وداع شهزاده علی اکبر علیه السلام
.
.
علومی تبریزی
.
.
خیمه لرده سس دوشوب جنگه علی اکبر گیدور
باشدا وار شوق شهادت شبهه پیغمبر گیدور
.
.
گل تماشا ایله گور بیر نوگل زیبادی بو
خَلقاً خُلقاً شبیه حضرت طاهادی بو
جان جانان حسیندی طاقت لیلادی بو
اذن آلوب میدانه گویا حیدر و صفدر گیدور
.
.
ایستدی بیلسون هامو باشیندا نه سوداسی وار
بیرده دیدار ایله سین چون عاشق شیداسی وار
خیمه لرده باغریقان مجنون اولان لیلاسی وار
گورسه بس نیلر قتاله خیمه دن اکبر گیدور
.
.
بیلدی بو حالی توکولدی خیمه دن خرد و کبار
شاه زاده اکبرین شوریله دورین آلدیلار
بانوان بی قراره محشر اولدی آشکار
قالمادی دللرده طاقت گوردولر دلبر گیدور
.
.
شورش لیلا سالوبدی باشلارا بیر اوزگه شور
وای عزیزیم وای سسیندن قوزانوب شور نشور
بیر طرفدن عمّه لر بیر یاندا قزلار آغلاشور
اوزگه بیر هنگامه دور دردانۀ مادر گیدور
.
.
گوردولر لیلا آتوب قیدی قاچوب دیوانه وار
اکبرین آغوشه باسدی ایتدی گوز یاشین نثار
عرض ایدوب صبر ایت آنا، بیکسدی شاه دل فکار
افتخار ایت اوغلون اکبردی اونا یاور گیدور
.
.
شاه مظلومان گورنده بو اسف لى منظری
سسلدی زینب گتور عمامۀ پیغمبری
قویدی اکبر باشینا سالدى نظامه اکبری
یعنی بو صحرادن اکبر آدلی پیغمبر گیدور
.
.
ایستدی آیرلسون اکبر ناگهان بی صبر و تاب
گوردولر اصغر آناسی گلماقا ایلور شتاب
اللری اوسته علی اصغردی عرض ایلور رباب
یول ویرون قارداشینون دیدارینه اصغر گیدور
.
.
اصغری اکبر آلوب آغوش محنت بارینه
گل دوداقنده نظر سالدى عطش آثارینه
بیر فراته باخدی بیرده اصغرین رخسارینه
گوردی آفات خزانه غنچۀ احمر گیدور
.
.
گتدی اکبر رزمگاهه جمله حیران قالدولار
ایلدی جنگ و جدل اطرافین آخر آلدولار
آه او ساعتدن اونی میداندا آتدان سالدولار
خیمه لردن گوردولر داده شه محشر گیدور
.
.
گئچمه دی بیر آز زمان گوردی حرملر دلده آه
اکبرین نعشین گتوردی شهریار بی پناه
اولدی لیلانین گوزونده صحنۀ عالم سیاه
چوخ پریشان باشی اوسته لیلی مضطر گیدور
.
.
بو زبانحالیله بسدی بو سوز اولسون تمام
سسلنوردی ای گلستانیمده بیر سرو خرام
نه جسارتله سنی سالدى بو حاله اهل شام
پیکروندن لخته لخته قاندی سر تا سر گیدور
.
.
#اکبریه #علومی_تبریزی #اکبریه_شهادت #ترکی #زبدةالاشعار
نظر دهید