کوچ از کربلا
.
✍️ #زبدةالاشعار ✍️
.
🆔: @nohe_torki
.
سدید هریسی
.
ذبح ائدنده قاتلین ای روح ایمان باشیوی
من باخیردیم کسمه دی خنجر حسین جان باشیوی
.
بیلمیرم اولموشدی تأثیر دعادن بی اثر
شرمیدن کسمیردی یا خنجر لب عطشان باشیوی
.
تلّیدن گلدیم شتابان تا یئتیشدیم مقتله
سعی قیلدیم حفظ ائدم ای جان جانان باشیوی
.
خنجری اندیردی قاتل منده دوتدوم تیغه سین
مانع اولدوم کسمه سین اول تیغ برّان باشیوی
.
کشمکشده امّا قارداش دوغرانیب بارماقلاریم
آخدی قانیم اللریمدن ائتدی الوان باشیوی
.
سلب اولوب چاره دایاندیم دیدهٔ خونباریله
گؤردوم ایستیر شمر آییرسین قانه غلطان باشیوی
.
چیخدی بی رحمانه اوُل نامرد سینن اؤستونه
اندیریب اون یدّی ضربت کسدی دالدان باشیوی
.
وار یقینیم سن اؤزون وئردین اجازه خنجره
یوخسا کسمزدی سنین ای روح یزدان باشیوی
.
گؤن باتیب ناگه جهانی تیره و تار ایله دی
گؤرمه سینلر بلکه اطفال پریشان باشیوی
.
بلکه ده من شدّت غمدن دوتولدی گؤزلریم
اوندا کی گوردؤم جدا باشیندا بیر آن باشیوی
.
یا طبیعت رحمه گلدی صحنه اولسون استتار
تا ائده اهل حرمدن بلکه پنهان باشیوی
.
یا کی نظمیندن چیخیب او لحظهٔ جانکاهیده
نیزه باشینده گؤروب خورشید تابان باشیوی
.
ساتع اولدی عالمه نور ولایت نیزه دن
چون احاطه ایله میشدی نور ایمان باشیوی
.
صوت قرآنین جداده نشر اولان هنگامه ده
گؤردوم ایلیرلر طواف آیات قرآن باشیوی
.
ای ذبیح اعظم احیاء ایله دین قرآنی سن
دین اسلامین یولونا ائتدین احسان باشیوی
.
هرگجه گؤندوز(سدید) آغلارسنین احوالیوه
نیزه باشیندا مجسم ایلر آلقان باشیوی
.
.
#کوچ_کربلا #سدید_هریسی
#ذبح_ائدنده_قاتلین_ای_روح_ایمان_باشیوی
#ترکی
.
✍️ #زبدةالاشعار ✍️
.
🆔: @nohe_torki
نظر دهید