«یاشاسین عشق»
شور ولایت در ولادت ابی عبدالله الحسین علیه السلام
..
..
مصیبی تبریزی
..
..
ذرّ عالمی عشق ، ایله دی طوفان یاشاسین عشق
عشق اوسته حسین باغلادی پیمان یاشاسین عشق
..
..
عشقیله خدا عالم معنانی یاراتدی
دوقوز فلکی عرش معلانی یاراتدی
عشقیدی کی پیغمبر و زهرانی یاراتدی
ایلوردی خدا عشقینی عنوان یاشاسین عشق
..
..
فردوس برین اولدی ولا نورینه ماوا
انوار تولا وئروب آفاقه تجلا
نور اسداللهیدی پیغمبر و زهرا
عشاقه بو اوچ نور وئروب جان یاشاسین عشق
..
..
باغلاندی او گون بیر بئله پیمان لبِ کوثر
صُلب علی و فاطمه بطنینده مسخّر
بیر نور یارانسین یئره سرور گویه زیور
بو حکمی یازوب عشقیله یزدان یاشاسین عشق
..
..
گون گئچدی زمان دوندی فلک چرخی دولاندی
یثربده او گون گلدی کی نور عرشه دایاندی
بیر عشقین اودوندا فلکین سینه سی یاندی
نه طاق فلک اولدی خروشان ؛ یاشاسین عشق
..
..
امر اولدی کی زهرا و علی عقد ائله سینلر
بیر خطبۀ عقدیله غمی رَغد ائله سینلر (1)
مَهریّه عشقی آرادا نقد ائله سینلر
هر مشکلی عشق ایله دی آسان یاشاسین عشق
..
..
یثربده کی خورشید ولا ماهی چاغوردی
الماس نبوت علوی جاهی چاغوردی
یعنی کی پیمبر اسداللهی چاغوردی
عشق عالمی گوللندی گلستان یاشاسین عشق
..
..
عشقین سَندین مُهر ائله دی خالق واحد
کوثر خانمین مَهری ، پیمبر اونا شاهد
فردوس برین محضر و جبریل اولوب عاقد
معشوقه دیوب عاشقینه جان یاشاسین عشق
..
..
نور علوی تاپدی نبی نورینه پیوند
حاصل بولارین نوری ائدوب عالمی خرسند
ایل گئچدی ایل اوسته جوشوب انوار خداوند
عشق؛آچدی گولون سوم شعبان یاشاسین عشق
..
..
بیربیله گئجه حیدره طوبانی وئروبلر
زهرا خانیما قابله لعیانی وئروبلر
بیربیله گئجه شیعیه دنیانی وئروبلر
اولدی بوگئجه عشق غزلخوان یاشاسین عشق
..
..
وقت اولدی کی حق عالمه وئرسون ثقلینی
لعیانین همان وقفه ایشیقلاندی دوعینی
زهرانی گوروبلر چکور آغوشه حسینی
عشقیله دیور جان سنه قربان یاشاسین عشق
..
..
تا چشم نبی سبط یداللهه ساتاشدی
آغوشه چکوب گول بالانی گوزیاشی داشدی
ئوپدی بوغازیندان ؛ او بالا گوزلرین آچدی
گولدی گولونه عشقیله مستان یاشاسین عشق
..
..
کیم دی بو گوزل گول دئنه سالار زماندی
کیپریک لری پیکان کیمی قاشلاری کماندی
باخ شانینه قنداقیده بیر عرشی دولاندی
گورجاق اونی سسلندی سلیمان یاشاسین عشق
..
..
چوخلار آقامیزدان او گئجه گوردی عنایت
فطروس دی بیری،شهپری تاپموشدی جراحت
سینمیش قانادین گَتدی ولی گئِتدی سلامت
ایستیردی پرآچسون دئدی جاندان یاشاسین عشق
..
..
فطروس بئله بیرقول وئروب نور دوعینه
کیم نوکر اولا دهریده شمس الثقلینه
یا کیمسه سلام ایلیه عشقیله حسینه
عشقین دیئرم شاهه یاخیندان یاشاسین عشق
..
..
امّا دئنه فطروس؛ آقاوین شهپری دوشدی
مقتلده اونون قانه باتان پیکری دوشدی
بیر ساربانین اللرینه اللری دوشدی
سیراب ائله دی عشقی او قاندان؛یاشاسین عشق
..
..
منده آقا بیر بندۀ بدنام و رذیلم
آدیم دی «مُصَیِّب» ؛ قاپیوا عبد ذلیلم
دردیم ده اگر اولسا بو درگاهه دخیلم
عشقون ائده جاق دردیمه درمان یاشاسین عشق
..
..
..
(1) رَغد: خوشی،آسایش،راحتی،رفاه
..
..
#حسینیه #مصیبی_تبریزی #حسینیه_میلادیه #ترکی #زبدةالاشعار
نظر دهید