیمی جنگ ائدرم
باشوزا عالم امکانی بو گون تنگ ائدرم
.
تانیمورسوز تانیون مظهر عزّ و شرفم
کیم علی دشمنی گر اولسا اونیلان طرفم
.
حاكم سیطرۀ ارض و سماوات منم
عزّتیله بویوران ذلّته هیهات منم
.
گلمیشم باشلاروزی تیغیمه آماج ایلیم
حیدرین دشمنینون عمرینی تاراج ایلیم
.
ایسته سم جانوزه شمشیریله اود ساللام من
طُرفةُ العِینیله نهرین سویونی آللام من
.
دیلیمون ازبری یا حیدر و یا زهرادی
ذوالفقاره اَل آپارسام سیزه واویلادی
.
یئری وار باشوزه گردون فلک کول الیه
چون معاویه یه سیز فخر ائدیسوز، من علی یَه
.
شمر، دستور وئروب هلهله تئز سالدى قوشون
دورت طرفدن آقانین دوره سینی آلدى قوشون
.
تک به تک رزمه روان اولدولار اوّلده، ولی
ذوالفقاریله بؤلوب هر گَلَنی پور على
.
الغرض جنگیده کیم تن به تنه تن وئردی
توش اولوب تیغ حسینه جانین الدن وئردی
.
گنه ذی الجوشنین اوغلی قوشونا سان وئردی
وئردی دستور گیدون، جنگه گئدن جان وئردی
.
گؤرملی صحنه دی شاهنشه فرخنده لقا
اوجا صوتیله اورکدن چاغیرور یازهرا
.
خنجرین گه سولا سرعتله ویرور گه ساقه
آرادا پیکر بی سردی دوشور توپراقه
.
تن بی سرلری تؤپراقه دوشور جان داغیلور
باشلاری گویده دگور بیربیره اوندان داغیلور
.
شه یاخونلاشدی غرض مرکز میدانه طرف
چوخی مرکبدن انوب قاچدی بیابانه طرف
.
چکدی بیر نعرۀ دیگر وسط میداندا
دیدی کیم ویردی ابوالفضلیمی نخلستاندا
.
منیم عباسیمه شمشیر ویران شوم و دغا
گیزلنوب هاردا جسارت واری گلسون قاباقا
.
دئمورم جنگیمه سرکرده و افسر گلسون
دئمورم حرمله یا نوفل کافر گلسون
.
دئمورم کوفه لیلر جنگیمه کم کم گلسون
سعدین اوغلون دئیورم شمریله باهم گلسون
.
ایستورم شمریله سعد اوغلی گؤره هیبتیمی
اولارا ثابت ائدم فوق بشر قدرتیمی
.
ذوالفقاریم اولارین پیکرینه اود قالیا
تیغیمون بیر طرفی هر ایکیسین پارچالیا
.
ولی افسوس تکم یوخ یئته بیر کس دادیما
نیلیوم دوشدی ابوالفضل دلاور یادیما
.
دئمورم قارداش اویان گؤر بورا نه غوغادی
دئیورم ئولسم اگر قیزلارا واویلادی
.
.
.
#حسینیه #فرهنگی #حسینیه_شجاعت #ترکی #زبدةالاشعار
نظر دهید