وداع حضرت علی اکبر (ع)
زبانحال مادر
.
✍️ #زبدةالاشعار ✍️
.
🆔: @nohe_torki
.
مرحوم شانی تبریزی
.
آلموسان اگر باباندان اذن کار زار اوغول گیت
منده سندن ال گوتوردوم دورما گلعذار اوغول گیت
.
.
گرچه عالم ازلدن وار محبّتیم سنیله
چوخدی ای اوغول بولورسن دلده اُلفتیم سنیله
خلق ایچینده اعتباریم واردی عزّتیم سنیله
بو غریبه سنسیز اولماز بیرده اعتبار اوغول گیت
.
.
عهد عالم السته ایتماقا بوگون وفا، سن
قیل شتاب ایله تعجیل ای جوان مه لقا ، سن
گیت ویر حق یولوندا جانون شوق و ذوقیله فدا ، سن
قوی آنان دالونجا قالسون چشمی اشکبار اوغول گیت
.
.
ایللریله یاتمیوب چوخ چکموشم اوغول جفا ، من
واقعاً بو گوندن اوتری بسلدیم سنی فدا ، من
صبر ایدوب اورکدن اولّام هر مصیبته رضا، من
واردی بولموشم رضای حق کردگار اوغول گیت
.
.
گیت علی دایانما دورما گیتماقون رضای حقدور
شکر قیلّام هر زماندا اکبریم فدای حقدور
راه حقده سن فداسن چون بو یر منای حقدور
منده حشرده بونیلان قیلّام افتخار اوغول گیت
.
.
بو مقام امتحاندا سنده گیت بیر امتحان ویر
کوی عشقده اؤز عشقون اهل عالمه نشان ویر
گرچه چوخ سوسوزسان اما اولماسا سو تشنه جان ویر
منده بیرده سنسیز ایتمم سیر جویبار اوغول گیت
.
.
من او هاجرم دیمیشدیم گوندرم سنی منایه
سندن ال چکم ولیکن تاپشورام علی خدایه
ای فدا سنون کیمی بیر جان ویرن سوسوز فدایه
شوق ذوقیله گیدوب اول سنده جان نثار اوغول گیت
.
.
فرصتیم اولیدی زینت بیر دویونجا تا ویریدیم
سو سپوب سرشکیله بو زلفوه صفا ویریدیم
کاش اولیدی مین جوانیم سن کیمی فدا ویریدیم
خلق ایچنده تا تاپیدی عشقیم اشتهار اوغول گیت
.
.
من او عندلیب زارم وصل گلدن ال گوتوردوم
گل آدی ئولونجه دوشمز گر چه دلدن ال گوتوردوم
سن کیمی جوان اوغولدان جان و دلدن ال گوتوردوم
تا باشیمدا شور عشقیم اولسون آشکار اوغول گیت
.
.
چوخ بو زار و بیقراره حسرتیله باخما یانما
وقت موسم شهادت آز قالوز گئچه یوبانما
ایمدی قاتلون یول اوسته انتظاردور دایانما
باخما رحمسیزدی دشمن قویما انتظار اوغول گیت
.
.
باخما ای علی وطنده بوش قالوبدی گر اطاقون
فاطمه باجون صبادن هر زمان آلور سراقون
حشره دین او بینوانی یاندیرار اگر فراقون
صبر ایدر شکایت ایتمز اول علیل زار اوغول گیت
.
.
گرچه ظاهراً تماماً زخمدار دور گیدنلر
لیک هم جوار یار گلعذار دور گیدنلر
ایمدی سندن اوتری انتظار دور گیدنلر
ایتمه یار و یولداشوندان سن اوزون کناراوغول گیت
.
.
چوخ منه اولور گوارا گر گئدوب دوباره گلسن
نه بو نوعیله سلامت، بلکه پاره پاره گلسن
مرتضی علی بابان تک باشدا قانلی یاره گلسن
سن کیمی او دمده اولّام منده کامکار اوغول گیت
.
.
دوتموری الیم ویریدیم کاملا بو زلفه شانه
تا اولیدی مرغ روحه بیر صفالی آشیانه
قاتلون وراندا قانلی باشوی سر سنانه
یل دگوب اولیدی افشان زلف تابدار اوغول گیت
.
.
قوی باشون جدا باشندا آفتاب تک اوجالسون
شام یولّاریندا هرگون باشیم اوسته سایه سالسون
هر قدر بلا یتیشسون محنت و الم چوخالسون
تاپماز اهل عشقون اصلا شأنی انکسار اوغول گیت
.
.
#اکبریه_شانی_تبریزی
#اکبریه_شهادت
#آلموسان_اگر_باباندان_اذن_کار_زار_اوغول_گیت
#ترکی
.
✍️ #زبدةالاشعار ✍️
.
🆔: @nohe_torki
نظر دهید