اربعین
.
..
#سبک_یارالی_جان_یارالی و … شهریاریمسن … کربلا منتظر …
..
..
حاج اصغر فرشچی
.
..
دورحسین سینوین اوستونده بالاندان دانشاق
ایاقون آتدا یاتان تشنه جَواندان دانشاق
..
یارالی آی یارالی قانینه غلطان یارالی
زینبون جانی اولا قبریوه قربان یارلی
..
..
شامیدن گلدی باجون اشک غمین قانه قاتان
قبریدن دور ایاقا زینبینی گوزدن آتان
ثاری ثارالله اولان وصلت جانانه چاتان
دور حسین گوز یاشینی قانه قاتاندان دانشاق
..
..
کیم بولور قرخ گجه دی من نه مصیبت چکورم
تیرغمله گینه ده سینمی قارداش دلورم
یاد ایدوب قتلگهون گوزیاشی گوزدن الورم
قتلگهده او شقی شمر و سناندان دانشاق
..
..
سویله سن درد و غمون سینمه من آلّام اوزوم
چادرعشق قوروب بوردا حسین قالّام اوزوم
قبریوه گون دوشوری سایه دوروب سالّام اوزوم
دوردانش دردون آلوم دردون آلاندان دانشاق
..
..
زینبون دل ویروب ازّلدن او عاشقدی سنه
خواهشیم واردی حسین لطفون اگر اولسا منه
قول بویون منله اولاق دور بو بیاباندا گینه
یدی قارداشی اولن تز قوجالاندان دانشاق
..
..
سینوین اوسته اولان اصغرون آغلور یا یاتوب
صود امردی صود اموب یا بالا صود فکرین آتوب
آغلاماخدان آناسی گوزیاشینی قانه قاتوب
فکری ذکری بالا وایدی اوخ آتاندان دانشاق
..
..
نوجوان اکبره دِی لیلی دوروب قبره باخور
گوز یاشین گوزدن اَلور قلبینه غم تیری تاخور
سوروشور یاره لری یاخشیدی یا قانی آخور
گلموشم خشک ایلیم قانی آخاندان دانشاق
..
..
ای اولان گونده گونوم جمله گجمده منه ماه
آیرولان ساعت حسین اولدی منه لیل سیاه
دِمَه دون من باجووام ایلمه دون بیرجه نگاه
آیرولان ساعتی فرض ایت او زماندان دانشاق
..
..
خنجر شمری دوتان وقتیده اودلاندیم حسین
حنجرون خنجر اوپنده قوجالوب یاندیم حسین
جسمووی عور گوروب دلدن الولاندیم حسین
خاک خونین و اسن باد خزاندان دانشاق
..
..
سسلدیم شمره سو ویراُولما رضا تشنه اُله
یتمدیم مقصدیمه گلمدی منظوریم اَله
سوسوز اولدوردی سنی سوجریان تاپدی چوله
دورآنام فاطمه نون مَهری اولاندان دانشاق
..
..
بو قانون محکم ایدر پایۀ قرآنی حسین
نهضتون صادر اولار دولدوری دنیانی حسین
اهل عالم تانی یر سنکمی سلطانی حسین
تقویت ایلیین ایمانلاری قاندان دانشاق
..
..
گوندوزی خسته اولان قزلاری یغدیم باشیما
آغلیوب گوز یاشی توکدوخ سن اُولن قارداشیما
غملرون باعث اولوب قان قاروشا گوز یاشیما
یاتمادوخ اول گجه نی غملی مکاندان دانشاق
..
..
قوردی بیر محفل غم زینبون ای شاه زمن
یاتمیوب صبحه کیمی سید سجّاد نه ده من
تسلیت ویرماقا هیچ اولمادی بیر کیمسه گلن
بیر گلن شام غریبانه آناندان دانشاق
..
..
چون سحر اولدی گینه دوندی گوزوم یاشی سله
مندیروب ناقه لره چوخ بالالار گلدی دِلَه
هر معذّب اولونان زینبوه ایتدی گله
شامه یولاندی قطار شمرو سَناندان دانشاق
..
..
دور حسین دوره لیوب توزلی مزارون بالالار
قرخ گجه گوندی بو گون قلبرین غم یارالار
دور گلنلر هاموسی گلدیلر حاجت آلالار
بیر شیرین دیللی قزون قالدی قالاندان دانشاق
..
..
آناما اوخشاری اوچ یاشداگوزل خردا بالان
کشتی بحر بلا موجولی طوفاندا قالان
قورخودان چولده قالوب عمه لرین درده سالان
گلمدی یاتدی او شام ایچره یاتاندان دانشاق
..
..
هی گورردیم قزیوی گوزدن حسین قان یاش الر
من دیردیم بالاوا آغلاما جانیم بو قدر
آمنین من دیم ایستردی دعا ایتسه اگر
اوگوزل صورتینه اشکی رواندان دانشاق
..
..
قوری دیواره قویوب بیر گجه گل چهره یوزون
ال آچوب درگه یزدانه دیوب صوندا سوزون
ایستدی ایتدی دعاباشه چاتا عمری قزون
استجابت دُعاسی حقّه اولاندان دانشاق
..
..
تا خرابه یرینه گلدی باشون گوردی سنی
یاندیروب هم اوزونی هم آنانی همده منی
سسلدی وای بابا وای باش یره قویدی علنی
سسلیین وای بابا وای جانی چخاندان دانشاق
..
..
من اونا قبر قازاندا بالالار آغلادیلار
تاپشوران وقته مزاره سینه لر داغلادیلار
غم گورونلر قره اوستن قره سین باغلادیلار
شام ویراندا یاتان خردا بالاندان دانشاق
..
..
من گَرَک گوز یاشیمی دِلده اولان قانه قاتام
یثربی ترک ایلیوب باشدا وطن فکرین آتام
او یاتوب شامیده چون منده گیدوب اوردا یاتام
اورگی غمله دولوب قلبی دولاندان دانشاق
..
..
کربلا شوقی گینه «عدلنی» دیلدن سالوری
محفل غمده اوخور سیته سینی غم آلوری
بولموری وار نه قدر عُمردن آز چوخ قالوری
کربلاسین یاز اونون اشکی رواندان دانشاق
.
.
#اربعین
#دور_حسین_سینوین_اوستونده_بالاندان_دانشاق
#عدلی_تبریزی
#ترکی
#زبدةالاشعار
نظر دهید