دیوانه گویول مستیدی چون جام علیدن #حیدریه_حسن_ساکت

دریای کرم
.
.
حاج حسین ساکت خسروشاهی (هویدا)
.
.
دیوانه گویول مستیدی چون جام علیدن
آرام اولوری زمزمۀ نام علیدن
.
آزاد منی قویسادا بو عشق و علاقه
روحوم قوشی پرواز ائلمز دام علیدن
.
تا باغلادیم احرام طواف حرم عشق
دل قویمادی روحوم چیخا احرام علیدن
.
تنها نه منم عاشق سرگشتۀ مولا
جبریل ایاقین چکمزیدی بام علیدن
.
تا سفرۀ جنّات ویره لذّت هستی
بیر ذرّه قاتوبلار نمک شام علیدن
.
علّت بویودی ایتدی ملک آدمه سجده
وار گوردی او توپراقدا می جام علیدن
.
شکّرشکن هنده شکر ایلوری اهدا
«ساکت» آلالی شهد لبین کام علیدن
.
آز دین آدینا ظلم ایله ، ای دینه منادی
تاری قاپووی تختله سین نام علیدن
.
اسلام علی صلح و صفا عشق و وفادی
انسان دویا هیهات که اسلام علیدن
.
مولا قاپوسی گوردون آچیخدی گجه گوندوز
بیر خرقه ده سن اوغرادون احشام علیدن
.
ایثار علی نادره دی عدل علی تک
احسان علی پاره دی اندام علیدن
.
دریای کرم که ایشیدوب سن او علیدی
آئین کرم زنده دی اکرام علیدن
.
الله کیمی اؤز دشمنینی ایستمه دی خوار
قاتلده دوشوب حیرته اقدام علیدن
.
صود حاضر ایدوبله ایچه مولای دو عالم
فریاد اوجالوب لعل جگر فام علیدن
.
امر ایتدی اوغول ویر بو صودی قاتلیم ایچسون
وحشتده دی وار قورخوسی انجام علیدن
.
دشمنده اولا بو گجه مهمان علیدی
محروم اولا قویما کرم عام علیدن
.
ئولدورمرم ئولدورمه سه بو یاره علینی
آزاد ائدرم کام آلا ایّام علیدن
.
اینجیتمه اسیروندی ولو واردی گناهی
سعی ایله محبّت گوره ارحام علیدن
.
بولمم نه سبب اولدی که بیر عدّۀ نادان
درس آلمادیلار بیر بیله پیغام علیدن
.
هر قدر عطا ایتمیشدی مردمه مولا
مین لر ایله قان توکدوله اقوام علیدن
.
.
#حیدریه #حسن_ساکت #حیدریه_مدح #ترکی #زبدةالاشعار