شهادت امام حسین (ع)
.
.
علومی تبریزی
.
.
دولدوردی حسین وای سسی دنیانی الهی
گوندر گله اوغلى آلا بو قانی الهی
.
.
.
یتمشدی ازلدن اونا پیغام شهادت
گوزلوردی که بیر گون یته ایام شهادت
وقت اولدی ایچه شوقیله بیر جام شهادت
آغلار گوزیله عترت طاهادن ال اوزدی
زهرا بالاسی زینب کبرادن ال اوزدی
.
.
.
بو حالی گوروب آل علی اولدی مکدّر
بیر سس چکوب آغلاشدولا اولدم هامو یکسر
فرمایش زینبدی بو سوز سویلر او مضطر
گویا بیزی ازّلدن حسینیم تانموردی
باشسیز حرمون نور دوعینیم تانموردی
.
.
.
میدانه یتوب سرور دین هادی مطلق
یوز دوتدی دیدی دشمنه ای فرقۀ ناحق
آیا بیلوسوز من کیمم عالمده محقق
دین صاحبی کیمدور سیزه عالمده یقیندی
آفاقده مندن صورا کیم صاحب دیندی
.
.
.
ئولدوردوز علی اکبریمی بسدی جماعت
اوخلاندی بالام قزلاریما اولدی قیامت
سیزدن گچرم حشرده ای اهل شقاوت
سیزده یول آچون یثرب بطهایه گیدوم من
یا اوز چویریم قورخولی صحرایه گیدوم من
.
.
.
گتدوز منی ای کوفه لیلر بو چوله مهمان
مهمانوزی قویدوز بو بیابانیده عطشان
ایللَّه قوناقه بیله حرمت بیله احسان
زهرایه جوابوز ندی بس روز جزاده
طغیان ائلیوبسوز چه سواره چه پیاده
.
.
.
سو ایستدی اولادینه فرزند پیمبر
رحم ایلمدی یعنی قبول ائتمدی لشگر
زهرا قیزنا اولمادی بیر کیمسنه یاور
اتمام ایلدی حجّتنی اهل جفایه
ایستردی حسین قالمیاسوز روز جزایه
.
.
.
غیظه گلوب آلدى اله شمشیرینی اولدم
ویردی اوزینی دستۀ روباهه چو ضغیم
هم میسره هم میمنه نی ایلدی بر هم
بیر حمله ده پوزدی قوشونون نظم و نظامین
قان ایلدی باغرین او زمان لشگری شامین
.
.
.
صفدر بالاسین گوردوله چون فرقۀ کفار
یوز قویدی فراره داغلوب چوللره اشرار
صفلر پوزولوب یاتدی علم ئولدی علمدار
باشلاری خزان تک یره غیظیله توکردی
طومار سپاهی گه آچوب گاه بوکردی
.
.
.
باش گئتدی بدن تیغ شرر باریله یاندی
میدان بلا لاله کیمی قانه بویاندی
اشراریدن این المفر افلاکه دایاندی
هر یانه دونردی هامو بیردن یول آچاردی
جانین گوتورن حولیله صحرایه قاچاردی
.
.
.
از بس قاریشوب بیر بیرینه آتلو پیاده
هنگامۀ محشر اولوب اول دشت بلاده
پیوندیدی باشلار باشا هر لحظه هواده
هر ناکسه یتسیدی شرر جانه سالاردی
مظلوم آقا اؤز اکبرینون قانین آلاردی
.
.
.
بیر وحشت ایدوب لشگر شاماته نمایان
مأیوس اولوب اشرار دنى قالدولا حیران
افواج ملخ تک داغلوب چوللره دونان
کیمدور که مقابل دورا اول پاک صفاته
آچدی یولی آخرده اوزین سالدی فراته
.
.
.
گوردی سویی توکدی گوزی رخسارینه خوناب
ائتمشدی امامی یارالار سوزشی بی تاب
عطشانیدی چوخ دولدوروب اوجون اولا سیراب
بیر اوخ ویرلوب فاطمه نین گلشنی سولدی
اوخ دگدی دهانی سره سر قانیله دولدی
.
.
.
مطلق یوخوموش فرقۀ بی عاریده ناموس
پیغمبرین اوغلون او زمان ایتدیلر مأیوس
سو ایچمدی دریادن او دم چخدی صد افسوس
غیضیله دوباره اوزینی لشگره ویردی
کفّاری سالوب خوفه گنه بیر بیره ویردی
.
.
.
سعد اوغلی جهنّم کمی بیر چکدی زبانه
فرمان ویروب اشراره او نامرد زمانه
دورت مین اوخ آتان اوخلارینی قویدی کمانه
معناده آچوب باش آناسی زلفنى یولدى
دورت مین اوخا بیر سینه خدایا هدف اولدی
.
.
.
آرتدوقجا یاراسی اورگین سوزی چوخالدی
سوزشده چوخالدوقجا یوزی سولدی سارالدی
قان چشمه کیمی آخدی بس آرامینی آلدى
خستیدی یورولمشدی او سلطان شهادت
آیرلدی اوزین چکدی کناره اولار راحت
.
.
.
بیر سنگ دل اوز بغض نهانین ایلدی تاش
آتدی شه بی یاره طرف ظلمیله بیر داش
آننون یارالاندیردی آچوب شیر خدا باش
قاندان چکلوب صورت گلنارینه پرده
میدانی گوزی گورمدی گلدی دلی درده
.
.
.
آلدى اله دامانین او سلطان لب عطشان
گوزدن سیله قانی یاراسین خشگ ایده بیر آن
فریاد او زماندان که اولوب قلبی نمایان
بیر اوخ گلوب اوز ایتدوقی پیمانه پول آچدی
دگدی دلینه مجلس جانانه پول آچدی
.
.
.
اوچ شعبه لی اوخ تا اورگین باشنی دلدى
زهرا بالاسی بیلدی او اوخ پیک اجلدی
چخدی کورگیندن آقامز توپراقا گلدی
عالم قاریشوب صحن فضا تیره لنوبدی
اولدم باشنا شیعه لرون کول اَلَنوبدی
.
.
.
بو ناله که شیعه ایدوری بزمده ظاهر
حسرت چکوری بو عمله پور مظاهر
مجلسده خانم فاطمه دائم اولی حاضر
چوخ با ادب اول مجلس ماتمده علومی
اوندان گوزل ایش یوخدی بو عالمده علومی
.
.
.
#حسینیه #علومی_تبریزی #حسینیه_شهادت #ترکی #زبدةالاشعار
نظر دهید