رخصت آلدیم گیدیرم جانب میدانه آنا #اکبریه_صابر_تبریزی

وداع حضرت علی اکبر (ع) با مادر
.
.
مرحوم صابر تبریزی
.
.
رخصت آلدیم گیدیرم جانب میدانه آنا
حق یولوندا بویانام منده سوسوز قانه آنا
.
.
خَلق و خُلقیمده اگر چه بولورم یوخدی قصور
نور والشّمسیله واللّیل ایلیوب سنده ظهور
زینت ایتماق لیق اولوب شرعده قربانه ضرور
سرمه چک گوزلریمه زلفیمه وور شانه آنا
.
.
زلفیمه شانه ووروب توکماقا آهسته یوزه
قورخوسان تیتیرور الین بیر تلینی شانه اوز
اوندا حالون نولی تل تل یوزیوین قانی سوزه
قانلی زلفیم اولا حایل رخ تابانه آنا
.
.
بو هامی لشکر گمراه اُلوف اندر اُلوف
بو بیاناندا ووروب منتظر اللرده سیوف
یازالار جسمیمی تیغیله چو پاشیده حروف
هر بیر عضوین دونه بیر آیۀ قرآنه آنا
.
.
بابامین یاور و انصاری شهید اولدی تمام
یتیشوب نوبه بنی هاشم ایده جنگه قیام
بیر بیره سبقت ایدوللر ایده لر اخذ مرام
ویره لر جان یته لر محضر جانانه آنا
.
.
وارث شیر خدا شبه پیمبر لقبم
درّ بحرین و نجیب الطّرَفین العربم
مظهر ابن ذبیحین و خلیلی نَسَبَم
منه زیبنده دور اوّل بویانام قانه آنا
.
.
سر شوریده می پر شور ایلیوب شوق وصال
مجلس وصل نگاره گیدورم دور یولا سال
ئوزی رخصت منه ویردی شه فرخنده مثال
امر ایدوب حمله ایدم لشکر عدوانه آنا
.
.
بولورم درد فراقیم سنه چوخ سخت اولاجاق
بو یولی طیّ ایلینلر ولی خوشبخت اولاجاق
کفنیم گر چه قزلقانه باتان رخت اولاجاق
بیر کفن بوینوما سال سال یولا میدانه آنا
.
.
الى قوینوندا دوروب خیمه قباقینده آتام
منتظردور یولا سالسون منی مقصوده چاتام
خوابگاه اَبَدی ده ایاقی آتدا یاتام
منله ایستر اولا قبرینده ده همخانه آنا
.
.
سن گرک عشق اودونی اشگیله خاموش ایده سن
ئوز الونله منی شوقیله کفن پوش ایده سن
درد هجرانیمی بالمرّه فراموش ایده سن
آغلاسان آغلیه سن شاه شهیدانه آنا
.
.
نجه یثربده تیکوبدور یولا صغرا گوزینی
دوندروب شامه فراقیم باجیمون گوندوزونی
سنده مندن صورا چکسن نقدر ئل سوزونی
دوز مبادا گله سن ناله و افغانه آنا
.
.
یوزومه باخما بله توکمه یوزه اشگ ملال
آنالیق حقّیوى ایله من عطشانه حلال
بسدی بو تشنه لیقیم قیلما داخی غرق ملال
بحر اندوه ده سالما منی طوفانه آنا
.
.
یورقونام یاتمامیشام صبحه کیمی بو گجه من
باشدا کی شوق شهادتله یاتیدیم نجه من
شهدا گیتدى یتوب مقصده قالدیم گجه من
اکتفا ایله وصالیمده بو بیر آنه آنا
.
.
شهدا ایچدیله شوقیله ئولوم شربتی نی
تاپدیلار محضر جانان دا شرف عزّتینی
قانلاری ایلدی گِل کرب و بلا تربتینی
شایقم منده یتم بو شرف و شانه آنا
.
.
سرفراز ایلیوب حق من کیمی عالمده کیمی
که باتام قانیمه ئوز سویدوقی بیر فدیه کیمی
سنده باس سینه وه قانه بویانان کوینکیمی
فخر قیل هاجره شکر ایت حق سبحانه آنا
.
.
هر قدر یوز ویره غم شدّت ایده درد و بلا
ای اوغولسوز آنا دوز ایلمه فریاد و نوا
صدقیله صابر اولوب ایله حقه حمد و ثنا
عاقبت صبر چکر صابری رضوانه آنا
.
.
#اکبریه #صابر_تبریزی #اکبریه_شهادت #ترکی