شب عاشورا
.
.
مرحوم عاصی تبریزی
.
.
بو قان اولان اوره گیم بیقراریدور بو گئجه
سبب اودور که گوزوم اشگباریدور بو گئجه
.
سالوب وجودیمه آتش شرارۀ آهیم
بو آه شعله سی سوزنده ناریدور بو گئجه
.
بساط کرب و بلا چون گوزومده جلوه لنور
اودور که دامنه اشگیم نثاریدور بوگئجه
.
گورر اگر بیریسی صاحب بصیرت اولاد
که کربلا چولی چوخ پر شراریدور بو گئجه
.
گلوبله نالیه یکسر بنات ختم رسل
دگوبله بیر بیره حشر آشکاریدور بو گئجه
.
آلوب کنارینه بیر یاندا اکبرین لبلا
باخور گورور که اوغول بیقراریدور بو گئجه
.
گهی أؤپور وروری گاه زلفونه شانه
او زلف تک دل ائوی تار ماریدور بو گئجه
.
رباب اصغری بیریاندا چکموش آغوشه
گلوب فغانه ایشی آه و زاریدور بو گئجه
.
گورور عطشدن اوغول کهربا کیمی سارالوب
نه سود واریدی نه سو شرمساریدور بو گئجه
.
گهی سالور قوروموش سینه سینه گه بشیگه
خانم محلّ غم و اضطراریدور بو گئجه
.
سریّه قاسمینه ایندیدن کفن بیچوری
دینمرم که دم احتضاریدور بو گئجه
.
بولور صباح که طوى خلعتی کفن اولاجاق
او غصّه دن اودی دل داغداریدور بو گئجه
.
تمام خوردا اوشاقلار یاتوبلا آسوده
ملال و محنت اولاردان کناریدور بو گئجه
.
قلج الینده گزر دور خیمه ده عباس
محافظ حرم اول نامداریدور بو گئجه
.
باخان او حضرته مطلق بئله خیال ائیلر
على دور الدہ گزر ذوالفقاریدور بو گئجه
.
هامی اونون سَبَبیله یاتوبدولار راحت
حرم سرایه او محکم حصاریدور بو گئجه
.
ولیک دشمن اونون یاتمیوب هراسندن
دوشوبله خوفه هامی هوشیاریدور بو گئجه
.
بو گئجه صبحه کیمی یاتمیوب خانم زینب
حرملر ایچره او چوخ دلفگاریدور بو گئجه
.
حرمسرای امامتده اگلشوب مایوس
باخور حسینه گورور انتظاریدور بو گئجه
.
توکور عذارینه اشگین باخاندا قارداشنا
بِعینَ گوزلری ابر بهاریدور بو گئجه
.
نقدر وار نفسون یاز بو سوزلری عاصی
بو سوزلرون سنه خوش یادگاریدور بو گئجه
.
حسین زیارتی ایسته بو جمعیله أؤزیوه
خوشا او شخصه که خوش روزگاریدور بو گئجه
.
باسوبدی جان تک او شش گوشه قبری آغوشه
ضریح پاک اونا زیب کناریدور بو گئجه
.
دییر اورکده کی گیزلین سوزین او مظلومه
عیان وجودینه بیر انکساریدور بو گئجه
.
باشندا شور حسینی دلینده نام حسین
گوزینده اشگ بصر دلفگاریدور بو گئجه
.
حسین آقا او گوزل قبریوه اؤزوم قربان
خیالیمز بولوسن وصل یاریدور بو گئجه
.
توجه ائیله سنی اوغلون اکبرین جانی
زجاج صاف گوگل پرغباریدور بو گئجه
.
یارالی جانیوه آند اولسون اول گوزل حرمی
بو قان اولان اوره گیم خواستگاریدور بو گئجه
.
بو مرغ دل ائله تیترور زیارتوندن اؤتور
بلا کمندینه گویا شکاریدور بو گئجه
.
نولور که بو گئجه نون مثلی کربلاده اولاخ
هزار شکر دیاخ بخت یاریدور بو گئجه
.
#شب_عاشورا #عاصی_تبریزی #ترکی #زبدةالاشعار
نظر دهید