رحمتون سایه سالوب عالم امکانه حسین #حسینیه_شبخیز

عرض ارادت به آستان حضرت سیدالشهدا (ع)
#گریز به #وداع
.
✍️ #زبدةالاشعار ✍️
.
🆔: @nohe_torki
.
مرحوم شبخیز
.
رحمتون سایه سالوب عالم امکانه حسین
درگهون آدلانوب عالمده کرمخانه حسین
.
کیم قویوب صدقیله یوز درگهیوه حاجت آلوب
چاره سیز دردی یتوب دولت درمانه حسین
.
آستاننیدا کی خادم لریوین باش قره سی
قدرده طعنه ویرار تاج سلیمانه حسین
.
ناامید اولمیوب اولماز قاپووا کیمسه قویوب
صدق اوزیله یوزونی آند اولا قرآنه حسین
.
گون کیمی حُسن جمالون ائدوری جلوه هر آن
هر نظرده باخورام هر یئره هر یانه حسین
.
سنون عشقندی دامارلاردا گزیز قان یئرینه
هر آخان قطره اولور قلبده مین دانه حسین
.
خدمتیم حضرتیوه اولماسا قابل منی گل
عفو قیل ایله تصدّق شه مردانه حسین
.
بیر اوزون باخ منه زینب باجوین خاطرینه
گلمیشم دردین الیندن بیلوسن جانه حسین
.
بو یقین دور منه مین دردیم اولا چاره ائدر
بیر باخیش لطف گوزون باخسا حکیمانه حسین
.
جان وئرنده کرم ائت گل باشیمی آل دیزیوه
بلکه آسوده وئریم جانیمی جانانه حسین
.
قوی منی ئولدوره بو درد محال امردی من
سن اولان یئرده دئسم دردیمی لقمانه حسین
.
تازه لقمان اؤزی حکمت قاپووین سائلی دور
گوز تیکوب رحمتیوه خوار و ذلیلانه حسین
.
بیر باخشیدا بیلورم فطرسا قیلدون نه کرم
منیده لطفیله مشمول ائله احسانه حسین
.
وئرمرم خسته لیقین لذّتینی دنیالارا
گلسن اوُل لحظه باشیم اوسته طبیبانه حسین
.
یوخ ازلدن بیلوسن روضۀ رضواندا گوزوم
وئرمرم بیر توکیوی مین بئله رضوانه حسین
.
عقل ودانش نیه لازم هانی زنجیر جنون
تا دئسونلر بو ولاده منه دیوانه حسین
.
اِئتمرم اوزگیه اظهار نیاز ئولسمده
عرض حاجت ائدرم سن کیمی سلطانه حسین
.
کیم سنون تک چکوب عالمده علایقدن الین
وار یوخون بذل ائلیوب حضرت یزدانه حسین
.
ایلدون تخت تولّاده ملوکانه جلوس
ساچدین عشقین علمین قلّۀ امکانه حسین
.
کربلانی ائلدون عشق و وفا میکده سی
جمع اولوب باشیوه یتمیش ایکی فرزانه حسین
.
وئردین اوُل جمع وفا پروره صهبای ولا
ائتدون اُول عِدّیه بو عالمی میخانه حسین
.
گلمدی کثرت لشگر نظر حضرتیوه
جام وحدتدن ایله مستیدی مستانه حسین
.
وئردی هر عاشقه بیر جرعه ولا باده سینی
ائتدی سرمست بلا یولّادی میدانه حسین
.
دئدی هیهات ایلیم فاسقه بیعت هیهات
نقض میثاق ائده اوز ائدیقی پیمانه حسین
.
یئر یوزون دولدورا لشگر ائلمز ذرّه خیال
عرصۀ جنگده مردانه دی مردانه حسین
.
اَوَل اُؤز اوغلی علی اکبری سرمست ایلدی
پایه ده وئردی اونا رتبۀ رندانه حسین
.
نوجوان قاسمی عشق اوسته فدا ائتماقیلن
وئردی رونق نه گوزل مکتب عرفانه حسین
.
گوردی هر جنبه ده لایقدی علی نین بالاسی
شأنیجه وئردی اونا منصب شاهانه حسین
.
اولدی سقّای حرم لشگرینه پرچمدار
رتبه سین آرتیروب اوج شرف و شانه حسین
.
آلتی آیلق بالاسین اللری اوسته آپاروب
کعبۀ عشقده ذبح ائتدی خلیلانه حسین
.
گوردی زینب آدینی باشدا یازوب کاتب عشق
نظر ائتجاق یازیلان نامۀ فرمانه حسین
.
زینبین واردی بیوک نقشی گوروب نهضتده
چاغیروب خیمۀ مخصوصه صمیمانه حسین
.
ایستیوب آیریلا خرگاه ولادن او زمان
گتوره مرکبینی عرصده جولانه حسین
.
تولکی لر او وحشتلی چوله نعره سالوب
شیر تک قویدی قدم سمت نیستانه حسین
.
وقت او وقت اولدی وداع ایلیه زینب باجیسین
عزم ائده عزم ایلین لر کیمی میدانه حسین
.
دئدی زینب باجون ئولسون بو زمان خیمه لره
بیرده رجعت ائده جاقسان دئ گوروم یا نه حسین
.
نه اجل مرکبینه اولموسان آسوده سوار
گئدوسن مسلخ قتلایه دلیرانه حسین
.
چوخ شتاب ائتمه ایاق ساخلا دایان بیر لحظه
توشه وصلوندن آلیم عالم هجرانه حسین
.
آخرین لحظه وصیّت ائلمه میشدی آنامیز
بوغازندان ئوپه بو خانه سی ویرانه حسین
.
حشره تک ایلر او بوسه باجیوی مست و خمار
اَن آتندان کرم ائت زینب نالانه حسین
.
بو شتابیله که عزم ایلموسن رزمگهه
قورخورام دوندره امیدیمی حِرمانه حسین
.
باشمین درد و بلاسی هله بوندان صورادور
غم هجرین وئره جاق صبریمی تالانه حسین
.
ائتمرم شکوه بو سوداده گله هر نه بلا
شعلۀ شمعه یانار رسمدی پروانه حسین
.
اوچ یاشیندا قیزیوین آز قالیری قلبی یاتا
اُنس بیر عمر توتوب سنله بو دردانه حسین
.
چک محبّت الیوی تئل لرینه گویلونی آل
قویما هجرینده گله نالیه افغانه حسین
.
باغلاسا راه محبّتده عدو قولّاریمی
التماس ایلمرم لشگر عدوانه حسین
.
آیریلیق لحضه سی گل بیر باجی قارداش دانشاق
هجرین آخر سالاجاق دشت و بیابانه حسین
.
بیر یانان خیمه ده ماتم توتاجاق یاسلی باجون
نه دئسون گلسه آنان شام غریبانه حسین
.
نیلیرم چاره یولون زینبه گل گوستر اوزون
قلبین آماج اولاجاق ناوک پیکانه حسین
.
ائوین آباد‌ اولا «شب خیزی» بو عالمده سنون
عشق پاکوندی ائدن عاشق دیوانه حسین
.
.
#حسینیه_شبخیز
#حسینیه_مدح #وداع_حسینیه_وداع
#رحمتون_سایه_سالوب_عالم_امکانه_حسین
#ترکی
.
✍️ #زبدةالاشعار ✍️
.
🆔: @nohe_torki