وداع امام حسین (ع)
.
✍️ #زبدةالاشعار ✍️
.
🆔: @nohe_torki
.
مرحوم یحیوی اردبیلی
.
روز محشرون عکسین هر زمان قلم چکدی
بیر حسین بیر عاشورا بیر بولوک حرم چکدی
.
.
کربلا چولین لشگر دولدوروب قیامتدور
خیمه لر قباقینده هولناک حکایتدور
آیریلور حسین زینب آخرین ساعتدور
شه گئدر حرم قویماز چوخ بیوک مصیبتدور
بو کشاکش آفاقه پرده ی الم چکدی
.
.
نشر اولور بو محشردن اوتری خلقچون محشر
نور عین زهرایه تنگیدی جهان یکسر
سأخلیوب أونی یولدان دامنین دوتان اللر
قویمیور سوار اولسون ذوالجناحه اول سرور
متّصل رکاب اوسته قوزانوب قدم چکدی
.
.
یالوارور عیال اطفال التماس ائدر قویماز
قارداش ال ایاقیندن باجیلار اؤپر قویماز
قزلاری قباقینده دسته صف چکر قویماز
ال چکنده بانولر خوردا طفل لر قویماز
اوندا شاه مظلومان گور نه قدری غم چکدی
.
.
گوگده خازن جنّت حضرتون یولین گوزلر
الده دوتمیش حوریلر قسم قسم شربتلر
رزمگهده ذوالجوشن أوغلى سؤلیور خنجر
قتلگاهده زهرا فرش ائدور یثره معجر
اهل عالم لاهوت ضجّه دمبدم چکدی
.
.
مشفقانه دیللرلن رام ائدوب اوشاقلاری
ایستدی سوار اولسون گئتسون عرصیه ساری
دوتدى مرکبین کلثوم أول شهون جلوداری
فضّه ده رکاب آلدی میندیروب او بی یاری
زینب اولدی پرچم دار زلفدن علم چکدی
.
.
گوردی بیر سیه پوشی گوشه ده دوروب آغلار
یاغدیرور گوزیدن یاش ناله سی اورک داغلار
یول گئدن اولا هرکس یولدان ایلیوب ساخلار
اوز کنیزینی شاهلار عرض ائدر بئله یوخلار
کیم منیم کیمی شاها دهردن ستم چکدی
.
.
من أو شهربانویم ملک جمده پرورده
دستگیر اولوب گلدیم یثربه او گونلرده
رحم گورمدیم اصلا ظلمکار عربلرده
راضی اولما اعرابه دستگیر اولام بیرده
بسدور اول اسارت که دختر عجم چکدی
.
.
بیر غریب و محزونم لطف قیل بو نالانه
گلمیشم دخیل ایندی خاکپای سلطانه
یوخدی طاقتیم بیرده طعنه های عدوأنه
بیر رَویّه وئر دستور یول تاپوم من ایرانه
خاندانیمی نقاش گرچه منهدم چکدی
.
.
باخدی شهربانویه آغلادی شه عطشان
تاپشوروب او ساعت که ییخدیلار منی آتدان
ذوالجناحیمی گوردون گلدی قانیله الوان
مرکبه سوار اول گئت أی نجیبه ی دوران
ساحله سنی تا گور دست غیب او دم چکدی
.
.
منتسبدی بو جمله زینبه مقاتلدن
مندن آیریلوب گوردوم قارداشیم گئدر ألدن
برهم اولدی احوالیم ماجرادی مشکلدن
وئرّم آند زهرایه بیر دئدیم دایان دلدن
قیتروب دالی سمته شاهی اول قسم چکدی
.
.
بوینینا قولوم سالدیم آغلادیم همین هنگام
گل بوغازینی اؤپدیم عهده ایلدیم اقدام
لبلرین اؤپوب وئردیم اوز وظیفه مه انجام
سینه مه الین قویدی ائتدی قلبیمی آرام
تا منی بلالرده صبره لاجرم چکدی
.
.
قلبیمی نئجه تسخیر ائتدی بیلمورم اول شاه
من اوزوم دئدیم قارداش گئت جهاده بسم الله
گئتدی خیمیه زینب عرصیه ذبیح الله
بو اسیر شمر اولدی او شهید عشق الله
مطلبی بو میزانه گردش قلم چکدی
.
.
ائتمسیدی میناده گر حسین او گون امداد
اولمازیدی اسماعیل حکم ذبحدن آزاد
گلمزیدی دنیایه او ذبیحدن اولاد
خاتم النّبی دنده نه تولّد و میلاد
بو مقامه اوز جدّین خون محترم چکدی
.
.
گورسنوب هلال غم برج چرخ اخضردن
«یحیوی» یازوب نوحه خلعت آلدی حیدردن
قلب أئوینده بیر چشمه ظاهر اولدی کوثردن
دامدی نوک مژگاندان قطره قطره گوزلردن
تپراق اوستینه نقش روضه ی ارم چکدی
.
.
.
.
#وداع_یحیوی_اردبیلی
#حسینیه_وداع
#روز_محشرون_عکسین_هر_زمان_قلم_چکدی
#ترکی
.
✍️ #زبدةالاشعار ✍️
.
🆔: @nohe_torki
نظر دهید