#یتیم #یتیمون … (1)
.
.
.
مرحوم حافظی تبریزی
.
.
دییلّه تیتردی عرش خدانی آهی یتیمون
نه اینکه طفل اولی اولماز اولا گناهی یتیمون
.
یتیمون آیه سی قرآندا واردى تاپشوروب الله
اوزون معرّف ایدوب ذات حق پناهی یتیمون
.
سنقدی قلبی آجقلانمیون سفارش ایدوبدی
بغیشلیون بویوروب اولسا اشتباهی یتیمون
.
یتیمون اوز غمی بسدور اوزینه فکر اولوناندا
خطای محضیدی تنبیه و انتباهی یتیمون
.
یتیملوخ گورن انسان بولر گچر گونی بیر ایل
نولار یاتانماسا بُلمَم شب سیاهی یتیمون
.
بصیرت اهلی تانور باخسا دقتیله گوزوندن
مشخّص ایلر آتاسیزلیقی نگاهی یتیمون
.
امید آتا آنادور کودکه بو رسم جهاندور
اولار که اولمادی اولماز امیدگاهی یتیمون
.
تانیسون ایستوری هر کیم یتیمی باخسا سوزوندن
عیان ایدر بو نچه رمزدور گواهی یتیمون
.
قالار بیری بودی گل مثلی بوینی چیگنینده
پریش زلفی ده ایلر خجل گیاهی یتیمون
.
بودور بیری ده تئز آغلار اورگی نازک اولار چوخ
ایدر آخار سویی شرمنده گوز میاهی یتیمون
.
دله دوتالّا یتیمی نه که دوگله ورالار
دوتار خلاصه بودور آه گاه گاهی یتیمون
.
یتیمی آغلادا هر کیم قالار بالالارى آغلار
دینمورم نقدر شأنی وار الهی یتیمون
.
.
یتیم صحبتی گلدی شرر نهادیمه دوشدی
یتیم آل پیغمبر رقیّه یادمه دوشدی
.
او گجه قالدی بیاباندا کاروان یولا دوشدی
قطار آل على شامه ناگهان یولا دوشدی
.
اویاندی گوردی اوزون تک او قورخولی چول ایچینده
سرشک چشمی اولوب چشمه تک روان یولا دوشدی
.
ایله یانا یانا آغلوردی وحشتیله کانّه
یل اسدی سندی نیستاندا نی فغان یولا دوشدی
.
هارا گئدیدی هاراسی واریدی چاره کسیلدی
او یول که گئتمیشیدی کاروان همان یولا دوشدی
.
گهی دیردی بابا گه باجی گھی آنا گئتمه
گھی دیردی خدا کاروان هاچان یولا دوشدی
.
گھی دوروب یخلوب گه قاچوب دایاندی بیر آز وقت
باخوب اویان بویانا باغریقان یولا دوشدی
.
خانم بیبیم منی یاددان محالیدی چخادییدی
منی قویوب نیه بس تک او مهربان یولا دوشدی
.
(1) شعر مرحوم #انور_اردبیلی در این ردیف از #قیام_زینب با مضرع اول زیر:
#غروب_اولاندا_گیدر_قلبیدن_قراری_یتیمون
.
#راه_شام #حافظی_تبریزی
#دییله_تیتردی_عرش_خدانی_آهی_یتیمون
#ترکی
#زبدةالاشعار
نظر دهید