زمان عصریدی قتل حسین تاپوب پایان

غارت خیام
.
زبدة الاشعار

?: @nohe_torki
.
مرحوم یحیوی اردبیلی
.
زمان عصریدی قتل حسین تاپوب پایان
لباسینی آپاروب نعشین ائتدیلر عریان
.
قوشون او وقتده غارت اجازه سین آلدی
سوار اولان آتینا خیمه گاهه آت سالدی
.
سواره لر دالیسیجاق گلوب پیاده نظام
محاصره اولوب آتلو پیاده ایله خیام
.
قاچاق یولی کسیلوب ممکن اولمادی قاچماق
آراده قالدی بیر عده اسیر عورت اوشاق
.
عرب اولا سوزی قانماز اوزی بیابانی
گوره طلاو جواهر حریر و دیبانی
.
عرب که گورممیش عمرینده خیمه قبه سی زر
الینه فرصت غارت دوشنده گور نیلر
.
اوشاقلارین ال آتوب دوتدیلار گریبانین
سویوندوروبلا ازلجه لباس الوانین
.
صورا آلوبلا خلخال و گوشواره لرین
سویولمامیش اولان قویمادیلا بیر نفرین
.
او دم حرملره برپا قیامت ایلدیلر
حرمسرانی داغیتیدیلا غارت ایلدیلر
.
حرمسراده حرملرده ظلم یغمادن
قوتاردی قالمادی بیر زاد اومال دنیادن
.
بو شرحی عالم و فاضل سلاله الطیاب
بویوردی حضرت سید غنی حمیده مآب
.
نئجه قوشوون یوواسین تارومار ائدر صیاد
دوشر یئره بالاجا قوشلار ایلیور فریاد
.
او قوشلارون آناسی ایلیور هواده تلاش
اوچار گوگه بالالار اوستونه انور بیر باش
.
وورار داشا آغاجاخول بوداقه شهپرینی
انور هراسیله چنگالینه وورار بیرینی
.
او بچه مرغلری دام ظلمدن قوتارار
اوزین وئرور ئولومه بیربه بیر دوتوب آپارور
.
اونون تک ائتدیله سوزان حسین خانه سینی
داغیتیلاربالا قیزلارون آشیانه سینی
.
داغیلدی چوللره صیاددن قاچان قیزلار
اتکلرینده آلودان قناد آچان قیزلار
.
اگر چه دوتدی دومان توسدی زینبون گوزینی
گینه اوحالدا او خاتون ایتورمدی اوزینی
.
اوزینی قمچی لر آلتدا هلاکته سالدی
اوچوب قنادین او قوش تک داغا داشاچالدی
.
آتان زمانیده صیاد اونا جفا داشی
خانم قباقه وئرردی قولونی یا باشینی
.
تلاش قیلدی او شهباز او قدری چیرپیندی
دئمک اولار توخانوب داشه شهپری سیندی
.
اوچوب دوشوب یئره صیادیلن ائدوب دعوا
اله گلن قیزی گیزلتدی شهپری آلتدا
.
آچوبدو ساچلارینی توکدی قیزلارون باشینا
اوتوردی دامنینی چکدی قیزلارون باشینا
.

#غارت_خیام
#یحیوی_اردبیلی
#زمان_عصریدی_قتل_حسین_تاپوب_پایان
#پرچم_عزا_یحیوی
#ترکی
.
#زبدةالاشعار

?: @nohe_torki